ក្រុមសម្ដែងមកពីត្បូងឃ្មុំ ដណ្ដើមបានជយលាភីលេខ១ នៃមហោស្រព «ល្ខោននិយាយទូទាំងប្រទេស ឆ្នាំ ២០២៦»

ខ្លាំងមិនធម្មតា ម្ចាស់ស្នាដៃល្ខោននិយាយរឿង «តម្លៃនៃឈាមតែមួយ» ដែលមកពីខេត្តត្បូងឃ្មុំ មិនត្រឹមអាចសម្ដែងនៅលើឆាកប្រកបដោយទេពកោសល្យ ថែមអាចឆក់បេះដូង និងស្នាមញញឹមទស្សនិកជនដែលមកទស្សនាដោយផ្ទាល់ ពិសេសអង្រួនចិត្តគណៈ មេប្រយោគជើងចាស់ទាំង ៤ រូបឱ្យផ្ដល់ជូនពិន្ទុដោយមិនសំចៃថែមទៀត។

ដូចដែលមហាជនមួយចំនួនបានជ្រាបហើយថា ជំនាញល្ខោននិយាយ របស់ខ្មែរមិនមែននិយាយឱ្យតែបានៗ និងសម្ដែងឱ្យតែចប់ៗនោះទេ ប៉ុន្តែជំនាញសិល្បៈដែលបន្សល់តាំងពីជំនាន់ដូនតាខ្មែរមួយនេះមានក្បួនច្បាប់ត្រឹមត្រូវ និងច្បាស់លាស់ នៅក្នុងការបង្ហាញនៅលើឆាកមកកាន់ទស្សនិកជន ព្រមទាំងតម្លៃអប់រំយ៉ាងជ្រាលជ្រៅតាមរយៈការសម្ដែងនិងសាច់រឿង។

រយៈពេល ២ ថ្ងៃ នៃការរៀបចំព្រឹត្តិការណ៍ ល្ខោននិយាយ ទូទាំងប្រទេស ឆ្នាំ ២០២៦ គិតចាប់ពីថ្ងៃទី ១ ដល់ ទី២ ខែ តុលា ឆ្នាំ ២០២៦ បានបញ្ចប់ទៅយ៉ាងរលូន។ ជាមួយគ្នា កម្មវិធីក៏បានស្វែងរកឃើញម្ចាស់ជយលាភី ៣ ក្រុម ក្នុងនោះមាន៖

ម្ចាស់ជយលាភីលេខ១ បានទៅលើក្រុមមន្ទីរវប្បធម៌និងវិចិត្រសិល្បៈ មកពីខេត្តត្បូងឃ្មុំ សម្ដែងរឿង តម្លៃនៃឈាមតែមួយ
ម្ចាស់ជយលាភីលេខ២ បានទៅលើក្រុមសិល្បៈអនុវិទ្យាល័យសម្ដេចឪ មកពីខេត្តព្រះសីហនុ
ជយលាភីលេខ៣ បានទៅលើក្រុមសិល្បៈនៃមន្ទីរវប្បធម៌និងវិចិត្រសិល្បៈរាជធានីភ្នំពេញ
ចំណាត់ថ្នាក់កិត្តិយស ២ ក្រុមបានទៅលើក្រុមសិល្បអភិវឌ្ឍកុមារ និងយុវជន មកពីខេត្តកំពង់ស្ពឺ និងក្រុមរស្មីវប្បធម៌ មកពីខេត្តកែប។

ព្រឹត្តិការណ៍លើកដំបូងនៅកម្ពុជាមួយនេះ ពិតជាបានពាំនាំយកនូវសិល្បៈសម្ដែងមួយដ៏អស្ចារ្យជូនដល់យុវជនជំនាន់ក្រោយរបស់កម្ពុជាឱ្យបានចូលរួម បានឃើញ បានស្គាល់ និងជួយគ្នាបន្តមើលថែសិល្បៈបុរាណ ល្ខោននិយាយ មួយនេះកុំឱ្យបាត់បង់ មិនថាពេលនេះឬទៅខាងមុខទៀត៕