តាមរយៈមូលនិធិរបស់នាង Angelina Jolie បានជួយការពារព្រៃឈើទំហំ ១៥០ ៧២០ ហិចតា (acres) នៅ​ក្នុង​ប្រទេស​កម្ពុជា។ នេះ​ជា​ចំណងជើង​ព័ត៌មាន​អន្តរជាតិ​ជាច្រើន​បាន​ចុះផ្សាយ​ពី​រឿង​នេះ។

នៅ​ក្នុង​សារព័ត៌មាន India times news​ បាន​បរិយាយ​ថា ក្នុង​ឆ្នាំ ២០២៥ ក្រុម​មន្ត្រី​ឧទ្យានុរក្ស​បាន​ដោះ​យក​អន្ទាក់​លួស​ដែល​មាន​ប្រវែង​សរុប ៧ ៨០០ ម៉ែត្រ (ប្រហែល ៤,៨ ម៉ាយ) ចេញពីព្រៃ។ សកម្មភាព​នេះ​ជួយ​គាំទ្រ​ដល់​អ្នក ចិញ្ចឹម ឃ្មុំ​ក្នុង​តំបន់ គម្រោង​ដាំ​ព្រៃឈើ​ឡើង​វិញ និង​ការ​អភិរក្ស​សត្វ​ព្រៃ​ផង​ដែរ។

នៅ​ក្នុង​ព្រៃ​ស្រុក​សំឡូត មាន​ការកត់ត្រាទុក​ប្រភេទសត្វចំនួន ៤៤ ប្រភេទ រួមទាំងដំរីអាស៊ី និង​សត្វ​ពង្រូល​ផង​ដែរ។ មូលនិធិ​របស់ Angelina Jolie បានចំណាយពេល ២០ ឆ្នាំ ដើម្បី​ការពារ​ព្រៃឈើ​នៅ​កម្ពុជា​ ព្រម​ទាំង​មន្ត្រី​ឧទ្យានុរក្ស​បាន​ជួយ​សង្គ្រោះ​សត្វជិត ១៤២ ប្រភេទ​ឲ្យ​រួច​ផុត​ពី​អន្ទាក់​ខ្សែ​លួស។

ការងារ​អភិរក្ស​របស់ Angelina Jolie នៅ​កម្ពុជា​ផ្ដល់​រឿងរ៉ាវ​លើស​ពី​ហូលីវូដ។ មូលនិធិ​​ដែល​នាង​បាន​បង្កើត​ឡើង​ក្នុងឆ្នាំ ២០០៣ ដោយ​ចំណាយ​ពេល​ជាង​២ ទសវត្សរ៍​ធ្វើ​ការ​ជាមួយ​សហគមន៍​ក្នុង​តំបន់ ដើម្បីការពារព្រៃឈើ គាំទ្រ​គ្រួសារ​ជនបទ និងការពារសត្វព្រៃដែលរងការគំរាមកំហែង។

តើ​មូលនិធិ Angelina Jolie ចាប់ផ្តើមនៅក្នុងប្រទេសកម្ពុជា ដោយរបៀបណា? Angelina Jolie បាន​មក​ប្រទេស​កម្ពុជា​លើក​ដំបូង​នៅ​ឆ្នាំ ២០០០ ក្នុងអំឡុងពេលថតខ្សែភាពយន្តរឿង «Lara Croft: Tomb Raider»។

ក្រោយមក នាង​បាន​ត្រឡប់​មក​ប្រទេស​នេះ​វិញ​ម្ដង​ទៀត តាមរយៈ​ការងារ​របស់​នាង​ជាមួយ​ទីភ្នាក់ងារ​អង្គការ​សហប្រជាជាតិ ទទួលបន្ទុកជនភៀសខ្លួន ហើយ​តួឯកស្រី​រឿង «Maleficent»ក៏ បាន​ទទួល​យក​ក្មេង​ប្រុសម្នាក់ឈ្មោះ Maddox ដែលកើតនៅទីនោះ មកធ្វើជាកូនចិញ្ចឹម។ នៅឆ្នាំ ២០០៣ នាងបានបង្កើតអង្គការមួយដែល ក្រោយមកបានក្លាយជា «មូលនិធិ Maddox Jolie-Pitt» (Maddox Jolie-Pitt Foundation) ហើយបច្ចុប្បន្នត្រូវបានគេស្គាល់ជាទូទៅថា «មូលនិធិ Maddox» (Maddox Foundation)។

សកម្មភាព​ដំបូង​របស់​មូលនិធិ​នេះ គឺ​ផ្ដោត​លើ​ការ​បោសសម្អាត​មីន​នៅ​ក្នុង​សហគមន៍​ជនបទ​ដែល​រង​ផលប៉ះពាល់​ដោយជម្លោះនៅក្នុងប្រទេសកម្ពុជា។ ៣ ឆ្នាំក្រោយមក អង្គការ​នេះ​បាន​ពង្រីក​វិសាលភាព​ការងារ​របស់​ខ្លួន​ទៅ​លើ​ការ​ការពារ​បរិស្ថាន ដោយ​ទទួល​ខុសត្រូវ​លើ​ការ​ជួយ​ការពារ​ព្រៃឈើ​នៅ​តំបន់​សំឡូត។

សកម្មភាព​ការងារ​របស់​អង្គការ​នេះ​បាន​រីកចម្រើន​ជា​បន្តបន្ទាប់ ដោយ​គ្របដណ្ដប់​លើ​វិស័យ​សុខាភិបាល ការអប់រំ ជីវភាព​រស់នៅ​ប្រកប​ដោយ​និរន្តរភាព និង​ការ​អភិរក្ស​ព្រៃឈើ។ វិធីសាស្ត្រ​ការងារ​របស់​អង្គការ​នេះ គឺ​ដាក់​សហគមន៍​កម្ពុជា​ជា​ចំណុច​ស្នូល នៃ​កិច្ច​ខិតខំ​ប្រឹងប្រែង​ទាំង​នេះ ជា​ជាង​ចាត់​ទុក​ការ​ការពារ​សត្វព្រៃ​ថា​ជា​គម្រោង​ដាច់​ដោយ​ឡែក​មួយ ដែល​មិន​ពាក់ព័ន្ធ​នឹង​តម្រូវ​ការ​របស់​ប្រជាជន​ដែល​រស់នៅ​ក្បែរ​តំបន់​នោះ៕