SK ដែលជាតារាចម្រៀងស្រីរបស់ផលិតកម្ម GenMusix តែងទទួលបានការគាំទ្រខ្លាំងខ្លា តាមរយៈការបង្ហោះរូបភាពលើបណ្ដាញសង្គមផ្សេងៗ ពិសេស Facebook ផ្ទាល់។ រូបសម្រស់ស្អាតដូចបុប្ផា រាងរៅស្រឡូន កម្ពស់ខ្ពស់ស្រឡះ បូករួមចង្កេះមួយក្ដាប់ ស្បែកម៉ត់រលោង SK ធ្វើឲ្យអ្នកគាំទ្រមិនថាប្រុស ឬស្រីអត់ទ្រាំមិនសរសើរមិនបាន។
កញ្ញា SK ដែលមានឈ្មោះពិត ទាង រតនៈ បានបង្ហាញខ្លួនជាតារាចម្រៀងកុងត្រារបស់ផលិតកម្ម GenMusix ដែលសម្ពោធផ្លូវការ កាលពីនៅថ្ងៃ ១៩ ខែកញ្ញា ឆ្នាំ ២០២៣ កន្លងទៅ។ រយៈជាង ១ ឆ្នាំនេះ SK ក៏មានបទចម្រៀងជាបន្តបន្ទាប់ផងដែរ គ្រាន់តែមិនទាន់មានការគាំទ្រផុលផុសខ្លាំងឡើយ។
តែសម្រាប់ការចាប់ដៃគូសម្ដែងជាមួយ Step វិញ ឃើញថា SK ពិតជាបានធ្វើឲ្យអ្នកគាំទ្រពេញចិត្តពេញថ្លើមមួយទំហឹង។ មួយវិញទៀត SK ក៏ជាតារាស្រីចូលចិត្តបង្ហោះរូបភាពលើបណ្ដាញសង្គមផងដែរ ហើយ album រូបភាគច្រើននៅលើ Facebook នាងមានអ្នកចុច Like រាប់សិនម៉ឺននាក់ និងអ្នកចែករំលែកបន្តខ្ទង់ពាន់នាក់ដូចគ្នា។
ការចេញបទចម្រៀងសម្រាប់កញ្ញា SK ត្បិតមិនទាន់មានច្រើននៅ GenMusix តែការងារសិល្បៈនៅបន្តរវល់ និងការប្រម៉ូតផលិតផលថែរក្សាសម្រស់ផ្សេងៗ នាងមានទីផ្សារខ្លាំងតែម្ដង។ ទាង រតនៈ ក៏បានបង្ហាញឲ្យឃើញយ៉ាងច្បាស់ថា នាងពិតជាមានសមត្ថភាពទាំងច្រៀង និងការថតប្រម៉ូតឲ្យផលិតផលផ្សេងៗ មានមហាជនចាប់អារម្មណ៍ច្រើន៕
រូបភាព៖SK
