យុវតី២ រូបនៃសមាគមកាយឫទ្ធិនារីកម្ពុជា ស្ថិតក្នុងចំណោមប្រតិភូយុវជនខ្មែរទាំង ៨ តំណាងឲ្យកម្ពុជា នៅ Asia Youth Leaders 2026

កាលពីពេលកន្លងទៅថ្មីៗប្រតិភូយុវជនកម្ពុជា ៨ រូប ដែលតំណាងឲ្យប្រទេសកម្ពុជាបានចូលរួមកម្មវិធី “Asia Youth Leaders 2026” ដោយក្នុងនោះមានយុវតីសមាគមកាយឫទ្ធិនារីកម្ពុជា ២ រូប ទី១គឺយុវតី បាន សុខស៊ីណា សមាជិកាសកម្ម នៃសមាគមកាយឫទ្ធិនារីកម្ពុជា សាខាខេត្តកំពត និងយុវតី ឃូ មរកត សមាជិកាសកម្ម នៃសមាគមកាយឫទ្ធិនារីកម្ពុជា សាខាខេត្តបាត់ដំបង។

កម្មវិធី “Asia Youth Leaders 2026” បានប្រព្រឹត្តទៅនៅខេត្តអូគីណាវ៉ា និងទីក្រុងតូក្យូ ប្រទេសជប៉ុន ចាប់ពីថ្ងៃ ២៦ ខែកក្កដា ដល់ថ្ងៃ ១ ខែសីហា ឆ្នាំ ២០២៦ ក្រោមការផ្ដួចផ្ដើមពី មូលនិធិ AEON 1% Club Foundation។ ជាមោទកភាពរបស់សមាគមកាយឫទ្ធិនារីកម្ពុជា ដែលយុវតី បាន សុខស៊ីណា ទទួលបាន ជយលាភីលេខ៣ លើការធ្វើបទបង្ហាញជាក្រុម ក្នុងចំណោមក្រុមសរុបចំនួន ១០ ក្រុម។

កម្មវិធីឆ្នាំនេះផ្ដោតលើប្រធានបទ «សន្តិភាព (Peace)» ដោយផ្ដល់ឱកាសឲ្យយុវជនមកពីបណ្ដាប្រទេសនានាក្នុងតំបន់អាស៊ី បានជួបជុំ ផ្លាស់ប្ដូរបទពិសោធន៍ ចែករំលែកទស្សនៈ និងរួមគ្នាស្វែងរកគំនិតថ្មីៗ ដើម្បីរួមចំណែកលើកកម្ពស់សន្តិភាព ការយោគយល់ និងកិច្ចសហប្រតិបត្តិការក្នុងតំបន់។

ជាមោទនភាពសម្រាប់កម្ពុជា ក្នុងការវាយតម្លៃសកម្មភាព Group Presentation ដែលជ្រើសរើសក្រុមធ្វើបទបង្ហាញឆ្នើមចំនួន ៣ ក្រុម ប្រតិភូយុវជនកម្ពុជាសុទ្ធតែមានវត្តមាននៅក្នុង ក្រុមជយលាភីទាំង ៣ និងបានរួមចំណែកយ៉ាងសកម្មក្នុងការធ្វើបទបង្ហាញប្រកបដោយភាពច្នៃប្រតិដ្ឋ ការគិតវិភាគ និងស្មារតីសហការ ដែលនាំឲ្យក្រុមទាំងអស់ទទួលបានលទ្ធផលដ៏គួរឲ្យកោតសរសើរ។

ក្នុងពេលបំពេញបេសកកម្មនៅលើទឹកដីជប៉ុន ប្រតិភូយុវជនកម្ពុជាក៏បាននាំយកនូវការសម្ដែងសិល្បៈវប្បធម៌ខ្មែរ ដើម្បីបង្ហាញពីអត្តសញ្ញាណជាតិ បេតិកភណ្ឌ វប្បធម៌ និងភាពសម្បូរបែបនៃសិល្បៈប្រពៃណីខ្មែរ ទៅកាន់យុវជនអន្តរជាតិ ដែលទទួលបានការកោតសរសើរ និងការចាប់អារម្មណ៍យ៉ាងខ្លាំង ពីសំណាក់អ្នកចូលរួមកម្មវិធី។

សមិទ្ធផលទាំងនេះបានឆ្លុះបញ្ចាំងពីសមត្ថភាព ភាពជាអ្នកដឹកនាំ ទំនុកចិត្ត និងការត្រៀមខ្លួនយ៉ាងល្អរបស់យុវជនកម្ពុជា ក្នុងការតំណាងឲ្យប្រទេសនៅលើវេទិកាអន្តរជាតិ ព្រមទាំងរួមចំណែកពង្រឹងមិត្តភាព ការយោគយល់ និងសន្តិភាពរវាងយុវជនក្នុងតំបន់អាស៊ី៕