Donghae សមាជិកក្រុមចម្រៀងខេប៉ុបល្បីឈ្មោះ Super Junior បានបង្ហោះ Story ជាបន្តបន្ទាប់អំពីការជាប់ចិត្តនឹងប្រទេសកម្ពុជា បន្ទាប់ពីបានមកសម្ដែងជាលើកដំបូងយ៉ាងកក្រើកកាលពីចុងសប្ដាហ៍កន្លងទៅ។

កាលពីថ្ងៃទី១ ខែសីហា តារាចម្រៀងខេប៉ុប ៣ រូបពីផលិតកម្ម SM Entertainment រួមមានសមាជិកក្រុម Super Junior គឺ  Donghae និង Eunhyuk ព្រមទាំងសមាជិកក្រុម EXO មួយរូបគឺ Suho បានធ្វើដំណើរមកសម្ដែងនៅចំពោះមុខហ្វេនៗកម្ពុជាផ្ទាល់តាមរយៈកម្មវិធីប្រគំតន្ត្រី GANZBERG Super Idol 2026 My Love។ ការប្រគំតន្ត្រីទាំងមូលបានទទួលការគាំទ្រ និងស្វាគមន៍យ៉ាងកក់ក្ដៅពីសំណាក់ទស្សនិកជនរាប់ម៉ឺននាក់ បើទោះជាមានភ្លៀងធ្លាក់ខ្លះក៏ដោយ។

ខណៈដែលនៅថ្ងៃសម្ដែងទាំង Suho និង Super Junior D&E សុទ្ធតែបានបង្ហោះរូបភាពរបស់ពួកគេលើគណនីផ្លូវការរបស់ក្រុមអំពីវត្តមានរបស់ពួកគេក្នុងកម្មវិធីនេះ តែបន្ទាប់ពីបានចាកចេញពីប្រទេសកម្ពុជាហើយ ក៏តារាចម្រៀងកូរ៉េទាំង ៣ រូបបានបង្ហោះអំពីប្រទេសកម្ពុជាតាមរយៈគណនីអ៊ិនស្តាក្រាមរបស់ខ្លួនដែរ។ ជាពិសេស Donghae បានបង្ហោះ Story ជាច្រើនបង្ហាញពីក្ដីស្រលាញ់ និងពាក្យសរសើរចំពោះកម្ពុជាជាហូរហែដូចជា “Pizza នៅកម្ពុជាឆ្ងាញ់ណាស់”, “បន្ទប់ហាត់ប្រាណនៅកម្ពុជាល្អណាស់” , “ទឹកការ៉ុតនៅកម្ពុជាឆ្ងាញ់ណាស់”, “ប្រជាជននៅកម្ពុជាចិត្តល្អណាស់”។

ក្នុង Story ចុងក្រោយ តារាវ័យ ៣៩ឆ្នាំបានបង្ហោះវីដេអូខ្លីនៅលើឆាកសម្ដែងព្រមទាំងសរសេរ Caption ដ៏រំភើបថា៖ “នេះជាលើកដំបូងបំផុតដែលខ្ញុំបានមកលេងប្រទេសកម្ពុជា ហើយខ្ញុំពិតជាទទួលបានពេលវេលាដ៏អស្ចារ្យ”។ ចំណែក Suho ក៏បានបង្ហោះ Story លាអ្នកគាំទ្រកម្ពុជាផងដែរដោយបានសរសេរថា៖ “See you again Cambodia”។

តាមរយៈការបង្ហោះសារនៅលើបណ្តាញសង្គមផ្ទាល់ខ្លួន សិល្បករទាំងបីបានបង្ហាញពីចំណាប់អារម្មណ៍យ៉ាងខ្លាំងចំពោះភាពអស្ចារ្យនៃម្ហូបអាហារ បរិយាកាស និងភាពកក់ក្តៅរបស់ប្រជាជនកម្ពុជា។ សារសរសើរទាំងនេះមិនត្រឹមតែបានបញ្ជាក់ពីបទពិសោធន៍ដ៏ល្អរបស់ពួកគេប៉ុណ្ណោះទេ ប៉ុន្តែក៏ជួយទាក់ទាញចំណាប់អារម្មណ៍ភ្ញៀវទេសចរអន្តរជាតិ និងអ្នកគាំទ្រទូទាំងពិភពលោក ឱ្យងាកមកស្គាល់ និងចង់មកទស្សនាកម្ពុជាកាន់តែច្រើនឡើងថែមទៀតផងដែរ ៕