អបអរកម្ពុជា! ឆ្នាំនេះ ម៉ារ៉ាតុងអង្គរអ្នកចូលរួមដល់ទៅជាង ៦ ពាន់នាក់ មកពី ៥១ ប្រទេសផ្សេងគ្នា

ទិវារត់ប្រណាំងម៉ារ៉ាតុងអន្តរជាតិចក្រភពអង្គរ លើកទី១១ នៅកម្ពុជាបានទាក់ទាញអត្តពលិកជាង ៦ ពាន់នាក់ ចូលរួមដែលចំនួននេះមានការលើកឡើង ២៥ ភាគរយ ធៀបឆ្នាំទៅមិញ។ នេះបើតាមការជូនដំណឹងនៅលើផេកផ្លូវការក្រសួងទេសចរណ៍។

ព្រឹត្តិការណ៍ម៉ារ៉ាតុងចក្រភពអង្គរ លើកទី១១ បានសម្រេចរៀបចំធ្វើនាថ្ងៃទី ២ ខែ សីហា ឆ្នាំ ២០២៦ នៅខាងមុខប្រាសាទអង្គរវត្ត ក្នុងខេត្តសៀមរាប។ ព្រឹត្តិការណ៍រត់អន្តរជាតិនៅកម្ពុជាលើកនេះមានអត្តពលិក និងអ្នកចូលរួមរត់ប្រណាំងសរុបចំនួន ៦៥០០ នាក់ ក្នុងនោះមានអត្តពលិកខ្មែរចំនួន ៥ ៤៥០ នាក់ និងអត្តពលិកអន្តរជាតិចំនួន ១ ០៥០ នាក់ មកពី ៥១ ប្រទេស។ គួរឱ្យដឹងដែរថា ក្នុងឆ្នាំនេះប្រទេសដែលមានអត្តពលិកចូលរួមច្រើនជាងគេ រួមមាន ចិន ២០១ នាក់ , ជប៉ុន ១០០ នាក់ និងចក្រភពអង់គ្លេស ១០០ នាក់។

គួរបញ្ជាក់បន្ថែមថា ការកើនឡើងនៃចំនួនអ្នកចូលរួម ជាពិសេសអត្តពលិកអន្តរជាតិ បានឆ្លុះបញ្ចាំងពីភាពទាក់ទាញកាន់តែខ្លាំងនៃព្រឹត្តិការណ៍កីឡាអន្តរជាតិនៅតំបន់អង្គរ និងរួមចំណែកជំរុញទេសចរណ៍កីឡា (Sports Tourism) ផ្សព្វផ្សាយសក្ដានុពលទេសចរណ៍កម្ពុជា ព្រមទាំងនាំយករូបភាពនៃកម្ពុជាទៅកាន់ពិភពលោក៕