RM មេក្រុម BTS ផ្ទាល់ បានទម្លាយពីវីធីសាស្ត្រដែលក្រុមបែងចែកប្រាក់ចំណេញ នៅក្នុងវីដេអូដែលមានចំណងជើងថា “Asking BTS all the questions we were NOT allowed to ask” ឬមានអត្ថន័យជាខេមរភាសាថា “សួរ BTS រាល់សំណួរដែលយើងគ្មានសិទ្ធិនឹងសួរ”។

ចាក់ផ្សាយនៅលើឆានែល YouTube EPIK HIGH កាលពីថ្ងៃ ២៦ ខែមីនា កន្លងទៅនេះ សមាជិកក្រុម BTS ២ ​រូប គឺ RM និង SUGA បានចូលរួមជាភ្ញៀវកិត្តិយស និងជជែកគ្នាលេងជាមួយពិធីករអំពីអាល់ប៊ុមថ្មី Arirang និងការងារដោយរួមរបស់ក្រុម។ នៅពេលសន្ទនាគ្នានោះ RM បានសួរទៅកាន់ក្រុម EPIK HIGH ថា៖ “ខ្ញុំឆ្ងល់ណាស់ តើអ្នកបែងចែកប្រាក់ចំណេញស្មើៗគ្នាដោយរបៀបណា?”

ជំនួសដោយការឆ្លើយតប សមាជិកម្នាក់គឺ Tukutz បានសួរបកទៅវិញថា៖ “ចុះក្រុម BTS មិនបែងចែកប្រាក់ចំណេញស្មើគ្នាទេឬ?”

ដ្បិតមិនផ្ដល់ចម្លើយជាក់លាក់ តែ RM បានបង្ហើបថា៖ “ពួកយើងបែងចែកគ្រប់យ៉ាងស្មើគ្នាដែរ”។ នៅពេលឮបែបនេះ សមាជិកក្រុម EPIK HIGH ម្នាក់ទៀត​ គឺ Tablo បាននិយាយលេងសើចថា៖ “ខ្ញុំចង់បែងចែកប្រាក់ចំណេញជាមួយ BTS ណាស់។ វាស្ថិតក្នុងបញ្ជីក្ដីប្រាថ្នារបស់ខ្ញុំ”។

តាមរយៈចម្លើយរបស់មេក្រុមរូបនេះ បានបញ្ជាក់ថា សមាជិក BTS បានទទួលកម្រៃស្មើៗគ្នា ដោយមិនមែនបែងចែកតាមរយៈតួនាទីទេ។ នេះមានន័យថា RM ក៏ទទួលបានកម្រៃស្មើគ្នានឹងសមាជិកទាំង ៦នាក់ទៀតដែរ មិនមែនលើសគេនោះទេ បើទោះបីជាមានតួនាទីជាមេក្រុមក្ដី។

សូមរំឭកថា ក្រោយសម្រាកការងារក្រុមជិត ៤ ឆ្នាំ BTS ទើបតែបានវិលត្រឡប់មកវិញ កាលពីថ្ងៃ​ ២០ ខែមីនា កន្លងទៅជាមួយនឹងអាល់ប៊ុមពេញខ្នាតទី ៥ ដែលមានឈ្មោះថា ARIRANG។  ខណៈនៅថ្ងៃបន្ទាប់ សមាជិកទាំង ៧ ក៏បានឡើងលើឆាកប្រគំតន្ត្រីនៅទីលានប្រវត្តិសាស្ត្រ Gwanghwamun កណ្ដាលទីក្រុងសេអ៊ូល មុននឹងត្រៀមខ្លួនបន្តកម្មវិធីនៅជុំវិញពិភពលោក៕