មុនឡើងឆាក Paris Fashion Week 2026 ពេជ្រ វត្តីសារ៉ាវឌ្ឍី និង មាលា ឆ្លៀតយកស្បៃខ្មែរនៅបង្ហាញនៅ Tour Eiffel សិន

នៅយប់ថ្ងៃ ២ ខែតុលា ឆ្នាំ ២០២៦ (ត្រូវថ្ងៃ ៣ នៅកម្ពុជា) ពេជ្រ វត្តីសារ៉ាវឌ្ឍី និង Mélia Constantin ត្រូវដើរលើឆាក Paris Fashion Week 2026 ក្នុងនាមជាម៉ូដែល បង្ហាញម៉ូដឲ្យ ALmée Couture ដែលមានឱកាសនាំយកឈុតប្រណីតរបស់ខ្មែរ ទៅព្រឹត្តិការណ៍អន្តរជាតិនោះ។ តែមុនពេលដើរម៉ូដនៅកម្មវិធី Paris Fashion Week 2026 តារាបង្ហាញម៉ូដដ៏ស្រស់ស្អាតទាំងទ្វេ ក៏បានឆ្លៀតដើរនៅម្ដុំ Tour Eiffel ដោយគ្រងឈុតស្បៃខ្មែរដ៏ស្រស់ស្អាត។

វត្តី បានគ្រងឈុតស្បៃធំពណ៌ក្រហម ឌិនអង្កាំពណ៌មាសពោរពេញដោយក្បូរក្បាច់ និងមានស្បៃភ្លីពីខាងក្នុងពណ៌ទឹកក្រូច បូករួមគ្រឿងអលង្ការបុរាណយ៉ាងស្រស់ស្អាត។ ចំណែកកូនកាត់បារាំងខ្មែរ មាលា ក៏បានយកឈុតស្បៃដូចគ្នាខុសតែពណ៌ប៉ុណ្ណោះ នាងជ្រើសពណ៌មាសយ៉ាងភ្លឺ ចិញ្ចាច បង្ហាញសម្រស់ស្រស់ត្រកាល។ ឈុតស្បៃធំខ្មែរ ដែលតារាស្រីទាំង ២ យកទៅបារាំង ទាំងប្រណីត និងសមសួនជាមួយរូបរាងស្រឡូននៃតារាម៉ូដែលទាំងគូ។

តារាស្រីវ័យ ២៧ ឆ្នាំ ពេជ្រ វត្តីសារ៉ាវឌ្ឍី និង Mélia Constantin បានថតវីដេអូដែលខ្មែរយើងកំពុង trending វកំពុងទទួលបានការគាំទ្រខ្លាំងពីសំណាក់ពលរដ្ឋខ្មែរ។ វីដេអូដែល វត្តី បង្ហោះមានអ្នកមើលរាប់សែននាក់។

បើទោះជាលំបាក ក្នុងការរៀបចំក៏ពិតមែន តែតារាម៉ូដែលទាំង ២ របស់កម្ពុជា មិនរុញរាឡើយ ក្នុងការបង្ហាញវត្តមានស្បៃខ្មែរ ដែលជាមរតកដូនតាបន្សល់ទុកតាំងពីបុរាណកាលរាប់ពាន់ឆ្នាំនោះ ឲ្យបរទេសបានឃើញ និងស្គាល់ពីសម្លៀកបំពាក់ប្រពៃណីខ្មែរ។

ស្បៃជាគ្រឿងសំគាល់ជាតិរបស់សាសន៍ខ្មែរ។ ពាក្យថា «ស្បៃ» ត្រូវបានកត់ត្រានៅក្នុងសិលាចារឹកលេខ K-713 នៅប្រាសាទព្រះគោ ដែលត្រូវបានកសាងឡើងនៅសតវត្សរ៍ទី៩ ដោយព្រះបាទឥន្ទ្រវរ្ម័នទី១ (ឆ្នាំ៨៧៧–៨៨៩)។

គួរបញ្ជាក់ផងដែរថាទាំងក្រសួងវប្បធម៌និងវិចិត្រសិល្បៈ, អ្នកសិល្បៈ និងអ្នកពាក់ព័ន្ធនានាបានកំពុងថែរក្សា និងបន្តផ្សព្វផ្សាយស្បៃខ្មែរ ឲ្យប្រជាជនក្នុងស្រុកស្គាល់ យល់ដឹងកាន់តែច្បាស់ ហើយក៏ត្រូវនាំចេញទៅបង្ហាញនៅបរទេស ដើម្បីឲ្យអន្តរជាតិឃើញផងដែរ៕