ប៉ុន្មាន​ថ្ងៃ​មកនេះ កេរ្តិ៍ឈ្មោះ​ប្រេន​សម្លៀកបំពាក់ កូន​ខ្មែរ ALmée Couture ​បាន​រីក​សាយភាយ​កាន់តែ​ល្បី​ខ្លាំង​បន្ថែម​ទៀត បន្ទាប់ពី​តារា​ស្រី​ល្បី​ៗ​​របស់​ប្រទេស​ចិន បាន​ជ្រើសរើស​ឈុត​ថ្មី​នៃ​ម៉ាក​យីហោ​មួយ​នេះ​ចូលរួម​កម្មវិធី​ធំ​ៗ។

ដោយ​ក្នុង​នោះ​មាន​កំពូល​តារា​ស្រី​លំដាប់​ជួរ​មុខ Yang Mi បាន​ជ្រើសរើស​បណ្ដុំ​ម៉ូដ «Le Jardin des Rêves» របស់ម៉ាក Almée គ្រង​ក្នុង​កម្មវិធី Honor of Kings 2026 Anniversary Co-Creation Night កាលពី​ថ្ងៃ ២៥ ខែ​តុលា ឆ្នាំ ២០២៦។ សម្រាប់​បណ្ដុំ​ម៉ូដ «Le Jardin des Rêves» Almée បាន​យក​ទៅ​បង្ហាញ​នៅ​កម្មវិធី New York Fashion Week ២០២៦។

មិនមែន​មាន​តែ Yang Mi ឡើយ​ដោយ​មិត្ត​រួម​អាជីព កញ្ញា Gulinazha បង្ហាញ​ខ្លួន​យ៉ាង​អស្ចារ្យ និង​លេចធ្លោ​នៅ​ក្នុង​ពិធី​ប្រគល់ពានរង្វាន់ Wenrong Awards ឆ្នាំ ២០២៦ ដោយ​ស្លៀក​ឈុត​ពី​បណ្តុំម៉ូដ «Le Jardin des Rêves» របស់​ម៉ាក Almée ហើយ​ក៏​ឈុត​ដែល​យក​ទៅ​វេទិកា New York Fashion Week ២០២៦ ដែល​បង្ហាញ​កញ្ញា Destiny Seymour។

ចំណែក​តារា​ចម្រៀង និង​សម្ដែង Fiona Sit បានបង្ហាញវត្តមានយ៉ាងទាក់ទាញនៅក្នុងព្រឹត្តិការណ៍ VOGUE Forces of Fashion ឆ្នាំ ២០២៦ នៅប្រទេសចិន ដោយស្លៀកឈុតពី ALMÉE Couture (LOOK 19) ដែល​មានឈ្មោះថា “Winter’s Jewel” ពីបណ្តុំស្នាដៃ “Le Jardin Des Rêves”។

គួរបញ្ជាក់ថា នេះមិនមែនជាឆ្នាំដំបូងដែលតារាចិនកំពូលៗគ្រងឈុតខ្មែរនេះឡើយ ដោយកាលពី ២០២៥ ទាំងតារាចម្រៀង និងសម្ដែងជួរមុខដូចជា Angela Chang, Ju JingYi និង Li landi បានជ្រើសរើស ALmée បាត់ទៅហើយ។ នៅមិនទាន់អស់ឡើយតារាអាមេរិក និងបវរកញ្ញាបរទេសសុទ្ធតែចាប់ចិត្តប្រតិព័ទ្ធ៕

រូបភាព៖ ALmée Couture