ច្រកផ្លូវតូចៗនៅតំបន់អូរឫស្សីទាក់ទាញទេសចរទាំងខ្មែរ-បរទេសសម្រាប់អាហារក្នុងស្រុក

អគារ និងប្រលោះផ្លូវតូចៗច្រើនខ្វែងខ្វាត់បានបង្កើតបានជាសហគមន៍កណ្ដាលទីក្រុងដែលគេតែងហៅតៗគ្នាថា ឌឿងហែមអូរឫស្សី បានក្លាយជាតំបន់មួយដ៏ទាក់ទាញដែលមានអាហារក្នុងស្រុកដ៏សម្បូរបែប និងពេញនិយមត្រូវចិត្តទេសចរខ្មែរ និងបរទេស។

ឌឿងហែមអូរឫស្សី ឬច្រកតូចៗនៅតំបន់អូរឫស្សីមានច្រើនកន្លែង ប៉ុន្តែតំបន់ដែលល្បីជាងគេមានទីតាំងស្ថិតនៅខណ្ឌ ៧មករា ជុំវិញផ្សារអូរឫស្សីតាមបណ្ដោយផ្លូវលេខ ១៦៤ (សង្កាត់អូរឫស្សីទី៣) និងផ្លូវលេខ ១៣៩ ។ ប្រសិនបើអ្នកធ្វើដំណើរចូលតាមផ្លូវលំតូចៗ ក្នុងតំបន់មួយនេះអ្នកប្រាកដជាបានឃើញទិដ្ឋភាពនៃការរស់នៅប្រមូលផ្ដុំរបស់ក្រុមមនុស្សចម្រុះជាតិសាសន៍ដែលមានដូចជាខ្មែរ ចិន និងវៀតណាម ដែលការរស់នៅរបស់ពួកគាត់មិនមែនទើបតែមានក្នុងពេលបច្ចុប្បន្ននោះទេ ប៉ុន្តែកើតមានតាំងពីឆ្នាំ ១៩៦៦ មកម្លេះ។

ច្រកតូចៗក្នុងតំបន់អូរឫស្សី មានអាហារចម្រុះច្រើនមុខ ដែលសុទ្ធសឹងជាអាហារប្រពៃណីរបស់ជនជាតិខ្មែរ ចិន និងវៀតណាម ដែលមានដូចជា៖ នំបញ្ចុក បាយស្រូប លតឆា នំគ្រក់ ចេកអាំង នំពុម្ព ត្រប៉ែ បាញ់ស្រ៊ុង លតស៊ុប ឆាខ្វៃ កាហ្វេ តែ និងអាហារចម្រុះជាតិសាសន៍ជាច្រើនមុខបន្ថែមទៀត។ ជាមួយភាពទាក់ទាញនៃតំបន់មួយនេះក្រុមការងារ Dueng Hem Aura បានរៀបចំកម្មវិធីទេសចរចុងភៅ ឬ Food Tour ដែលមានការចូលរួមពីសំណាក់ចុងភៅជំនាញទាំងខ្មែរនិងបរទេសក្នុងការដើរទស្សនាច្រកតូចៗក្នុងតំបន់អូរឫស្សី និងបានភ្លក់រសជាតិនៃអាហារចម្រុះមុខនៅទីនោះថែមទៀតផង។

ភាពចំណាស់នៃតំបន់មួយនេះបានទាក់ទាញ-ទាក់ចិត្តទេសចរក្នុងស្រុក និងអន្តរជាតិឱ្យចង់មកភ្លក់អាហារ ថែមបានទស្សនាអគារសហកម្មសិទ្ធិដែលមានអាយុកាលជាង ៦០ ឆ្នាំ អមដោយផ្លូវតូចៗខ្វែងខ្វាត់ដ៏គួរឱ្យចាប់អារម្មណ៍៕