ភាពយន្តឯកសារស៊ើបអង្កេត «LOOT: ការវិលត្រឡប់មកវិញនូវរតនៈសម្បត្តិវត្ថុរបស់កម្ពុជា» ដែលលាតត្រដាងរឿងរ៉ាវប្រវត្តិសាស្ត្រដ៏សំខាន់នៃការលួចវត្ថុបុរាណខ្មែរ កំពុងដាក់បញ្ចាំងផ្លូវការនៅតាមរោងភាពយន្តនៃប្រទេសកម្ពុជា ហើយខាងក្រោមនេះជាហេតុផលសំខាន់ៗ ៥ យ៉ាងដែលប្រជាជនខ្មែរគ្រប់រូបគួរទៅទស្សនាភាពយន្តនេះ៖

១. លាតត្រដាងការពិតពីបណ្តាញឧក្រិដ្ឋកម្មរត់ពន្ធបុរាណវត្ថុខ្មែរ

ភាពយន្តនេះបានវះកាត់ និងបង្ហាញយ៉ាងលម្អិតអំពីរបៀបដែលបណ្តាញជួញដូរបុរាណវត្ថុខុសច្បាប់អន្តរជាតិ ដឹកនាំដោយលោក Douglas Latchford បានកេងប្រវ័ញ្ចលើស្ថានភាពសង្គ្រាមស៊ីវិល ដើម្បីលួចប្លន់យករូបបដិមាដ៏មានតម្លៃចេញពីប្រាសាទបុរាណខ្មែរ ដូចជានៅតំបន់កោះកេរ ជាដើម។ ការទស្សនាភាពយន្តនេះនឹងធ្វើឱ្យយើងយល់ច្បាស់ពី «ប្រវត្តិសាស្ត្រប្រឡាក់ឈាម» នៅពីក្រោយរូបចម្លាក់ដែលធ្លាប់ត្រូវគេលក់បានតម្លៃរាប់លានដុល្លារនៅលើទីផ្សារបស្ចិមប្រទេស។

២. យល់ដឹងពីតម្លៃអរូបិយនៃ «ដួងព្រលឹងដូនតា»

សម្រាប់ជនជាតិខ្មែរ រូបបដិមាបុរាណមិនមែនត្រឹមតែជា «ដុំថ្ម» ឬ «វត្ថុប្រវត្តិសាស្ត្រ» សម្រាប់ដាក់តាំងលម្អនោះទេ ប៉ុន្តែជា «ព្រះ» ឬ «ទេវតា» ដែលឆ្លងកាត់ពិធីបញ្ចុះបារមី និងជាទីសក្ការបូជារបស់សហគមន៍។ ភាពយន្តនេះបានសង្កត់ធ្ងន់លើតម្លៃផ្លូវចិត្ត និងជំនឿសាសនាដ៏ជ្រាលជ្រៅ ដោយបង្ហាញថាការទទួលបានរូបបដិមាទាំងនោះត្រឡប់មកវិញ គឺជាការជាសះស្បើយនៃស្នាមរបួសផ្លូវចិត្តរបស់ប្រជាជាតិខ្មែរទាំងមូល។

៣. ស្តាប់សាក្សីរស់ និងសាច់រឿងពិតរបស់អតីតចោរលួចប្រាសាទ

ចំណុចរំជួលចិត្តបំផុតមួយក្នុងភាពយន្ត គឺការបើកចំហរពីជីវិតពិតរបស់អតីតទាហានកុមារ និងអ្នកលួចប្រាសាទ ដូចជាលោក Toek Tik ឬ Lion ជាដើម។ ពួកគាត់បានប្រែប្រួលចិត្តគំនិតមកធ្វើជាសាក្សីរស់ ចង្អុលបង្ហាញទីតាំងដើមក្នុងប្រាសាទ និងផ្តល់ភស្តុតាងសំខាន់ៗដល់ក្រុមការងារច្បាប់ ដើម្បីជួយទាមទាររូបបដិមាត្រឡប់មកវិញ ក្នុងបំណងរំដោះបាបកម្មដែលខ្លួនបានប្រព្រឹត្តពីអតីតកាល។

៤. ស្វែងយល់ពីកិច្ចខិតខំប្រឹងប្រែង និងការតស៊ូផ្នែកច្បាប់លើឆាកអន្តរជាតិ

ក្នុងភាពយន្តដែលចំណាយពេលផលិតអស់ជាង ៣ឆ្នាំនេះទស្សនិកជននឹងបានឃើញពីកិច្ចប្រតិបត្តិការស៊ើបអង្កេតដ៏ស្មុគស្មាញរវាងក្រុមការងារក្រសួងវប្បធម៌កម្ពុជា, ក្រុមមេធាវីដឹកនាំដោយលោក Bradley J. Gordon, និងអាជ្ញាធរសហរដ្ឋអាមេរិក (HSI/SDNY)។ ការប្រើប្រាស់បច្ចេកវិទ្យាកោសល្យវិច័យ និងការស្កេន 3D ប្រៀបធៀបស្នាមបែកនៃជើងទម្រ គឺជាមេរៀន និងជាមោទនភាពមួយដែលបង្ហាញពីសមត្ថភាពរបស់កម្ពុជាក្នុងការយកឈ្នះលើស្ថាប័នធំៗលើពិភពលោក។

៥. បំផុសស្មារតីស្នេហាជាតិ និងចូលរួមការពារបេតិកភណ្ឌសម្រាប់កូនចៅជំនាន់ក្រោយ

ការទៅទស្សនាភាពយន្ត «LOOT» មិនត្រឹមតែជាការទទួលបានទស្សនីយភាពកម្សាន្តកម្រិតស្តង់ដារអន្តរជាតិប៉ុណ្ណោះទេ ប៉ុន្តែជាការចូលរួមបង្កើតចលនាសង្គមមួយក្នុងការស្រឡាញ់ ការពារ និងទាមទារយកមរតកជាតិដែលនៅសេសសល់ឱ្យវិលត្រឡប់មកវិញ។ វាជាឱកាសមាសសម្រាប់យុវជនខ្មែរក្នុងការដាស់ស្មារតី និងពង្រឹងមោទនភាពជាតិឱ្យកាន់តែរឹងមាំ។

ជាស្នាដៃផលិតរបស់ក្រុមហ៊ុនកាណាដា New Theory Pictures និងដឹកនាំរឿងដោយលោក Don Millar ដោយមានកិច្ចសហការយ៉ាងជិតស្និទ្ធជាមួយ ក្រុមការងារបច្ចេកទេស និងផលិតករខ្មែរក្នុងស្រុក ភាពយន្តនេះត្រូវបាននាំយកមកចែកចាយនៅកម្ពុជាដោយក្រុមហ៊ុន AMS (Apsara Media Services) ដោយក្នុងនោះចំណែកថវិកាដែល AMS ទទួលបានពីការលក់សំបុត្រចូលទស្សនានឹងត្រូវយកទៅចូលរួមចំណែកក្នុងការផ្សព្វផ្សាយវប្បធម៌ និងសង្គម ជាពិសេសគាំទ្រដល់ការទាមទារយក សម្បត្តិបុរាណខ្មែរ ដែលត្រូវបានលួចនាំចេញទៅបរទេស ឱ្យវិលត្រឡប់មកមាតុប្រទេសវិញ ៕