ចាប់តាំងពីការបញ្ចប់កាតព្វកិច្ចយោធាជាស្ថាពរ ក្រុមចម្រៀងបុរសលំដាប់សកល BTS បានចាប់ផ្ដើមមានសកម្មភាពឡើងវិញយ៉ាងផុលផុស ទាំងការវិលត្រឡប់មកវិញ (Comeback) និងការបង្កើនទំនាក់ទំនងយ៉ាងជិតស្និទ្ធជាមួយអ្នកគាំទ្រ។ អ្វីដែលគួរឱ្យកត់សម្គាល់បំផុតនោះគឺ សមាជិកទាំង ៧ រូប បានបង្ហាញវត្តមានយ៉ាងសកម្មនៅលើបណ្ដាញសង្គម Instagram ដែលនេះជាសញ្ញាវិជ្ជមានបង្ហាញថា ពួកគេចង់កាត់បន្ថយគម្លាត និងផ្ដល់ក្ដីស្រឡាញ់ជូន ARMY ឱ្យកាន់តែខ្លាំងជាងមុន។

បច្ចុប្បន្ន ARMY មកពីបណ្ដាប្រទេសជាច្រើនទាំងនៅអាស៊ីអាគ្នេយ៍ និងអឺរ៉ុប បាននិងកំពុងទាក់ទាញចំណាប់អារម្មណ៍ពីសំណាក់ Idol តាមរយៈការបង្កើតវីដេអូ Trend ក្បាច់រាំ និងវីដេអូកំប្លែងៗ (Meme)។ នេះគឺជាឱកាសដ៏ល្អសម្រាប់ ARMY កម្ពុជា ក្នុងការបង្ហាញសមត្ថភាពដើម្បីទាក់ទាញចំណាប់អារម្មណ៍ពីសមាជិកណាម្នាក់ក្នុងចំណោមអ្នកទាំង ៧។

ជាក់ស្ដែងដើម្បីឱ្យវីដេអូរបស់យើងមានភាពលេចធ្លោ និងប្លែកភ្នែក យើងមិនត្រឹមតែចេះរាំតាមក្បាច់ Original នោះទេ ប៉ុន្តែយើងក៏អាចបញ្ចូលនូវអត្តសញ្ញាណខ្មែរទៅក្នុងមាតិកាទាំងនោះដូចជាការច្នៃម៉ូដសម្លៀកបំពាក់ដោយបញ្ចូលគ្នារវាងសាច់ក្រណាត់ហូលផាមួងខ្មែរ ឬក្បាច់ខ្មែរជាមួយនឹងម៉ូដបែបសម័យទំនើប ឬឈុតប្រពៃណីកូរ៉េ។ ជាងនេះទៀត ហ្វេននៅកម្ពុជាទាំងមូលក៏ត្រូវចេះលួចយកចំណុចតូចៗផ្សេងទៀតជ្រើសរើសទីតាំងស្អាតៗក្នុងប្រទេសកម្ពុជា ដែលស៊ីគ្នាជាមួយចង្វាក់ភ្លេង និងបរិយាកាសនៃបទចម្រៀង។ មិនតែប៉ុណ្ណោះយើងក៏អាចរៀនបង្កើត Trend វីដេអូ Meme កំប្លែងៗ ឬការ Reaction បែបគួរឱ្យស្រឡាញ់ដែលមានភាគរយខ្ពស់អាចទាក់ទាញអារម្មណ៍សមាជិកណាម្នាក់របស់ BTS ដែរ។

ទន្ទឹមនឹងការបង្ហាញក្ដីស្រឡាញ់ ចំណុចដែល ARMY កម្ពុជា និងហ្វេនខេប៉ុបផ្សេងទៀតត្រូវចងចាំជានិច្ចគឺ “ការរក្សាកិត្តិយសជាតិ”។ ក្នុងនាមជាអ្នកគាំទ្រតំណាងឱ្យប្រទេសមួយយើងមិនគួរប្រើប្រាស់ពាក្យសម្ដី ឬបង្កើតវីដេអូណាមួយដែលប៉ះពាល់ដល់ប្រទេសជិតខាង ឬបង្កជាជម្លោះក្នុងបណ្ដាញសង្គមឡើយ។ ជាក់ស្ដែងប្រសិនបើទើសខ្លាំង ឬមិនពេញចិត្តខ្លាំង​ វិធីល្អបំផុតគឺការអូសរំលងចោល កុំចាប់អារម្មណ៍ ហើយកុំបញ្ចេញកំហឹងតាមអារម្មណ៍ដោយសារមិនថា BTS ឬក្រុមខេប៉៉ុបដទៃនោះទេគឺសុទ្ធតែជាក្រុមដែលមានឥទ្ធិពលកម្រិតសកលរាល់សកម្មភាពអវិជ្ជមានណាមួយអាចងាយនឹងធ្វើឱ្យគេកត់ត្រាឈ្មោះប្រទេសយើងក្នុង “បញ្ជីខ្មៅ” នៃពិភព K-Pop បំផុត។ ផ្ទុយទៅវិញ នេះគឺជាពេលវេលាល្អបំផុតដែលយុវជនខ្មែរយើងត្រូវប្រើប្រាស់ភាពវៃឆ្លាត និងបច្ចេកវិទ្យា ដើម្បីបង្ហាញពិភពលោកតាមរយៈបណ្ដាញសង្គមធំៗ ក្រៅពី Facebook ឱ្យគេបានស្គាល់ថា៖ “នៅទីនេះ ក៏មានវត្តមានអ្នកគាំទ្រកម្ពុជាដែលពោរពេញដោយសមត្ថភាព និងសេចក្ដីថ្លៃថ្នូរផងដែរ”៕