ហ្វីយ៉ាតា ចេញមុខព្រលះតារាថៃដែលធ្វើទង្វើប្រមាថមកលើកម្ពុជាទាំង ២ លើក

ក្រោយចេញមុខព្រលះតារាស្រីថៃល្បីឈ្មោះ ៣ រូបដែលធ្វើត្រាប់ផ្សែងពុល លើកនេះ ហ្វីយ៉ាតា បាន ទម្លាយរឿងរ៉ាវកាល ១០ ឆ្នាំមុនដោយតារាស្រីថៃម្នាក់បានតុបតែងកាយបីដូចជាបិសាចក្នុងតំណែងជាបវរកញ្ញាកម្ពុជាចូលរួមកម្មវិធីខួបកំណើតដែលមានសុទ្ធតែតារាល្បីៗនៅក្នុងស្រុកថៃ។

ការលេងសើចជ្រុលនិយមរបស់ក្រុមតារាស្រីមួយចំនួននៅក្នុងប្រទេសថៃមកលើកម្ពុជាត្រូវបានចាត់ទុកជាទង្វើដ៏សែនថោកទាបនិងអសីលធម៌បំផុត។ រម្លឹកទៅកាន់រឿងរ៉ាវកាល ១០ ឆ្នាំមុន បេក្ខភាព Miss Universe Cambodia 2025 ថៃ នារីសុជាតា ហៅ ហ្វីយ៉ាតា បានទម្លាយប្រាប់មហាជនឱ្យបានដឹងកាន់តែស៊ីជម្រៅពីអត្តចរិតរបស់តារាល្បីៗដែលមានតែសម្រស់មួយចំនួននៅក្នុងប្រទេសថៃ។

ជាក់ស្ដែងកាលឆ្នាំ ២០១៥ នៅក្នុងពិធីជួបជុំខួបកំណើតដែលមានសុទ្ធតែតារាល្បីៗជួរមុខលំដាប់ប្រទេសចូលរួមដោយពួកគេតម្រូវស្លៀកពាក់ និងតុបតែងជាបវរកញ្ញាមកពីជុំវិញពិភពលោក។ បណ្ដាអ្នកចូលរួមសុទ្ធតែបានតុបតែងជាបវរកញ្ញាតំណាងឱ្យប្រទេសនិមួយៗ ចម្លែកអីតែតារាស្រីល្បីឈ្មោះម្នាក់បានតុបតែងជាបវរកញ្ញាកម្ពុជាដោយផាត់មុខដូចបិសាច និងបានយកមកចំអកនិងលេងសើចហើយប្រាប់ថានេះហើយជាមុខមាត់បវរកញ្ញាកម្ពុជា។ ការលេងសើចក្នុងន័យប្រមាថមើលងាយរបស់តារាស្រីរូបនេះបានធ្វើឱ្យ ហ្វីយ៉ាតា ចេញមុខតតាំងនិងដាក់ផាំងៗរហូតតារារូបនោះចេញមុខសុំទោសជាសាធារណចំពោះទង្វើរបស់ខ្លួនមកលើកម្ពុជា។

រហូតមកទល់ឆ្នាំ ២០២៥ ក្នុងពេលថ្មីៗ ហ្វីយ៉ាតា បានចេញមុខម្ដងទៀតក្រោយឃើញតារាស្រីថៃល្បីឈ្មោះ ២ រូប ANNE THONGPRASOM និង LING LING KWONG រួមទាំងមិត្តរបស់ពួកគេម្នាក់ទៀតបាននាំគ្នាធ្វើត្រាប់ផ្សែងពុលដោយមានទាំងការលែងសើចផងដែរ។ ក្រោយឃើញសកម្មភាពបែបនេះ ហ្វីយ៉ាតា បានចេញវីដេអូព្រលះតារាស្រីទាំង ២ ដោយបានលើកឡើងពីចំណុចមិនសមរម្យចំពោះសកម្មភាពរបស់ពួកគេព្រោះថានេះជាទង្វើប្រមាថមើលងាយយ៉ាងខ្លាំងមកលើប្រទេសកម្ពុជានិងអាយុជីវិតរបស់ប្រជាជនខ្មែរ។

គួរបញ្ជាក់ឱ្យដឹងថាកាលថ្ងៃទី ៣១ កក្កដា ២០២៥ តារាស្រី ANNE THONGPRASOM និង LING LING KWONG នាំគ្នាបង្ហោះវីដេអូពុលផ្សែងក្នុងន័យលេងសើចនៅក្នុងហាងអាហារទំនើបមួយកន្លែង។ ខណៈថ្ងៃទី ២៨ កក្កដា ២០២៦ ម៉ោងប្រមាណជា ៦ ល្ងាចកងទ័ពថៃបានបានបាញ់ផ្សែងពុលមកលើប្រទេសកម្ពុជា៕

វីដេអូទី១ ៖ https://www.facebook.com/100071070442358/videos/684325467953247

វីដេអូទី២ ៖ https://www.facebook.com/61564819002586/videos/1523835931918401

រូបភាព ៖ Fiyata – ហ្វីយ៉ាតា

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។