កញ្ញា Sydney Marithម្ចាស់​មកុដ Miss Planet International 2025 បាន​បង្ហាញ​វីដេអូ​សម្រាប់​ដាក់​ពាក្យ Casting កម្មវិធី Victoria’s Secret ដើម្បី​អាច​មាន​ឱកាស​អាច​ក្លាយ​ជា​តារា​បង្ហាញ​ម៉ូដ​ សម្រាប់​ប្រេន​ខោអាវ​ក្នុង​ដ៏​ល្បី​របស់​ពិភពលោក។

Victoria’s Secret បាន​កំពុង​រៀបចំ​កម្មវិធី​ជ្រើសរើស​តារា​បង្ហាញ​ម៉ូដ សម្រាប់ Angel ថ្មី។ កម្មវិធី Victoria’s Secret Fashion Show នឹង​វិល​ត្រឡប់​មក​វិញ​នៅ​រដូវ​ស្លឹក​ឈើ​ជ្រុះ​នេះ​ដោយ​ប្រកាស​ឲ្យ​ស្រ្តី​គ្រប់​រូប​អាច​ដាក់​ពាក្យ និង​អាចដើរលើឆាក (និង​ឈ្នះ​កិច្ចសន្យា​ជាមួយ @imgmodels ភ្នាក់ងារ​បង្ហាញ​ម៉ូដ)។

នៅ​ក្នុង​វីដេអូ​ដែល Sydney Sari Marithម្ចាស់​មកុដ​Miss Planet International 2025 បាន​ណែនាំ​ខ្លួន និង​​បង្ហាញ​ពី​តិចនិក​ក្នុង​ការ​ផាត់​មុខ​បែប​ធម្មជាតិ ប៉ុន្តែ​ស្អាត​ភ្លឹង​ជាមួយ​ស្ទីល៍​សក់​មូលរួញ​តិច​ៗ សម​នឹង​សម្រស់​កូន​កាត់។ វីដេអូ​ដែល Sydney ទទួល​បាន​ការ​ជូនពរ​ពី​តារា​ម៉ូដែល និង​អ្នក​គាំទ្រ​ទាំង​ក្នុង និង​ក្រៅ​ប្រទេស។

Sydney គឺជា​តារា​ខ្មែរ​ដំបូង​ដែល​បាន​ដាក់ Casting Victoria’s Secret ហើយ​នាង​ក៏​មាន​បុគ្គលិក​លក្ខណៈ​គ្រប់គ្រាន់​ទាំង​កម្ពស់ រូប​សម្រស់ ចំណេះដឹង និង​សំខាន់​បំផុត​កូនកាត់​ខ្មែរ​អាមេរិករូបនេះ​ជា​ម្ចាស់​មកុដ Miss Planet International 2025 ព្រម​ទាំង​ជា​តារា​បង្ហាញ​ម៉ូដ​ស្រាប់។

Victoria’s Secret Fashion Show ជា​វេទិកា​បង្ហាញ​ម៉ូដ​ដ៏​អស្ចារ្យ ដោយ​មិន​ត្រឹម​តែ​នារី​ធម្មតា​ឡើយ​មាន​បំណង​ចង់​មាន​ឱកាស​ដើរ​បង្ហាញ​សម្រស់​ទី​នោះ សូម្បីតែ​ម៉ូដែល​អាជីព​ស្រាប់​ក៏​មាន​ក្ដី​សុបិន​ចង់​ក្លាយ​ជា Angel របស់ Victoria’s Secret ផង​ដែរ៕