ទីភ្នាក់ងារនិយតកម្មមាតិកាវីដេអូខ្លីរបស់ប្រទេសចិន បានលុបចោលភាពយន្តខ្លីចំនួន ៦៨ ០០០ ចំណងជើង ដែលមាន “អត្ថន័យមិនសមរម្យ និងអាចបង្កគ្រោះថ្នាក់” ដោយក្នុងនោះជាភាពយន្ត AI ជាង ៩០ ភាគរយ។

នៅក្នុងសន្និសីទសារព័ត៌មានកាលពីថ្ងៃទី១៧ ខែកញ្ញា កន្លងទៅ លោក Wang Xiaoliang នាយកនៃ Network Audio-visual Program Management Department បានលើកឡើងថា ក្នុងរយៈពេល ៨ ខែដំបូងនៃឆ្នាំនេះ មានរឿងភាគខ្លី (Microdramas) សរុបចំនួន ៤៣០ ០០០ ដែលបានចេញផ្សាយ។

ស្របគ្នានេះ មកទល់នឹងបច្ចុប្បន្ន ទីភ្នាក់ងារនិយតកម្មមាតិកាវីដេអូខ្លីបានបញ្ជាឱ្យដកចេញនូវភាពយន្តខ្លីចំនួន ៦៨ ០០០ ចំណងជើង ក្រោមហេតុផលអត្ថន័យមិនសមរម្យ អាចបង្កគ្រោះថ្នាក់ មាតិកាដែលមិនសមស្របទៅនឹងកុមារ និងការរំលោភបំពានកម្មសិទ្ធិបញ្ញាជាដើម។ ក្នុងនោះ ភាពយន្តខ្លីដែលផលិតឡើងដោយប្រើប្រាស់បញ្ញាសិប្បនិម្មិត ឬ AI មានចំនួនជាង ៩០ ភាគរយ។

និយតករបានកត់សម្គាល់ថា ភាពយន្តខ្លីបានក្លាយជាទីពេញនិយមពីសំណាក់ទស្សនិកជន ដោយមានអ្នកចុះឈ្មោះទស្សនាមាតិកាប្រភេទនេះដល់ទៅ ៨០០ លានគណនី។ នាំឱ្យកាលពីឆ្នាំ២០២៥ កន្លងទៅ ទំហំទីផ្សារនៃភាពយន្តខ្លីមានតម្លៃលើសពី ១០០ ប៊ីលានយ៉ន់ ឬប្រមាណ ១៤.៩ ប៊ីលានដុល្លារអាមេរិក។

តួយ៉ាង កាលពីថ្ងៃទី៣១ ខែកញ្ញា Hunan TV និង Mango TV បានចេញផ្សាយភាពយន្តភាគ AI ខ្នាតវែងដំបូងបង្អស់របស់ប្រទេសចិន រឿង “ស៊ុនអ៊ូខុង វគ្គបន្ត” ឬ “Sequel to Journey to the West” ដោយទទួលបានអ្នកទស្សនាបានជិត ៣០០ លានដង ខណៈចាក់ផ្សាយទើបតែបាន ៥ ភាគក្នុងចំណោម ៣០ ភាគ។  

ជាការពិត ការមកដល់នៃបច្ចេកវិទ្យា AI បានក្លាយជាជំនួយក្នុងការបង្កើតមាតិកាថ្មីៗ ដែលជួយកាត់បន្ថយការចំណាយ និងបង្កើនប្រសិទ្ធភាពសម្រាប់អ្នកផលិត។ ដោយឡែក បច្ចេកវិទ្យានេះក៏នាំមកនូវបញ្ហាប្រឈមថ្មីៗក្នុងការគ្រប់គ្រងគុណភាពមាតិកា រួមជាមួយការការពារសិទ្ធិ និងផលប្រយោជន៍ស្របច្បាប់ផងដែរ។

ទន្ទឹមគ្នានឹងការលើកទឹកចិត្តឱ្យប្រើប្រាស់ដើម្បីបង្កើនការច្នៃប្រតិដ្ឋ ប្រទេសចិនក៏បានណែនាំឱ្យផ្ដោតទៅលើស្តង់ដារមូលដ្ឋានដូចគ្នា។ ជាក់ស្ដែង វេទិកាផ្សាយមានកាតព្វកិច្ចពង្រឹងបទប្បញ្ញត្តិស្តីពីកម្មសិទ្ធិបញ្ញានៃការប្រើប្រាស់រូបភាព និងសំឡេង ហើយភាពយន្ត AI ចាំបាច់ត្រូវដាក់ស្លាកសញ្ញាសម្គាល់បញ្ជាក់ថាជាភាពយន្ត AI ៕