បងស្រីរបស់តារាសម្ដែង អ៊ុន សិទ្ធា លម្អិតពីជំងឺមុនលាចាកលោក តែមិនមែនជាមហារីក

ដំណឹងមរណភាពរបស់តារាសម្ដែង អ៊ុន សិទ្ធា បានធ្វើឲ្យរំជើបរំជួល ក្ដុកក្ដួលក្នុងបណ្ដាញសង្គមម្នាក់ៗតក់ស្លុត និងសោកស្ដាយជាពន់ពេកនូវការបាត់បង់មនុស្សមានទេពកោសល្យ ព្រមទាំងអត្តចរិតដ៏ល្អប្រពៃរបស់តារាប្រុសវ័យ ៤២ ឆ្នាំរូបនេះ។

អ្នកសិល្បៈមួយចំនួនបានចែករំលែកព័ត៌មានថាជយលាភីប្រុសស្អាត លេខ១ ឆ្នាំ ២០០៦ របស់ស្ថានីយទូរទស្សន៍ CTN ស្លាប់ដោយសារជំងឺមហារីកដំណាក់កាលចុងក្រោយ ដោយធ្វើឲ្យអ្នកគាំទ្រ និងមហាជនដែលធ្លាប់ទស្សនាការសម្ដែងរបស់លោកស្រណោះស្រណោក ព្រោះមិនដែលឮតារាប្រុសរូបនេះនិយាយអ្វីឡើយ។

បងស្រីរបស់តារាប្រុស អ៊ុន សិទ្ធា បានបញ្ជាក់ថាលោកមិនមែនកើតជំងឺមហារីកឡើយ តែជាជំងឺដំបៅក្រពះ ពោះវៀនធ្ងន់ធ្ងរ និងមានទឹកដក់ក្នុងពោះ ធ្វើឲ្យតារាប្រុសរូបនេះ មិនអាចសម្រាក និងទទួលទានអ្វីបានសោះ ទើបស្ថានភាពកាន់តែធ្ងន់ធ្ងរទៅៗ។ បងស្រីរូបនេះមិនបានដឹងថាតារាសម្ដែង អ៊ុន សិទ្ធា កើតជំងឺនេះឡើយ ទាល់តែថ្ងៃចូលមន្ទីរពេទ្យកាល់ពី ៥ ៦ ថ្ងៃមុនលាចាកលោក ទើបលោកស្រីដឹងដំណឹងប្អូនប្រុសឈឺ។

ចំណែកតារាប្រុស សឿន វីតា ដែលជាមិត្តភ័ក្ដិល្អរបស់ អ៊ុន សិទ្ធា ក៏មិនបានដឹងដំណឹងធ្លាក់ខ្លួនឈឺរបស់តារាសម្ដែងរូបនេះដែរ។ សឿន វីតា បានបញ្ជាក់ថា សិទ្ធា គ្រាន់តែប្រាប់លោកថា ស្ត្រេស បាក់ទឹកចិត្ត មិនចង់ចេញទៅណាមកណាឡើយ តែមួយរយៈធំមុន អ៊ុន សិទ្ធា ក៏ធ្លាប់បានបង្ហើបថាមានដុំសាច់នៅថ្លើម តែមិនទាន់ធ្វើទុក្ខអ្វីទាំងអស់។

២០ឆ្នាំក្នុងវិស័យសិល្បៈតារាប្រុស អ៊ុន សិទ្ធា ជាសិល្បករទទួលបានការគោរព ស្រលាញ់ចូលចិត្តពីប្រជាជនខ្មែរ ព្រោះតែទេពកោសល្យសិល្បៈ និងជាមនុស្សមានបុគ្គលិកលក្ខណៈល្អ អ្នកផងទាំងពួងស្ញប់ស្ញែង។ ដំណឹងមរណភាពលោកធ្វើឲ្យអ្នកសិល្បៈសឹងតែទាំងអស់បង្ហាញអារម្មណ៍អាឡោះអាល័យ និងបួងសួងឲ្យដួងវិញ្ញាណលោកបានទៅដល់ទីស្ងប់។

សិល្បករគ្រប់ជំនាន់បានទៅចូលរួមកម្មវិធីបុណ្យក្រោយទទួលដំណឹងភ្លាមៗ។ មិនតែប៉ុណ្ណោះ សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន បានចូលរួមបច្ច័យបុណ្យសពតារាសម្ដែង អ៊ុន សិទ្ធា ៣០ លានរៀល តាមរយៈ ឯកឧត្ដម ហ្វៃ សំអាង៕

រូបភាព៖ Amazing Cambodia និង sethea un

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត