តារាហូលីវូដ Angelina Jolie ទៅពិនិត្យមើលរោងមហោស្រពប្រាសាទមាស និងរោងភាពយន្តបាត់ដំបង ដែលមានវ័យចំណាស់

ក្នុងដំណើរទស្សនកិច្ចមកខេត្តបាត់ដំបង នាថ្ងៃទី២ របស់តារាហូលីវូដ Angelina Jolie លោកស្រីបានអញ្ជើញចុះទៅទស្សនារោងកុនចំណាស់ ២ កន្លែងក្នុងខេត្តបាត់ដំបង រួមមាន រោងមហោស្រពប្រាសាទមាស និងរោងភាពយន្តបាត់ដំបង។

បច្ចុប្បន្ន រោងភាពយន្តចំណាស់ទាំង ២ ពុំបានដាក់ឲ្យប្រើប្រាស់នោះទេ ដ្បិតត្រូវចាត់ចូលជាសំណង់បេតិកភណ្ឌក្នុងក្រុងបាត់ដំបង ហើយស្ថិតក្រោមការគ្រប់គ្រងរបស់របស់មន្ទីរវប្បធម៌ និងវិចិត្រសិល្បៈខេត្ត។ គួរឱ្យដឹងថា រោងកុនទាំង២ នេះស្ថិតនៅលើផ្លូវលេខ២ ក្នុងក្រុងបាត់ដំបង ក្នុងចម្ងាយប្រមាណ ១០០ ម៉ែត្រពីគ្នាប៉ុណ្ណោះ។

គួរបញ្ជាក់បន្ថែមដែរថា រោងភាពយន្តទាំង ២ នេះ នៅសល់រូបរាងដើមទាំងស្រុងបើមើលពីសម្បកក្រៅ ដ្បិតត្រូវបានអភិរក្សសម្រាប់វិស័យផលិតភាពយន្តនៅកម្ពុជា ជាពិសេសជាតឹកតាងប្រវត្តិសាស្ត្រមុនរបបខ្មែរក្រហមចូលកាន់កាប់ ឆ្នាំ ១៩៧៥ ដែលមុនពេលនោះភាពយន្តខ្មែរ មានភាពល្បីល្បាញខ្លាំង ដែលគេហៅថា សម័យយុគមាស នោះឯង។

បើតាមការស្រាវជ្រាវកន្លងមក រោងភាពយន្តបាត់ដំបងអាចនឹងកកើតនាអំឡុងឆ្នាំ ១៩៦០ និង រោងភាពយន្តប្រាសាទមាសក្រុងបាត់ដំបង ដែលជារបស់អតីតចាងហ្វាងផលិតកម្មប្រាសាទមាសភាពយន្ត លោកកា ឆាយ លាង ហៅ សារ៉ាវុធ ជាបុគ្គលដ៏ល្បីល្បាញរបស់កម្ពុជា (មុនឆ្នាំ១៩៧៥)៕

រូបភាព ផ្ដល់ជូនដោយ ក្រុមព្រះសុរិយា

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។