Angelina Jolie ប្ដេជ្ញានឹងចូលរួមផ្សព្វផ្សាយទេសចរណ៍កម្ពុជា ទៅកាន់ពិភពលោក

ដំណើរមកកាន់ប្រទេសកម្ពុជាលើកនេះកំពូលតារាហូលីវូដ Angelina Jolie បានជួបជាមួយថ្នាក់ដឹកនាំតាមស្ថាប័នក្រសួង និងថ្នាក់ខេត្តជាច្រើនរូបរួចមកហើយ។ ដោយថ្មីៗនេះក្រៅពីទៅមើលវិទ្យាល័យសំឡូត ក្នុងគោលបំណងស្វែងយល់ពីការសិក្សារបស់សិស្ស និងវឌ្ឍនភាពនៃការស្នាក់នៅអន្តេវាសិកដ្ឋាន តួឯកស្រី «Maleficent» ក៏បានទៅទៅពិនិត្យមើលរោងមហោស្រពប្រាសាទមាស និងរោងភាពយន្តបាត់ដំបងផងដែរ។

បន្ទាប់ពីបានជួបពិភាក្សាការងារជាមួយថ្នាក់ដឹកនាំខេត្តបាត់ដំបង Angelina Jolie ក៏បានពិភាក្សាជាមួយលោក ហួត ហាក់ រដ្ឋមន្ត្រីក្រសួងទេសចរណ៍។ ក្នុងជំនួបនោះកំពូលតារាហូលីវូដរូបនេះ បានប្ដេជ្ញាថានឹងរួមផ្សព្វផ្សាយសក្ដានុពលទេសចរណ៍ដ៏អស្ចារ្យរបស់កម្ពុជា ទៅកាន់ពិភពលោក ស្របតាមទិសស្លោក បុគ្គលម្នាក់ៗជាអ្នកផ្សព្វផ្សាយទេសចរណ៍កម្ពុជាម្នាក់។

ក្នុងជំនួបរវាងថ្នាក់ដឹកនាំក្រសួងទេសចរណ៍ ជាមួយតារាស្រីវ័យ ៥០ ឆ្នាំធ្វើឡើងនៅខេត្តសៀមរាប។ រដ្ឋមន្ត្រីក្រសួងទេសចរណ៍ បានជួបពិភាក្សាការងារជាមួយ Angelina តារាភាពយន្តហូលីវូដដ៏ល្បីល្បាញ និងជាប្រធានមូលនិធិ MJP ដែលបានបំពេញបេសកកម្មមនុស្សធម៌នៅកម្ពុជា និងនៅតាមបណ្ដាប្រទេសជាច្រើនទៀតនៅលើពិភពលោក។

តាមរយៈខ្លឹមសារដែលបង្ហោះលើបណ្ដាញសង្គមផ្លូវការរបស់ក្រសួងទេសចរណ៍ បានឲ្យដឹងថា កិច្ចពិភាក្សានេះ បានផ្ដោតលើការពង្រឹងកិច្ចសហការក្នុងការផ្សព្វផ្សាយវិស័យទេសចរណ៍, ការការពារបេតិកភណ្ឌវប្បធម៌ និងធម្មជាតិនៅកម្ពុជា។
ទាំងភាគី Angelina Jolie និងក្រសួងទេសចរណ៍ បានផ្លាស់ប្ដូរយោបល់ពីការលើកកម្ពស់កិត្តិនាមកម្ពុជាលើឆាកអន្តរជាតិ តាមរយៈសកម្មភាពនានាដូចជាការផ្សព្វផ្សាយគោលដៅទេសចរណ៍បកម្ពុជា, សកម្មភាពការងារគាំទ្រសហគមន៍, សកម្មភាពគាំទ្រវិស័យវប្បធម៌ សិល្បៈ និងសង្គម ក៏ដូចការងារអភិរក្សធនធានធម្មជាតិ។

គួរបញ្ជាក់ថា ដោយការស្រឡាញ់ប្រទេសកម្ពុជា និងប្រជាជន Angelina Jolie បាននិងកំពុងបំពេញការងារមនុស្សធម៌ជាច្រើននៅកម្ពុជា ជាពិសេសការអភិរក្សធនធានធម្មជាតិ និងវប្បធម៌, សិល្បៈភាពយន្ត, អប់រំ, សុខាភិបាល, ការគាំទ្រដល់គម្រោងសហគមន៍ និងទេសចរណ៍ប្រកបដោយចីរភាព, ព្រមទាំងការជួយផ្សព្វផ្សាយគោលដៅទេសចរណ៍កម្ពុជា តាមរយៈខ្សែភាពយន្ត First They Killed My Father និង Tomb Raider ជាដើម។

ការស្រលាញ់របស់ Angelina Jolie មកកាន់ទឹកដីខ្មែរមិនអាចបរិយាយបានឡើយ ដោយនាងបានទទួលចិញ្ចឹមកូនប្រុសម្នាក់ដែលជាសាច់ឈាមខ្មែរ មានសញ្ជាតិខ្មែរ ថែមទាំងបានចំណាយថវិកាច្រើនសន្ធឹកទិញផ្ទះនៅបាត់ដំបង ហើយក៏នឹងមានគម្រោងមករស់នៅកម្ពុជាឆាប់ៗនេះដែរ៕

រូបភាព៖ ក្រសួងទេសចរណ៍

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត