ព្រឹត្តិការណ៍ Fashion Week លំដាប់​ពិភពលោក​ឆ្នាំ​នេះ ក៏មាន​ប្រេនកម្ពុជា​ដែល​ល្បី​ខាង​សម្លៀកបំពាក់ Couture ចូលរួម​បង្ហាញ​លើ Runway ដ៏​អស្ចារ្យ ២ នោះ​គឺ New York Fashion Week និង Paris York Fashion Week។

ALmée Couture បាន​ធ្វើឲ្យ​អាមេរិក និង​អឺរ៉ុប ភ្ញាក់ផ្អើល​ពី​ភាព​ប្រណីត និង​មិន​នឹក​ស្មាន​ដល់​របស់​កម្ពុជា ដែល​ច្នៃ​ឈុត​សម្លៀកបំពាក់​យ៉ាង​អស្ចារ្យ​សម្រាប់​ស្ត្រី។ មិន​ថា​នៅ New York Fashion Week ២០២៦ និង Paris York Fashion Week ២០២៦ អ្នក​ដែល​បាន​ទៅ​ចូលរួម​មើល​ស្នាដៃ​កូន​ខ្មែរ​ច្នៃ​ឈុត​ ពិតជា​ចំហ​មាត់ពីឈុតរស់រវើក និង​ការ Detail នៅលើគ្រប់​ឈុត​​ទាំងអស់។

អ្នក​មាន​ឥទ្ធិពល​ជាច្រើន​ក្នុង​វិស័យ​ម៉ូដ មិន​ថា​ជា​អ្នក​បង្កើត​មាតិកា អ្នក​ច្នៃ​ម៉ូដ, stylist និង​ម៉ូដែល ពេល​ឃើញ​ឈុត​នីមួយ​ៗ​របស់ Almée អត់​ទ្រាំ​មិន​សរសើរ​មិន​បាន​ឡើយ ហើយ​ម្នាក់​ៗ​បើ​មើល​ទោ​លើ follower លើ​បណ្ដាញ​សង្គម​មិន​ថា Tik Tok, Instagram និង Facebook ឡើយ សុទ្ធតែ​ទទួល​បាន​ការ​ទស្សនា​រាប់​ម៉ឺន​នាក់។

ក្នុង​នោះ​ឈុត កិន្នរី ដែល​មាន​​ការ​រចនា​ដ៏​អស្ចារ្យ ជាមួយ​នឹង​លំនាំ​ដ៏​ល្អឯក​ក្នុង​ព្រេង​និទាន​ខ្មែរ ទាក់ទាញ​ភ្នែក​អ្នក​ទស្សនា​ខ្លាំង​បំផុត។ អ្នក​ដែល​បាន​ទៅ​មើល​ការ​បង្ហាញ​ម៉ូដ​ផ្ទាល់​សុទ្ធសឹង​តែ​លាន់​មាត់​ថា ALmée Couture ពិតជា​មាន​ស្នាដៃ​ដ៏​ល្អ​ឯក​ពិតប្រាកដ​មែន។ ព្រឹត្តិការណ៍​បង្ហាញ​ម៉ូដ​នៅ​ទីក្រុង​ប៉ារីស​លើកដំបូង​បង្អស់​របស់​ប្រេន​ខ្មែរ មានចំណងជើងថា “The Art Of Remembering” (សិល្បៈនៃការ​ចងចាំ)។

អ្វីដែល ALmée មិនដែលខកខាន គឺការបន្ថែមគ្រឿងតុបតែងដែលជាក្បាច់របស់ខ្មែរ ទៅលម្អ​កាយា​របស់​ម៉ូដែល គ្រង​ឈុត​ដើរ​លើ​វេទិកា​បង្ហាញ​ម៉ូដ ដើម្បី​ឲ្យ​គេឯង ព្រម​ទាំង​បរទេស​​ដទៃ​បាន​ស្គាល់​ពី​ខ្មែរ​កាន់តែ​ច្រើន ហើយ​ក៏​ជា​សារ​បញ្ជ្រាប​ថា ខ្មែរ​ជា​ជាតិសាសន៍​មាន​ភាព​ច្នៃ​ប្រតិដ្ឋ​ខ្ពស់​តាំង​ពូ​បុរាណ ដល់​បច្ចុប្បន្ន។

គួរ​បញ្ជាក់​ផង​ដែរ​ថា Fashion Week គ្របដណ្តប់លើព្រឹត្តិការណ៍សំខាន់ៗទាំងបួន (Big Four) នៃ​វិស័យ​សម្លៀកបំពាក់ ready-to-wear, men’s weeks haute couture សម្លៀកបំពាក់​អាពាហ៍ពិពាហ៍ និង​ឈុត​ហែល​ទឹក។ ព្រឹត្តិការណ៍ Fashion Week ប្រព្រឹត្តទៅពីរដងក្នុងមួយឆ្នាំ (អាច​នៅ​ខែកុម្ភៈ/មីនា និង​ខែ​កញ្ញា/តុលា) ក្នុង​ទីក្រុង​ញូវយ៉ក ឡុងដ៍ មីឡាន និង​ប៉ារីស។

ក្នុង​នោះ រួមទាំងការបង្ហាញម៉ូដពិសេស និងម៉ូដសម្រាប់បុរសផងដែរ ដោយ​ កាល​វិភាគ​បង្ហាញ​ម៉ូដ​សកល​ទាំង​មូល មានវគ្គបង្ហាញជាច្រើនដងក្នុងមួយឆ្នាំ៖

•Womenswear (Ready-to-Wear) ពីរដងក្នុងមួយឆ្នាំ (រដូវស្លឹកឈើជ្រុះ/រដូវរងា នៅខែកុម្ភៈ/មីនា និង​រដូវ​ផ្ការីក/រដូវក្តៅ នៅខែកញ្ញា/តុលា)។

• Menswear ពីរដងក្នុងមួយឆ្នាំ (រដូវស្លឹកឈើជ្រុះ/រដូវរងា នៅខែមករា និងរដូវផ្ការីក/រដូវក្តៅ នៅ​ខែ​មិថុនា) នៅតាមទីក្រុងសំខាន់ៗដូចជា ទីក្រុងមីឡាន និងទីក្រុងប៉ារីស។
• Haute Couture ពីរដងក្នុងមួយឆ្នាំ (ខែមករា និងខែកក្កដា) នៅទីក្រុងប៉ារីស។
• Specialized Events មានព្រឹត្តិការណ៍តាមរដូវកាលបន្ថែមទៀតដូចជា Bridal Fashion Week (ខែមេសា និង​ខែតុលា) និងព្រឹត្តិការណ៍បង្ហាញម៉ូដឈុតហែលទឹក ដែលធ្វើឡើងដោយឡែកពីគ្នា៕

រូបភាព៖ ALmée Couture