តារាសម្តែងហូលីវូដ និងជាសកម្មជនមនុស្សធម៌ដ៏ល្បីល្បាញ លោកស្រី Angelina Jolie នឹងឡើងថ្លែងពីការរីកចម្រើនរបស់កម្ពុជា ខណៈត្រូវបានចាត់តាំងឱ្យធ្វើជាវាគ្មិនកិត្តិយសនៅក្នុងកិច្ចប្រជុំកំពូល ASEAN Inclusive Growth ឆ្នាំ ២០២៦ ដែលនឹងប្រព្រឹត្តទៅនៅទីក្រុងម៉ានីល នៅថ្ងៃពុធ ទី ១១ ខែវិច្ឆិកានេះ។

យោងតាមសារព័ត៌មានហ្វីលីពីន Rappler លោកស្រី Jolie នឹងចូលរួមក្នុងកិច្ចពិភាក្សាក្រុមក្រោមប្រធានបទ «ពីការចងចាំឆ្ពោះទៅកាន់ការធ្វើបាន៖ កម្ពុជា ភាពក្លាហាន និងអំណាចនៃការតស៊ូបន្ត»  រួមជាមួយផលិតករភាពយន្តខ្មែរ លោក រិទ្ធី ប៉ាន់ ដែលជាអ្នករស់រានមានជីវិតពីរបបខ្មែរក្រហម និងបានប្រើប្រាស់ទេពកោសល្យខាងភាពយន្តរបស់លោកដើម្បីបង្ហាញពីរឿងរ៉ាវរបស់ប្រជាជនកម្ពុជាជារឿយៗ។

មុនកិច្ចប្រជុំនេះ អ្នកទាំងពីរធ្លាប់បានធ្វើការជាមួយគ្នាយ៉ាងលេចធ្លោនៅក្នុងភាពយន្តរឿង «មុនដំបូងខ្មែរក្រហមសម្លាប់ប៉ារបស់ខ្ញុំ (First They Killed My Father)» ដែលផ្អែកលើសៀវភៅអក្សរសិល្ប៍ពិតរបស់លោកស្រី លឿង អ៊ឹង (Loung Ung) បោះពុម្ពផ្សាយក្នុងឆ្នាំ ២០០០។ ចាក់បញ្ចាំងផ្លូវការក្នុងឆ្នាំ២០១៧ ភាពយន្តនេះរៀបរាប់ពីសាច់រឿងរបស់កុមារី អ៊ឹង ដែលមានអាយុ ៥ ឆ្នាំនៅពេលនោះ និងត្រូវបានខ្មែរក្រហមបង្ខំឱ្យធ្វើជាទាហានកុមារ។

សេចក្តីពិពណ៌នានៃកិច្ចពិភាក្សាបានរៀបរាប់ថា៖ «រឿងរ៉ាវរបស់ពួកគេមានឫសគល់នៅក្នុងប្រទេសកម្ពុជាក៏ពិតមែន ប៉ុន្តែមេរៀននៃរឿងរ៉ាវទាំងនោះមានលក្ខណៈសកល នោះគឺការផ្លាស់ប្តូរប្រកបដោយចីរភាពត្រូវបង្កើតឡើងដោយរួមគ្នាជាមួយសហគមន៍ មិនមែនធ្វើឡើងសម្រាប់ពួកគេនោះទេ ប៉ុន្តែគឺសម្រាប់ប្រជាជនដែលជាអ្នកនៅជិតបញ្ហាបំផុត។ លើសពីប្រទេសកម្ពុជា មេរៀនទាំងនោះមានសារសំខាន់ សម្រាប់គ្រប់សេដ្ឋកិច្ចនៅក្នុងអាស៊ាន និងសម្រាប់អ្នកដែលចង់ឱ្យកំណើនសេដ្ឋកិច្ចមានលក្ខណៈបរិយាបន្ន និរន្តរភាព និងភាពធន់»។

គួរបញ្ជាក់ថា លោកស្រី Jolie បានបម្រើការជាសកម្មជនគាំទ្រសិទ្ធិមនុស្សជាយូរមកហើយ  ចាប់ផ្តើមតាំងពីឆ្នាំ ២០០០ នៅពេលដែលការទស្សនកិច្ចនៅកម្ពុជាដើម្បីថតរឿង Tomb Raider បានធ្វើឱ្យលោកស្រីបានឃើញពីការផ្លាស់ប្តូរទីលំនៅរបស់ប្រជាជននៅទូទាំងប្រទេស។ នៅក្នុងឆ្នាំ ២០០១ លោកស្រីត្រូវបានតែងតាំងជាទូតសុច្ឆន្ទៈរបស់ទីភ្នាក់ងារជនភៀសខ្លួនអង្គការសហប្រជាជាតិ UNHCR។

នៅឆ្នាំ២០០២ លោកស្រីបានទទួលចិញ្ចឹមកូនប្រុស Maddox ដែលជាជនជាតិខ្មែរហើយក្នុងឆ្នាំ ២០០៥  លោកស្រីត្រូវបានប្រគល់សញ្ជាតិខ្មែរ ដើម្បីទទួលស្គាល់ទង្វើសប្បុរសធម៌ជាច្រើនដែលលោកស្រីបានផ្តល់ឱ្យចំពោះប្រទេសកម្ពុជា។

កិច្ចប្រជុំកំពូល ASEAN Inclusive Growth Summit ឆ្នាំ ២០២៦ នឹងប្រមូលផ្ដុំមេដឹកនាំមកពីវិស័យធុរកិច្ច រដ្ឋាភិបាល សង្គមស៊ីវិល និងសប្បុរសជនជាច្រើន នៅទីក្រុងម៉ានីល ដើម្បីស្វែងរកវិធីបម្លែងភាពមិនប្រាកដប្រជាឱ្យទៅជាឱកាស និងបើកផ្លូវឱ្យរលកបន្ទាប់នៃកំណើនសេដ្ឋកិច្ចបរិយាបន្ន ៕