Jungkook ជាប់ឈ្មោះ ជាគោលដៅម្នាក់ម្នាក់ក្នុងឧក្រិដ្ឋកម្មលួចទិន្នន័យផ្ទាល់ខ្លួន ពីសំណាក់ក្រុមចោរព័ត៌មានវិទ្យា (Hacker) ជនជាតិចិន ដែលមានមូលដ្ឋានក្នុងប្រទេសថៃ។

នៅថ្ងៃទី១៣ ខែឧសភា ក្រសួងយុត្តិធម៌នៃប្រទេសកូរ៉េខាងត្បូង បានឱ្យដឹងថា ជនជាតិចិនម្នាក់ដែលមានវ័យ ៤០ប្លាយ ត្រូវបានធ្វើបត្យាប័ន ឬបញ្ជូនខ្លួនពីប្រទេសថៃ មកកាន់ប្រទេសកូរ៉េខាងត្បូង កាលពីថ្ងៃទី១២ ខែឧសភាកន្លងទៅនេះ។ អាជ្ញាធរបានចោទប្រកាន់ថា បុរសរូបនេះគឺជាមេខ្លោងនៃក្រុមចោរព័ត៌មានវិទ្យា ដែលមានមូលដ្ឋាននៅទីក្រុងបាងកក ប្រទេសថៃ។

ចន្លោះពីខែសីហា ឆ្នាំ២០២៣ ដល់ខែមេសា ឆ្នាំ២០២៤ ក្រុមនេះបានលួចចូលគេហទំព័រនានា ដើម្បីលួចយកព័ត៌មានផ្ទាល់ខ្លួនរបស់ជនរងគ្រោះ យកទៅប្រើប្រាស់សម្រាប់ចូលទៅកាន់គណនីហិរញ្ញវត្ថុ និងគណនីគ្រីបតូ (Crypto) ដោយបានលួចប្រាក់សរុបជាង ៣៨ ពាន់លានវ៉ុន ឬប្រមាណ ២៥.៤ លានដុល្លារអាមេរិក។

តាមរយៈការស៊ើបអង្កេតបានរកឃើញថា Jungkook គឺជាគោលដៅម្នាក់របស់ក្រុមចោរព័ត៌មានវិទ្យានោះ។ ជាក់ស្ដែង បន្ទាប់ពីលោកបានចូលបំពេញកាតព្វកិច្ចយោធាបានមួយរយៈខ្លី មានជនខិលខូចបានបន្លំអត្តសញ្ញាណរបស់តារាប្រុសរូបនេះ ដើម្បីព្យាយាមលួចភាគហ៊ុនក្រុមហ៊ុន HYBE ដែលមានតម្លៃប្រហែល ៨.៤ ពាន់លានវ៉ុន ឬប្រមាណ ៥.៦ លានដុល្លារអាមេរិក។

យ៉ាងណាមិញ ភ្នាក់ងាររបស់លោកបានសង្ស័យលើសកម្មភាពមិនប្រក្រតីនេះ ក៏សម្រេចចាត់វិធានការបង្កកប្រតិបត្តិការភ្លាមៗ ដែលមិនបណ្ដាលឱ្យមានការខាតបង់ផ្នែកហិរញ្ញវត្ថុជាក់ស្តែងណាមួយកើតឡើងឡើយ។

បច្ចុប្បន្ន អាជ្ញាធរកូរ៉េខាងត្បូងកំពុងបន្តស៊ើបអង្កេតលើបណ្តាញហិរញ្ញវត្ថុរបស់ក្រុមចោរព័ត៌មានវិទ្យានេះ និងស្វែងរកបក្ខពួកបន្ថែមទៀតដែលពាក់ព័ន្ធនឹងប្រតិបត្តិការខាងលើ៕