នាដកា-សមាគមកាយឫទ្ធិនារីកម្ពុជាហាត់សម ត្រៀមស្វាគមន៍គណៈប្រតិភូក្នុងនាមជាម្ចាស់ផ្ទះ

កម្ពុជាមានសេចក្ដីរីករាយនិងមោទកភាពបំផុតក្នុងនាមជាម្ចាស់ផ្ទះនៃការរៀបចំ មហាសន្និបាតកាយឫទ្ធិនារីពិភពលោក លើកទី៣៩ និងកិច្ចប្រជុំប្រចាំឆ្នាំ លើកទី៤២ របស់សហគមន៍ OB-PS ក្រោមប្រធានបទ «យើងឃើញ យើងយកចិត្តទុកដាក់ យើងរួមគ្នាធ្វើសកម្មភាព» ក្នុងឆ្នាំនេះ។

ព្រឹត្តិការណ៍ដ៏មានសារៈសំខាន់នេះនឹងក្លាយជាវេទិកាដ៏អស្ចារ្យសម្រាប់ការបង្កើតចំណងមិត្តភាពកាយឫទ្ធិនារីនៅទូទាំងពិភពលោក។ ក្នុងនោះ សមាគមកាយឫទ្ធិនារីកម្ពុជាបានត្រៀមខ្លួនរួចជាស្រេចក្នុងការស្វាគមន៍ភ្ញៀវអន្តរជាតិទាំងអស់ ដោយភាពកក់ក្ដៅ និងមោទនភាព។

មហាព្រឹត្តិការណ៍ដែលនឹងរៀបចំធ្វើនៅក្នុងខេត្តទេសចរណ៍ដ៏មានសក្ដានុពលរបស់កម្ពុជា ពោលគឺខេត្តសៀមរាប ក្រោមការដឹកនាំនិងជ្រោមជ្រែងពីសំណាក់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ចាប់ពីថ្ងៃ ១៤ ដល់ថ្ងៃទី ១៩ ខែ មិថុនា ឆ្នាំ ២០២៦ ខាងមុខនេះ នឹងមានការបង្ហាញជូននូវផ្ទាំងទស្សនីយភាពសិល្បៈ របាំ ជាពិសេសការសម្ដែងរបស់នាដកាដែលជាសមាជិកានៃសមាគមកាយឫទ្ធិនារីកម្ពុជា។

ដើម្បីផ្ដល់ជូននូវចំណីចក្ខុដ៏អស្ចារ្យសម្រាប់ភ្ញៀវជាតិ-អន្តរជាតិ នាលើកនេះ នាដកាដ៏ប៉ិនប្រសព្វនិងទេពកោសល្យបានចូលរួមហាត់សមយ៉ាងយកចិត្តទុកដាក់ និងត្រៀមយ៉ាងរួចរាល់ក្នុងការផ្ដល់ជូននូវកិច្ចស្វាគមន៍យ៉ាងកក់ក្ដៅជូនទៅដល់គណៈប្រតិភូដែលនឹងបង្ហាញវត្តមានចូលរួមក្នុងព្រឹត្តិការណ៍មហាសន្និបាត «មហាសន្និបាតកាយឫទ្ធិនារីពិភពលោក លើកទី៣៩ និងកិច្ចប្រជុំប្រចាំឆ្នាំ លើកទី៤២ របស់សហគមន៍ OB-PS»។

គួរឱ្យដឹងដែរថា ការរៀបចំព្រឹត្តិការណ៍ដ៏អស្ចារ្យនៅក្នុងខេត្តសៀមរាបលើកនេះនឹងនាំមកនូវលំហូរភ្ញៀវទេសចរណ៍បរទេសចូលមកកាន់កម្ពុជា ហើយក៏ជាផ្នែកមួយដែលជួយដល់សេដ្ឋកិច្ចប្រជាជនក្នុងតំបន់ទេសចរណ៍ផងដែរ៕

រូបភាព ៖ កម្ពុជាមាតុភូមិខ្ញុំ & ជំទាវ ពេជ ចន្ទមុន្នី

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។