សិទ្ធី នីកា, ម៉ានីកា និង កុសុមៈ ស្រីស្អាតទាំង ៣ យូរៗជុំគ្នាម្ដង បញ្ចេញសម្រស់ភ្លឺចិញ្ចាច

កម្របានជួបជុំគ្នាបែបនេះ តារាសម្ដែងស្រីទាំង ៣ សិទ្ធី នីកា, សរពេជ្ញ ម៉ានីកា និង សាន្ត កុសុមៈ បង្អួតសម្រស់ក្នុងរូបភាពតែមួយ ធ្វើឲ្យអ្នកគាំទ្រភ្ញាក់ផ្អើលខ្លាំងចំពោះសម្រស់តារាស្រី ៣ រូប។ តារាស្រីទាំង ៣ បានជួបគ្នានាកម្មវិធីមង្គលការដ៏ធំមួយកាលពីចុងសប្ដាហ៍កន្លងទៅ។

សម្រាប់អ្នកទាំង ៣ ពិបាកនឹងពណ៌នាថានរណាស្អាតជាងណាស់ ព្រោះម្នាក់ៗសុទ្ធតែស្អាតម្នាក់មួយបែប ហើយក៏ជាសម្រស់ដែលធម្មជាតិផ្ដល់ឲ្យថែមទៀតផង គ្រាន់តែក្នុងចំណោមអ្នកទាំង ៣ ម៉ានីកា ក្មេងជាងគេ ដោយនាងទើបមានវ័យ ១៤ ឆ្នាំតែប៉ុណ្ណោះ ហើយចំណែកកុសុមៈ និង នីកា សុទ្ធតែវ័យ ២០ ក្រាស់។

នៅក្នុងកម្មវិធីមង្គលការនោះ សិទ្ធី នីកា បានគ្រងរ៉ូបពណ៌ទឹកប៊ិច រីឯ ម៉ានីកា បានស្លៀកឈុតពណ៌ផ្កាឈូក ដោយអ្នកទាំង ២ ជ្រើសម៉ូដចោមពុងដូចគ្នា ហើយក៏សក់ទម្លាក់ដូចគ្នាថែមទៀតផង។ ចំណែក កុសុមៈ បានប្រើឈុតពណ៌ទឹកមាសខ្ចី។ ទោះជាប្រើរ៉ូបពណ៌ខុសគ្នា តែ នីកា, ម៉ានីកា និង កុសុមៈ បញ្ចេញសម្រស់ចែងចាំងដូចគ្នា បូករួមនឹងសម្បុរស្បែកភ្លឺ ថ្លា លើកសម្រស់កាន់តែស្អាតមួយកម្រិតទៀត។

អ្នកទាំង ៣ មិនត្រឹមតែមានសម្រស់ស្រស់ស្អាតឡើយ ចរិយាសម្បត្តិ ព្រមទាំងការរៀនសូត្របានល្អ ហើយសុទ្ធសឹងតែជាគំរូដល់អ្នកសិល្បៈជំនាន់ក្រោយ។ ចំណែកការសម្ដែងវិញទាំង នីកា,ម៉ានីកា និង កុសុមៈ សុទ្ធតែមានស្នាដៃត្រូវបានមហាជនទទួលស្គាល់ទាំងអស់។ ដូចនេះហើយបានជាអ្នកគាំទ្រសរសើរតារាស្រី៣ ដួង ដែលស្អាតទាំងរូប ស្អាតទាំងកិរិយាមារយាទ។

មិនតែប៉ុណ្ណោះអ្នកគាំទ្ររំពឹងថា នឹងមានក្រុមហ៊ុនផលិតភាពយន្តហ៊ានចំណាយប្រាក់វិនិយោគ ដោយមានតួសម្ដែងស្រីទាំង ៣ថតរឿងរួមគ្នា៕

រូបភាព៖ Kosamak san និង Sithy Nika

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត