ផ្អែកតាមការចុះផ្សាយរបស់សារព័ត៌មាន Sport Chosun នៅថ្ងៃទី៣ ខែឧសភា នេះ G-dragon បានជូនកាដូជាអាផាតមិនដល់បុគ្គលិកដែលធ្វើការជាមួយលោកអស់ពេលជិត ២០ឆ្នាំ ខណៈតារាខេប៉ុបរូបនេះក៏បាន​បង្កើតមូលនិធិមួយដើម្បីលើកកម្ពស់គុណភាពបរិកាសការងារក្នុងវិស័យកម្សាន្តផងដែរ។

កាដូនៅគ្រានេះ G-Dragon បានធ្វើឡើងដើម្បីរៀបចំកន្លែងស្នាក់នៅដល់បុគ្គលិក “Team GD” ដែលបានរួមសុខរួមទុក្ខជាមួយលោកអស់ពេលជិត ២០ឆ្នាំ ដើម្បីកាត់បន្ថយបន្ទុកលើកន្លែងស្នាក់នៅ និងដើម្បីបង្កើនគុណភាពបរិយាកាសការងារផងដែរ។

ប្រភពដដែលបានឱ្យដឹងបន្ថែមថា ថ្មីៗនេះ តារាប្រុសវ័យ ៣៧ឆ្នាំ ក៏បានចំណាយប្រាក់ផ្ទាល់ខ្លួនចំនួន ៣០០លានវ៉ុន ឬប្រមាណ ២០ម៉ឺនដុល្លារអាមេរិក ដើម្បីបង្កើតមូលនិធិមួយក្រោមឈ្មោះថា “JUSPEACE” ក្នុងគោលបំណងការពារសិទ្ធិរបស់តារាហ្វឹកហាត់ ឬ Trainee និងកែលម្អលក្ខខណ្ឌការងារសម្រាប់បុគ្គលិកក្នុងវិស័យកម្សាន្ត។

គំនិតផ្ដួចផ្ដើមបង្កើតមូលនិធិនេះ ចាប់ផ្ដើមឡើងដើម្បីធ្វើឱ្យបរិយាកាសការងារក្នុងវិស័យនេះមានភាពប្រសើរជាងមុន ទន្ទឹមគ្នានឹងការបង្កើតភាពយុត្តិធម៌សម្រាប់អ្នកធ្វើការជា Creator និងអ្នកជំនាញពីក្រោយឆាកផ្សេងទៀតផងដែរ។

ផ្អែកតាមសកម្មភាពខាងលើនេះ G-Dragon ទទួលបានការកោតសរសើរថាជា សិល្បករគំរូដ៏កម្រមួយដែលគិតគូរ និងមានទទួលខុសត្រូវលើស្ថិរភាពរបស់បុគ្គលិក ឬអ្នកធ្វើការនៅក្បែរខ្លួន ខណៈទស្សនៈវិស័យនេះនឹងជះផលល្អនៅក្នុងរយៈពេលវែង៕