មោទកភាពកម្ពុជា! សមាគមចុងភៅកម្ពុជាឈ្នះមេដាយលើសពី ១០ គ្រឿង ក្នុងកម្មវិធីប្រកួតចម្អិនម្ហូបអន្តរជាតិ

ថ្មីៗនេះសមាគមចុងភៅកម្ពុជា Cambodia Chefs Association ដណ្ដើមបានមេដាយរហូតដល់ទៅ ១១ គ្រឿង ក្នុងកម្មវិធីប្រកួតប្រជែងសិល្បៈចម្អិនម្ហូបអន្តរជាតិលើកទី២០ «Battle of the Chefs 2026» នៅប្រទេសម៉ាឡេស៊ី។

តាមការជូនដំណឹងនៅលើផេកផ្លូវការក្រសួងទេសចរណ៍បានឱ្យដឹងថា សមាគមចុងភៅកម្ពុជា Cambodia Chefs Association ដណ្ដើមបានមេដាយសរុប ១១ គ្រឿង ក្នុងនោះមេដាយប្រាក់ ៣ គ្រឿង និងមេដាយសំរិទ្ធ ៨ គ្រឿង ក្នុងកម្មវិធីប្រកួតប្រជែងសិល្បៈចម្អិនម្ហូបអន្តរជាតិលើកទី២០ «Battle of the Chefs 2026» ដែលរៀបចំធ្វើឡើងចាប់ពីថ្ងៃទី ២១ ដល់ ២៤ ខែ តុលា ឆ្នាំ ២០២៦ នៅទីក្រុង Penang ប្រទេសម៉ាឡេស៊ី។

នេះជាសមិទ្ធផលដែលគួរឱ្យមានមោទកភាពបំផុត ព្រោះជយលាភីលើកនេះបានបង្ហាញអំពីសមត្ថភាព ទេពកោសល្យ និងភាពច្នៃប្រតិដ្ឋរបស់ចុងភៅកម្ពុជា ជាពិសេសបានរួមចំណែកលើកកម្ពស់កិត្យានុភាពម្ហូបអាហារខ្មែរ និងផ្សព្វផ្សាយទេសចរណ៍ម្ហូបអាហាររបស់កម្ពុជាលើឆាកអន្តរជាតិ។

គួរឱ្យដឹងថា សមាគមចុងភៅកម្ពុជា (Cambodia Chefs Association – CCA) គឺជាអង្គការមិនស្វែងរកប្រាក់ចំណេញផ្លូវការមួយដែលតំណាងឱ្យអ្នកជំនាញក្នុងវិស័យវិទ្យាសាស្ត្រម្ហូបអាហារ និងចុងភៅនៅប្រទេសកម្ពុជា៕