ម្សិលមិញនេះ តារាចម្រៀង អៀង វុត្ថា បានត្រៀមកន្លែងសម្រាកព្រមទាំងបាយទឹកជូនដល់ កុយ អេនណា ក្រោយទទួលបានដំណឹងថាកញ្ញានឹងដើរឆ្លងកាត់ផ្ទះរបស់លោក ដែលស្ថិតលើបណ្ដោយផ្លូវជាតិលេខ ៦ អា ក្នុងដំណើរថ្មើរជើងឆ្ពោះទៅកាន់ខេត្តសៀមរាប។
ការទន្ទឹងរង់ចាំរបស់តារាប្រុសរូបនេះពិតជាមិនខកបំណងពិតមែនដោយកញ្ញា កុយ អេនណា បានសម្រេចសំចតនៅផ្ទះរបស់លោកមួយយប់ មុនបន្តដំណើរនៅថ្ងៃបន្ទាប់។ មិនត្រឹមរៀបចំទីស្នាក់ប៉ុណ្ណោះទេ ទាំង អៀង វុត្ថា និងបងប្អូនសាច់ញាតិ បានរៀបចំចម្អិនអាហារច្រើនមុខ ដើម្បីជាការលើកទឹកចិត្តក៏ដូចជាថ្លែងអំណរគុណដល់ការលះបង់របស់បវរកញ្ញាកម្ពុជារូបនេះ ដែលបានបង្កើតបេសកកម្មថ្មើរជើង ដើម្បីស្វែងរកជំនួយជួយដល់កុមារ និងជនពិការភាពនៅតាមមណ្ឌលដែលខ្វះខាតនៅកម្ពុជា។
ក្រៅអំពីការទទួលស្វាគមន៍យ៉ាងកក់ក្ដៅពីសំណាក់បេក្ខភាព Cambodian Idol រដូវកាលទី៣ រូបនេះកញ្ញា កុយ អេនណា ក៏ទទួលបានការការពារពីសំណាក់មេប៉ុស្តិ៍ឃុំ ត្រពាំងគរ និងមានការចូលរួមជាទឹកប្រាក់ របស់ហូបចុកបន្តិចបន្តួចជាហូរហែពីសំណាក់ប្រជាពលរដ្ឋនៅតាមផ្លូវមិនដាច់។
លុះព្រឹកថ្ងៃនេះ អៀង វុត្ថា ក៏បានជូនដំណើរ កុយ អេនណា និងបានណែនាំកន្លែងទទួលទានអាហារពេលព្រឹក ដើម្បីបន្តដំណើរទៅមុខ។ គិតត្រឹមរសៀលថ្ងៃនេះ កុយ អេនណា បានបន្តដំណើរថ្មើរជើងរបស់ខ្លួនដល់ស្រុកតាំងគោក នៃទឹកដីខេត្តកំពង់ធំហើយ៕
ចុចទីនេះដើម្បីទស្សនា វីដេអូ ៖ https://www.facebook.com/eangvutha.official/videos/24859741416991436
វីដេអូទី២៖ https://www.facebook.com/reel/1431505388145597
រូបភាព ៖ Koy Anna & Eang Vutha
