ប្រធានសមាគមសិល្បករខ្មែរ នាំសិល្បករឈ្វេងយល់ពីឧបករណ៍ហិរញ្ញវត្ថុ និងឱកាសវិនិយោគក្នុងទីផ្សារមូលបត្រ

សិល្បករសិល្បការិនីជាច្រើនរូបត្រូវបានចូលរួមកម្មវិធីសិក្ខាសាលា និងឈ្វេងយល់ចាប់យកបំណិនជីវិតថ្មីផ្នែកហិរញ្ញវត្ថុ ដើម្បីជំរុញសេដ្ឋកិច្ច និងការពារការឆបោកនៅអគារអាជ្ញាធរសេវាហិរញ្ញវត្ថុមិនមែនធនាគារ។

កាលពីថ្ងៃ ៣ ខែសីហា ឆ្នាំ ២០២៦ សមាគមសិល្បករខ្មែរ ដឹកនាំដោយលោកជំទាវអ្នកឧកញ៉ា ម៉ៅ ចំណាន បានសហការជាមួយ និយ័តករមូលបត្រកម្ពុជា (ន.ម.ក.) រៀបចំសិក្ខាសាលាលើកដំបូងស្តីពី «ការឈ្វេងយល់ពីឧបករណ៍ហិរញ្ញវត្ថុ និងឱកាសវិនិយោគក្នុងទីផ្សារមូលបត្រ» ដោយមានសិល្បករ-សិល្បការិនី និងអ្នកសារព័ត៌មានចូលរួមកុះករប្រមាណ ១០០នាក់។ ប្រថានសមាគមសិល្បករខ្មែរ បានឲ្យដឹងថា ការដែលនាំសិល្បករមកឈ្វេងយល់ពីឧបករណ៍ហិរញ្ញវត្ថុ និងឱកាសវិនិយោគក្នុងទីផ្សារមូលបត្រ ជាការលើកកម្ពស់ការយល់ដឹង ក៏ដូចជានាំឲ្យអ្នកដែលមានអាជីពសិល្បៈ ដឹងពីយុគសម័យថ្មីនៃរបត់ពិភពលោក។

ប្រធានសមាគមសិល្បករខ្មែរ បានបញ្ជាក់ថា នេះជាការបត់បែន និងទស្សនវិស័យថ្មីសម្រាប់សិល្បករខ្មែរឲ្យដើរទាន់ទាន់សម័យកាល ដែលរបត់ពិភពលោក និងបច្ចេកវិទ្យាសកលកំពុងតែស្ថិតនៅកន្លែងណា។ នេះជាជំហានដំបូង ដោយឲ្យសិល្បករចាប់យកបំណិនជីវិតថ្មីផ្នែកហិរញ្ញវត្ថុ ដើម្បីបង្កើតប្រភពចំណូលអកម្មបន្ថែមពីលើកម្រៃបានមកពីការសម្ដែង។

មួយវិញទៀត នេះជាខែលការពារសិល្បករពីការឆបោក ព្រោះការបណ្ដុះបណ្ដាលជួយឲ្យសិល្បករយល់ដឹងពីការគ្រប់គ្រងហានិភ័យ និងការវិនិយោគត្រឹមត្រូវ ដើម្បីចៀសវាងពីការឆបោកហិរញ្ញវត្ថុផ្សេងៗពីសិល្បករ។ សិល្បករ-សិល្បការិនី នឹងប្រើប្រាស់ឥទ្ធិពល និងបណ្តាញសង្គម (Followers) របស់ខ្លួន ដើម្បីចែករំលែកចំណេះដឹងហិរញ្ញវត្ថុដ៏ត្រឹមត្រូវនេះ បន្តទៅកាន់សាធារណជន និងអ្នកគាំទ្រ។

ការទទួលបានអត្ថប្រយោជន៍ផ្ទាល់ៗរបស់សិល្បករនៅក្នុងព្រឹត្តិការណ៍នេះ សិល្បករ-សិល្បការិនីទាំងអស់ដែលបានចូលរួម ទទួលបានកញ្ចប់ប្រយោជន៍ភ្លាមៗសម្រាប់ការអនុវត្តជាក់ស្ដែង រួមមាន៖ លេខអត្តសញ្ញាណវិនិយោគិន (Investor ID) ដោយសេរី និងមិនគិតថ្លៃ, គណនីជួញដូរភាគហ៊ុន បើកជូនដោយឥតគិតថ្លៃ, ភាគហ៊ុន ៥ ភាគហ៊ុន (ក្រុមហ៊ុន Cellcard / CAM GSM) ស្មើនឹងទឹកប្រាក់ ១៥,០០០ រៀល ដើម្បីសាកល្បងទិញ-លក់ក្នុងទីផ្សារជាក់ស្តែង។

ក្នុងឱកាសនោះដែរលោក ស៊ូ សុជាតិ (អគ្គនាយក ន.ម.ក.) ក៏បានមានប្រសាសន៍សង្កត់ធ្ងន់ថា៖«សិល្បៈបង្កើតតម្លៃតាមរយៈទេពកោសល្យ និងការច្នៃប្រតិដ្ឋ ខណៈការវិនិយោគបង្កើតតម្លៃតាមរយៈចក្ខុវិស័យ។ សិល្បករ គឺជាបុគ្គលមានឥទ្ធិពលលើការគិតរបស់សាធារណជន ក្នុងការបណ្ដុះវប្បធម៌វិនិយោគនៅកម្ពុជា»៕