ផលិតករ សេង ធី សម្ពោធស្នាដៃទី៣រឿង «អ្នកស្នងបារមី» ត្រៀមចាក់បញ្ចាំងស្អែកនេះ!

ស្នាដៃទី៣ របស់ផលិតករ សេង ធី ត្រៀមចាក់បញ្ចាំងនៅតាមបណ្ដារោងកុនស្អែកនេះហើយ ក្រោយទទួលបានជោគជ័យជាហូរហែលើស្នាដៃទី១ និងទី២ ហើយម្សិលមិញផលិតករបញ្ចប់ការសិក្សាមកពីប្រទេសកូរ៉េរូបនេះត្រៀមបង្ហាញស្នាដៃថ្មីមួយទៀតលើផ្ទាំងសំពត់ស។

ក្រោយបញ្ចប់ស្នាដៃទី១ និងទី២ ផលិតករ សេង ធី បានបន្តស្នាដៃទី៣ ដោយត្រៀមចាក់បញ្ចាំងនាថ្ងៃស្អែក។ ស្នាដៃទី៣ របស់ផលិតករវ័យក្មេងរូបនេះត្រូវបានដាក់បញ្ចូលនូវផ្នត់គំនិតនៃទស្សនៈសម័យថ្មី ដែលធ្វើឱ្យអ្នកទស្សនាទទួលបានបទពិសោធន៍និងចំណេះដឹងបន្ថែមដែលមិនមែនត្រឹមតែជាការកម្សាន្ត។ លក្ខណៈពិសេសមួយទៀតគឺឆ្លុះបញ្ចាំងពីវប្បធម៌ និងការឈ្លានពានចង់បានរបស់ទ្រព្យអ្នកដ៏ទៃហើយក្នុងនាមជាអ្នកបន្តវេនតើត្រូវថែរក្សាបែបណា ដើម្បីកុំឱ្យបាត់បង់។

ទាំងនេះមាននៅក្នុងរឿង «អ្នកស្នងបារមី» ដែលនឹងបញ្ចាំងនៅថ្ងៃទី ៤ ខែ កញ្ញា ឆ្នាំ ២០២៥ តាមបណ្ដារោងកុនរបស់កម្ពុជាទាំងអស់។ គួរឱ្យដឹងដែរថា រឿង «អ្នកស្នងបារមី» ជាខ្សែរឿងទី៣ ដែលផលិតករ សេង ធី បានបញ្ចប់ការថត និងកំពុងត្រៀមចាក់បញ្ចាំងបន្ទាប់ពីរឿង «បងលុច្សឃើញខ្មោច» និងរឿង «ព្រះភូមិ» សុទ្ធសឹងជារឿងទទួលបានការគាំទ្រក្រោយបញ្ចប់ការចាក់បញ្ចាំង៕