ក្រោយពីមានអ្នកគាំទ្របានប្រទះឃើញ Hanni Haerin និង Hyein ក្នុងទីក្រុង Copenhagen ប្រទេសដាណឺម៉ាក ដែលបង្កឱ្យមានការសង្ស័យពីការវិលត្រឡប់មកវិញរបស់ NewJeans ទីភ្នាក់ងារ ADOR បានបញ្ជាក់ថា ក្រុមនេះកំពុងតែផលិតចម្រៀងថ្មី។

នៅថ្ងៃទី ២៧ ខែមេសា នេះ ADOR បានបញ្ជាក់ថា វត្តមានរបស់ម្ចាស់បទ Ditto នៅលើទឹកដីប្រទេសដាណឺម៉ាក គឺជាផ្នែកមួយនៃដំណើរការ Pre-production សម្រាប់បទចម្រៀងថ្មី។​

ទីភ្នាក់ងារគ្រប់គ្រងនេះបានលើកឡើងថា សមាជិកម្នាក់ៗកំពុងរៀបចំខ្លួនសម្រាប់សកម្មភាពការងារ ផ្អែកលើស្ថានភាពផ្ទាល់ខ្លួន និងកាលវិភាគដែលសមស្របបំផុត ចំណែកឯផែនការនាពេលអនាគត ទីភ្នាក់ងារនឹងធ្វើការប្រកាសនៅពេលវេលាដែលសមស្រប​។

ទន្ទឹមគ្នានឹងការប្រទះឃើញសមាជិកក្រុម NewJeans អ្នកគាំទ្រក៏បានសង្កេតឃើញថា កាលវិភាគរបស់ស្ទូឌីយោថតសំឡេងមួយកន្លែងក្នុងទីក្រុង Copenhagen ទទួលបានការកក់ទុកក្រោមឈ្មោះ ADOR ដែលនាំឱ្យមានការសន្និដ្ឋានថា NewJeans អាចនឹងចាប់ផ្តើមថតបទចម្រៀងថ្មីរួចទៅហើយ។

គួរឱ្យដឹងថា នេះគឺជាសកម្មភាពការងារក្រោមឈ្មោះជាក្រុម NewJeans ដំបូងរបស់ក្រុម បន្ទាប់ពីជម្លោះកិច្ចសន្យាផ្ដាច់មុខរវាងសមាជិកទាំង​៥ និង ADOR ដែលបានផ្ទុះឡើងកាលពីខែវិច្ឆិកា ឆ្នាំ២០២៤។

យ៉ាងណាមិញ នេះអាចមិនមែនជាការវិលត្រឡប់មកវិញ រួមសមាជិក ៥នាក់ដូចដើមនោះទេ។ ជាក់ស្ដែង Danielle កំពុងតែជាប់គាំងនៅក្នុងជម្លោះផ្លូវច្បាប់ទាមទារសំណងជាង ៤៣.១ ប៊ីលានវ៉ុន ឬប្រមាណ ៣២លានដុល្លារអាមេរិកជាមួយ ADOR។

បន្ថែមពីនេះ នៅថ្ងៃទី ២៤ ខែមេសា ក្រុមមេធាវីមកពីក្រុមហ៊ុនច្បាប់ Kim & Chang ដែលតំណាងឱ្យ ADOR បានដាក់លិខិតលាលែងតំណែងពីបណ្ដឹងប្រឆាំងនឹង Danielle ទៅកាន់តុលាការ។ ការដកខ្លួននេះបង្កឱ្យមានការរិះគន់ ដោយតំណាងផ្លូវច្បាប់របស់ Danielle ចាត់ទុកថា វាជាយុទ្ធសាស្ត្រអូសបន្លាយពេលវេលាដែលតារាស្រីរូបនេះអាចចូលប្រឡូកក្នុងវិស័យសិល្បៈវិញ៕