ដាណែត មេក្រុមរាំ OMG កំពុងវិវឌ្ឍន៍ខ្លួនទៅជាមេក្រុមហ៊ុន Agency

ក្រុមរាំ OMG ដ៏ល្បីដែលមានបទពិសោធន៍ជាង ១០ ឆ្នាំ និងធ្លាប់តំណាងឲ្យកម្ពុជាចេញទៅប្រកួតនៅក្រៅប្រទេស ហើយទទួលបានជោគជ័យថែមទៀតផង កំពុងតែបោះជំហ៊ានថ្មីលើវិស័យសិល្បៈដដែល តែជាជំនាញដ៏ល្អ។ ដោយមិនចង់ទុកចោលបទពិសោធន៍ដែលសន្សំបានពីយូរហើយ ត្រូវទុកចោលឡើយ ដូចនេះត្រូវចែករំលែកចំណេះដឹងដែលខ្លួនមាន ទៅកាន់អ្នកជំនាន់ក្រោយ។

ដោយ ដាណែត បានបើកសម្ពោធ OMG Talentcy ដែលជាក្រុមហ៊ុនគ្រប់គ្រងសិល្បករ។ ពេលនេះ OMG Talentcy កំពុងតែស្វែងរក OMG ជំនាន់ថ្មី ដោយមានបើកឲ្យមាន Audition។ រយៈពេល ១៥ ឆ្នាំនៃការប្រឡូកវិស័យសិល្បៈរាំ និងការគ្រប់គ្រងសិល្បករ ដាណែត មើលឃើញថា ខ្លួនមានក្រុមការងារសុទ្ធសឹងមានបទពិសោធន៍ ទើបសម្រេចបង្កើត Agency ទៅ។

ទាំងខ្លួន និងក្រុមការងារចង់រួមគ្នា បង្កើត Agency ដើម្បីបណ្ដុះបណ្ដាលឲ្យអ្នកមានសមត្ថភាព ព្រោះអ្នករាល់គ្នាជាពេជ្រមិនទាន់ច្នៃ។ ដូចនេះហើយទើបចង់ប្រមែប្រមូលអ្នកមានចំណេះដឹង ដើម្បីដុសខាត់ជួយដល់អ្នកជំនាន់ក្រោយ ឲ្យស្វែងរកបានភាពជោគជ័យ។ OMG Talentcy បើកទូលាយ គ្រប់ភេទមិនថាបុរស នារី និង LGBT ឡើយ ឲ្យតែមានសមត្ថភាព គឺអាចដាក់ពាក្យចូលរួមក្នុងក្រុមបាន។

OMG Talentcy មិនមែនសំដៅលើតែការរាំច្រៀងឡើយ ដោយ ដាណែត បន្ថែមថាឲ្យតែជាសមត្ថភាពសិល្បៈ គឺអាចមានឱកាសបានចូលរួមក្រុមហើយ។ មួយវិញទៀត នាងចង់រុញវិស័យសិល្បៈឲ្យឈានដល់អន្តរជាតិ មានការទទួលស្គាល់ច្រើន។ ដ្បិតថាបើកសម្ពោធកាលពីថ្ងៃ ១៥ ខែកក្កដា ឆ្នាំ ២០២៦ នេះក៏ពិតមែនតែ OMG Talentcy មាន Talent ខ្លះៗហើយក្នុងក្រុមហ៊ុន។

គួរបញ្ជាក់ថា ដាណែត និង OMG Talentcy ទទួលបានការសហការជាមួយផលិតផលជាច្រើនមកហើយ។ មិនតែប៉ុណ្ណោះ នាងកំពុងសហការជាមួយ Kve entertainment ដែលជាផលិតកម្មកូរ៉េ បើក សាលាបណ្ដុះបណ្ដាលវិស័យ K-Pop នៅកម្ពុជា។

មេក្រុមរាំ OMG បញ្ជាក់ថា នាងដល់វ័យដែលត្រូវសាងគ្រួសារហើយ ដូចនេះចង់ផ្ទេរចំណេះទៅអ្នកជំនាន់ក្រោយហើយ។ តែបើទោះជាមានគ្រួសារ អ្នករាំអាជីពរូបនេះ មិនបោះបង់ជំនាញ ឬឱកាសណាមួយឡើយ បើអតិថិជននៅតែគាំទ្រនាង៕

រូបភាព៖ Lee Xing, Danet

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត