អនុប្រធានអចិន្ត្រៃយ៍សមាគមសិល្បករខ្មែរ អ្នកនាង នៅ សុនិតា បាន​ចុះ MoU ជាមួយ​នឹង​មន្ទីរ​សម្រាក​ព្យាបាល រ៉ូយ៉ាល់គ្រុប វែលនេស សេនធើ ដែល​ផ្ដល់​ជូន​ការ​គាំពារ​សុខុមាលភាព​ពិសេស​ជូន​សិល្បករ​ខ្មែរ ដែល​កិច្ច​សហការ​ថ្មី​នេះ​ពង្រីក​លទ្ធភាព​ទទួល​បាន​ចំណេះដឹង​សុខភាព និង​សេវា​វេជ្ជសាស្ត្រ ព្រម​ទាំង​សុខុមាលភាព​ប្រកប​ដោយ​វិជ្ជាជីវៈ សម្រាប់​សមាជិក​សមាគម​សិល្បករ​ខ្មែរ ជាង ៧០០ នាក់។

អនុស្សរណៈ​យោគយល់​គ្នា​នេះ​រៀបចំ​ឡើង​ក្រោម​អធិបតី​ភាព​លោក​ជំទាវ​អ្នក​ឧកញ៉ា ម៉ៅ ចំណាន ប្រធាន​សមាគម​សិល្បករ​ខ្មែរ និង​ជា​អនុ​ប្រធាន​ក្រុម​ប្រឹក្សា​ភិបាល​នៃ​ក្រុមហ៊ុន រ៉ូយ៉ាល់ គ្រុប។តាមរយៈ MoU រវាង​ស្ថាប័ន​ទាំង ២ នឹង​សហការគ្នាលើការអប់រំ និង​ការ​លើក​កម្ពស់​ការ​យល់​ដឹង​សុខភាព ការ​ផ្សព្វផ្សាយ​ទៅ​កាន់​សហគមន៍ និង​ការ​សម្របសម្រួល​ឲ្យ​សិល្បករ​មាន​លទ្ធភាព​ទទួល​បាន​សេវា​ព្យាបាល ពិនិត្យ​ជំងឺ និង​ថែទាំ​មាន​តម្លៃ​សមរម្យ​។

“សិល្បករ​ដើរ​តួនាទី​យ៉ាង​សំខាន់​ក្នុង​ការ​អភិរក្ស​វប្បធម៌​កម្ពុជា និង​បំផុស​គំនិត​ដល់​សហគមន៍​របស់​យើង។ ភាព​ជា​ដៃគូ​នេះ​ត្រូវ​បាន​បង្កើត​ឡើង ដើម្បី​ជួយ​ពួកគេ​ថែរក្សាអ្វីដែលសំខាន់មួយទៀត គឺ​សុខភាព​របស់​ពួកគេ។ នេះ​ជា​ការ​លើកឡើង​របស់​អនុប្រធាន​សមាគម​សិល្បករ​ខ្មែរ និង​ជា​តារា​សម្ដែង អ្នកនាង នៅ សុនិតា។

អ្នកនាង នៅ សូនីតា តាមរយៈការធ្វើឲ្យ​ការទទួលបានសេវាសុខភាពបង្ការកាន់តែងាយស្រួល និង​ការ​គាំទ្រសមាជិកតាមរយៈ​ការ​តាមដាន​ថែទាំប្រកបដោយវិជ្ជាជីវៈ សមាគម​សង្ឃឹម​ថា​នឹង​ជួយ​សិល្បករ​ឲ្យ​យកចិត្តទុកដាក់លើសុខភាព និងសុខុមាលភាព របស់ខ្លួន និងបន្តការងាររបស់ពួកគេ​ដោយ​មានទំនុកចិត្តកាន់តែខ្ពស់។

នៅ សុនិតា អនុប្រធានអចិន្ត្រៃយ៍សមាគមសិល្បករខ្មែរ តំណាងលោកជំទាវអ្នកឧកញ៉ា ម៉ៅ ចំរើន គិត ម៉េង ប្រធាន សមាគមសិល្បករខ្មែរ បាន​បន្ថែម​ទៀត​ថាតាមរយៈកិច្ចសហការនេះ សិល្បករ សិល្ប​ការិនី និង​សមាជិកសមាគមសិល្បករខ្មែរ នឹងមានឱកាសទទួលបានការគាំទ្រ​ដូចជា៖

ទី១៖ លើកកម្ពស់ការយល់ដឹងអំពីសុខភាព និង​សុខុមាលភាព​ក្នុង​ចំណោម​សមាជិក​សមាគម​សិល្បករ​ខ្មែរ ដើម្បី​ឲ្យ​សិល្បករ​កាន់តែ​យល់​ដឹង​ពី​សារៈសំខាន់នៃការថែរក្សាសុខភាព និង​ការ​ការពារ​ជំងឺ​ជាមុន។

ទី២៖ សម្របសម្រួល​ឲ្យ​សមាជិក​សមាគម​សិល្បករ​ខ្មែរ មានលទ្ធភាពទទួលបានសេវាថែទាំសុខភាព និងសុខុមាលភាពដែលមានគុណភាព ពី Royal Group Wellness Center។

ទី៣៖ រៀបចំយុទ្ធនាការអប់រំសុខភាព សិក្ខាសាលា សន្និសីទ និង​សកម្មភាព​ផ្សេង​ៗ​ផ្នែក​សុខុមាល​ភាព ដើម្បី​ផ្ដល់​ចំណេះដឹង និង​លើក​កម្ពស់​ទម្លាប់​ល្អក្នុងការថែរក្សាសុខភាពរបស់សិល្បករ។

និងទី៤៖ សិល្បករនៃសមាគមសិល្បករខ្មែរ នឹងទទួលបានសេវាពិគ្រោះជំងឺ ពិនិត្យសុខភាព និងការព្យាបាល ជាមួយនឹងការបញ្ចុះតម្លៃយ៉ាងពិសេសប្រកបដោយស្តង់ដារអន្តរជាតិពី Royal Group Wellness Center៕