បុរសម្នាក់នៅក្នុងខេត្ត Guizhou ប្រទេសចិនបានបង្កឱ្យមានភាពចម្រូងចម្រាស បន្ទាប់ពីលោកបានរៀបចំពិធីមង្គលការ និងពិធីអបអរសាទរខួប ១០០ថ្ងៃ កូនរបស់លោកជាមួយស្ត្រីម្នាក់ទៀតដែលត្រូវបានរៀបចំឡើងនៅទីកន្លែងតែមួយកាលពីថ្ងៃទី៩ ខែតុលា។

ហេតុការណ៍នេះបានកើតឡើងនៅទីក្រុង Liupanshui ដែលបុរសរូបនេះត្រូវបានគេរាយការណ៍ថាបានប្រារព្ធពិធីអាពាហ៍ពិពាហ៍របស់គាត់ជាមួយភរិយាថ្មីថ្មោងនៅជាន់ផ្ទាល់ដី ខណៈពេលដែលចូលរួមពិធីអបអរសាទរកូនរបស់គាត់ជាមួយអតីតសង្សារនៅជាន់ខាងលើ។

រឿងរ៉ាវនេះបានទាក់ទាញចំណាប់អារម្មណ៍យ៉ាងខ្លាំងតាមប្រព័ន្ធបណ្ដាញសង្គម បន្ទាប់ពីភ្ញាក់ផ្អើលថាព្រឹត្តិការណ៍ទាំងពីរបានកើតឡើងក្នុងពេលដំណាលគ្នាដូចមាននៅក្នុងរឿងភាគ AI។ នៅថ្ងៃទី១២ ខែតុលា ម្ចាស់ទីតាំងរៀបចំពិធីជប់លៀងបានបញ្ជាក់ថាពិធីទាំងពីរត្រូវបានកក់ដោយឡែកពីគ្នាដោយគ្រួសាររៀងៗខ្លួន។

ប៉ុន្តែជម្លោះមួយនេះបានផ្ទុះឡើងរវាងគ្រួសារទាំងសងខាង ដែលជំរុញឱ្យបុគ្គលិកហៅប៉ូលិសមកជួយអន្តរាគមន៍។ មន្ត្រីប៉ូលិសបានចុះមកដល់ដើម្បីសម្រុះសម្រួលជម្លោះនេះ ដោយអនុញ្ញាតឱ្យពិធីទាំងពីរដំណើរការបន្តទៀត។ ទីកន្លែងរៀបចំពិធីបានបញ្ជាក់ថាពិធីទាំងពីរបានបញ្ចប់ដោយរលូន និងការទូទាត់ប្រាក់ទាំងអស់ក៏ត្រូវបានសងរួចរាល់។

ឧប្បត្តិហេតុនេះក៏បានលើកឡើងនូវសំណួរផងដែរថា តើបុរសរូបនេះពិតជាមានពហុពន្ធភាព (មានប្រពន្ធពីរ) ដែរឬទេ? ទោះយ៉ាងណាក៏ដោយ អាជ្ញាធរក្នុងស្រុក Zhongshan ទីក្រុង Liupanshui បានបញ្ជាក់ថាលោកបានចុះបញ្ជីអាពាហ៍ពិពាហ៍យ៉ាងស្របច្បាប់ជាមួយប្រពន្ធរបស់លោក ខណៈដែលអតីតសង្សាររបស់លោកដែលមានកូនជាមួយគ្នាគឺមិនបានរៀបការតាមផ្លូវច្បាប់ទេ។ មន្ត្រីបាននិយាយថាស្ថានភាពនេះមិនចូលរួមផ្សំក្នុងបទល្មើសទ្វេពន្ធភាពនោះទេ។

ជាមួយគ្នានេះអាជ្ញាធរក៏បានបញ្ជាក់ផងដែរថា ជម្លោះហិរញ្ញវត្ថុដែលកំពុងកើតមាននៅតែបន្តស្ថិតក្នុងចំណោមភាគីពាក់ព័ន្ធដោយមានស្ថាប័នរដ្ឋាភិបាលជាច្រើនកំពុងសម្របសម្រួលសកម្មភាពតាមដានបន្តទៀត។ មេធាវីម្នាក់បាននិយាយថាការប្រព្រឹត្តរបស់បុរសរូបនេះអាចបង្កជាបញ្ហាក្នុងដំណើរការលែងលះ ដោយបន្ថែមថាប្រពន្ធរបស់លោកអាចនឹងទាមទារសំណងប្រសិនបើនាងបន្តស្វែងរកដំណោះស្រាយផ្លូវច្បាប់ និងប្រសិនបើតម្រូវការផ្លូវច្បាប់ដែលពាក់ព័ន្ធត្រូវបានបំពេញ៕