មហោស្រពភាពយន្តខ្នាតខ្លីកម្ពុជា បើកឱកាសឱ្យយុវជនចែករំលែករឿងរ៉ាវតាមរយៈខ្សែភាពយន្ត

មហោស្រពភាពយន្តខ្នាតខ្លីកម្ពុជា បានក្លាយជាវេទិកាសម្រាប់សមិទ្ធិករវ័យក្មេងដែលចង់ប្រឡូកក្នុងវិស័យភាពយន្តដោយចាប់ផ្ដើមពីការផលិតភាពយន្តខ្លី ដើម្បីបោះជំហានឈានទៅរកភាពយន្តខ្នាតវែង។

ក្រោមរូបភាពនៃការប្រកួតប្រជែង មហោស្រពភាពយន្តខ្នាតខ្លីកម្ពុជា ដែលតែងតែរៀបចំជារៀងរាល់ ២ ឆ្នាំម្ដង មិនត្រឹមជាវេទិកាសម្រាប់ការប្រកួតផលិតភាពយន្តខ្នាតខ្លីដើម្បីយកពានរង្វាន់ និងទឹកប្រាក់ប៉ុណ្ណោះទេ។ លើសពីការប្រកួត វេទិកាថ្នាក់ជាតិមួយនេះក៏ជាថ្នាលបណ្ដុះសមិទ្ធិករវ័យក្មេងផងដែរ។

ជាក់ស្ដែង ក្នុងឆ្នាំ ២០២៦ នេះ ថ្នាលបណ្ដុះអ្នកស្រលាញ់វិស័យភាពយន្តមួយនេះបានវិលត្រឡប់មកសាជាថ្មី ហើយក៏កំពុងតែកៀរគរផលិតករវ័យក្មេងជាច្រើននាក់ ឱ្យចូលរួមជាមួយគ្នាក្នុងដំណើរដ៏វែងឆ្ងាយ ដើម្បីវិស័យភាពយន្តនៅកម្ពុជា។

តាមរយៈការលើកឡើងរបស់ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌លោក ប៉ុក បូរក្ស នៅក្នុងសន្និសិទសារព័ត៌មានមហោស្រពភាពយន្តខ្នាតខ្លីកម្ពុជា លើកទី៥ នាថ្ងៃទី ២៤ ខែ សីហា ឆ្នាំ ២០២៦ បានឱ្យដឹងថា ការចូលរួមរបស់ផលិតករកម្ពុជានាពេលនេះ មិនត្រឹមជាឱកាសនៃការបង្ហាញសមត្ថភាព ទេពកោសល្យ និងភាពប៉ិនប្រសប់តាមរយៈខ្សែភាពយន្ត តែគឺជាវេទិកាដែលអាចឆ្លុះបញ្ចាំងរឿងរ៉ាវផ្ទាល់ខ្លួន គ្រួសារ និងសង្គមជាតិផងដែរ។

គួរបញ្ជាក់ដែរថា មហោស្រពភាពយន្តខ្នាតខ្លីកម្ពុជា លើកទី៥ នេះនឹងគ្រោងរៀបចំធ្វើនៅថ្ងៃទី ៣ ដល់ទី ៦ ខែ វិច្ឆិកា ឆ្នាំ ២០២៦៕