BTS គ្រោងរៀបចំគម្រោងដ៏ធំមួយនៅទូទាំងទីក្រុងប៊ូសាន ក្រោមការសហការជាមួយរដ្ឋបាលក្រុងប៊ូសាន ដើម្បីអបអរសាទរខួប ១៣ ឆ្នាំនៃការបង្ហាញខ្លួនដំបូងរបស់ក្រុមនៅខែមិថុនា ខាងមុខនេះ។ នេះបើយោងតាមការប្រកាសរបស់ផលិតកម្ម Big Hit Music កាលពីថ្ងៃទី ១៨ ខែឧសភា។

ក្រោមឈ្មោះ “BTS The City Arirang – Busan” ទីក្រុងទាំងមូលនឹងប្រែក្លាយខ្លួនទៅជាទីកន្លែងកម្សាន្តមួយ ដែលផ្តល់ជូននូវបទពិសោធន៍ជាច្រើនដល់ក្រុមអ្នកគាំទ្រ ARMY ដូចជា ការដាក់ឱ្យដំណើរការរថយន្តក្រុងផ្តាច់មុខ និងការរៀបចំខ្សែទស្សនាចរណ៍នៅទូទាំងទីក្រុង។ តួយ៉ាង នឹងមានការសម្តែងដោយដ្រូនជាង ១០០០ គ្រឿង នៅឯឆ្នេរ Gwangalli Beach និងកម្មវិធី Love Song Lounge នៅឯឆ្នេរ Haeundae Beach ជាដើម។

មហោស្រពដែលធ្វើឡើងដើម្បីអ្នកគាំទ្រទាំងក្នុងស្រុក និងក្រៅស្រុកនេះ នឹងរៀបចំឡើងទន្ទឹមគ្នានឹងកម្មវិធីប្រគំតន្ត្រីរបស់ BTS ដែលគ្រោងនឹងធ្វើឡើងនៅថ្ងៃទី ១២ ដល់ថ្ងៃទី ១៣ ខែមិថុនា ក្នុងទម្រង់ជាកម្មវិធីវប្បធម៌ដ៏ធំមួយ ដែលនឹងបំពេញទីក្រុងប៊ូសានទាំងមូលទៅដោយតន្ត្រី និងសារពីក្រុមចម្រៀងមួយនេះ លើសពីបរិវេណនៃទីតាំងប្រគំតន្ត្រី។

សូមរំឭកថា កាលពីឆ្នាំ ២០២២ សមាជិកទាំង ៧ រូប ធ្លាប់បានប្រារព្ធមហោស្រព “BTS in Busan” ម្តងរួចមកហើយ។ ដូច្នេះ មហោស្រព “BTS The City Arirang – Busan” នេះ គឺជាការវិលត្រឡប់មកកាន់ទីក្រុងប៊ូសានវិញ ក្នុងរយៈពេល ៤ ឆ្នាំ ដែលនឹងនាំមកនូវអត្ថន័យកាន់តែពិសេសសម្រាប់អ្នកគាំទ្រ៕