កម្ពុជាបានក្លាយជាចំណុចចាប់អារម្មណ៍ម្តងទៀតនៅក្នុងវិស័យទេសចរណ៍អាស៊ី ដោយទទួលបានពានរង្វាន់ «គោលដៅទេសចរណ៍ ឈានមុខគេនៅអាស៊ីសម្រាប់យុវវ័យ ប្រចាំឆ្នាំ ២០២៦» Asia’s Leading Youth Travel Destination 2026 ក្នុងកម្មវិធី World Travel Awards លើកទី ៣៣។

ពានរង្វាន់នេះត្រូវបានប្រកាសនៅក្នុងកម្មវិធី World Travel Awards សម្រាប់តំបន់អាស៊ី អូសេអានី និងមហាសមុទ្រឥណ្ឌា ប្រចាំឆ្នាំ ២០២៦ ដែលបានប្រារព្ធឡើង កាលពីថ្ងៃ ២៧ ខែកញ្ញា ឆ្នាំ ២០២៦ នៅឯ CROSSROADS Maldives ស្របពេលនឹងទិវាទេសចរណ៍ពិភពលោក។

យោងតាម World Travel Awards កម្ពុជាធ្លាប់បានឈ្នះពានរង្វាន់គោលដៅទេសចរណ៍សម្រាប់យុវវ័យឈានមុខគេនៅអាស៊ីរួចមកហើយនៅឆ្នាំ ២០២២, ២០២៣, ២០២៤ និង ២០២៥។ នេះគឺជាឆ្នាំទី ៥ ហើយដែលកម្ពុជាទទួលបានពានរង្វាន់ជាគោលដៅទេសចរណ៍ឈានមុខគេនៅអាស៊ីសម្រាប់យុវវ័យ។

ពិធីប្រគល់ពានរង្វាន់ប្រចាំឆ្នាំ ២០២៦ សម្រាប់តំបន់អាស៊ី អូសេអានី និងមហាសមុទ្រឥណ្ឌា បានប្រមូលផ្តុំថ្នាក់ដឹកនាំវិស័យទេសចរណ៍មកពីជុំវិញតំបន់នៅ CROSSROADS ប្រទេសម៉ាល់ឌីវ ដោយមានការប្រគល់ពានរង្វាន់លើប្រភេទគោលដៅទេសចរណ៍ និងសេវាកម្មបដិសណ្ឋារកិច្ចជាច្រើន៕

គួរឱ្យ​ដឹង​ថា កម្មវិធី World Travel Awards ដែលត្រូវបានបង្កើតឡើងក្នុងឆ្នាំ ១៩៩៣ ទទួលស្គាល់សមិទ្ធផលនានានៅក្នុងឧស្សាហកម្មទេសចរណ៍ និងការធ្វើដំណើរជាសកល រួមទាំងគោលដៅទេសចរណ៍ អង្គការទេសចរណ៍ សណ្ឋាគារ ក្រុមហ៊ុនអាកាសចរណ៍ និងអាជីវកម្មទេសចរណ៍ផ្សេងទៀត៕

ប្រភព ៖ https://www.worldtravelawards.com/nominees/2026/asia

រូបភាព ផ្ដល់ជូនដោយ MEAS