យូរៗម្ដងប៉ុណ្ណោះដែល Jungkook ក្រុម BTS បានបង្ហាញខ្លួនជាសាធារណៈ ប៉ុន្តែលើកនេះ លោកបានចូលរួមកម្មវិធីសម្ពោធចាក់បញ្ចាំងខ្សែភាពយន្តកូរ៉េ “First Ride” ដើម្បីគាំទ្រមិត្តជិតស្និទ្ធរបស់ខ្លួន Cha Eun Woo។ ខណៈដែល Cha Eun Woo ជាប់ភារកិច្ចមិនអាចចូលរួមបាន Jungkook ក៏បានកាន់តុក្កតាបោះពុម្ពរូបមិត្តសម្លាញ់ដើម្បីថតរូបជាមួយគ្នាតែម្ដង។
កាលពីថ្ងៃទី ២៧ ខែតុលា ម៉ោងនៅកូរ៉េ Jungkook បានចូលរួមកម្មវិធីចាក់បញ្ចាំងសម្រាប់ភ្ញៀវ VIP សម្រាប់រឿង “First Ride” ដែលបានធ្វើឡើងនៅ Lotte Cinema World Tower ក្នុងសង្កាត់ Songpa ទីក្រុងសេអ៊ូល។
សម្រាប់កម្មវិធីនេះដែរ Jungkook បានបង្ហាញខ្លួនក្នុងឈុតខ្មៅមួយតួខ្លួន ដោយពាក់អាវធំពណ៌ខ្មៅជាមួយខោរលុង ជាមួយស្នាមញញឹមភ្លឺចែងចាំង បន្ថែមបរិយាកាសរស់រវើកដល់កម្រាលព្រំក្រហម។ ទន្ទឹមនោះ តារាប្រុសវ័យ ៣៨ ឆ្នាំក៏បានតុបតែងខ្លួនជាមួយឈុតគ្រឿងអលង្ការប្រាក់ដ៏ទាន់សម័យផងដែរ ដូចជាខ្សែកធំមួយខ្សែ និងក្រវិលម៉ូដចិញ្ចៀន ដែលឆ្លុះបញ្ចាំងពីស្ទីលហ្វេសិនរបស់សិល្បករលំដាប់កំពូល។
ខណៈចូលរួមក្នុងព្រឹត្តិការណ៍នេះដើម្បីគាំទ្រមិត្តជិតស្និទ្ធរបស់ខ្លួន Cha Eun Woo ដែលសម្តែងជាតួឯកក្នុងខ្សែភាពយន្តនេះ Jungkook បាននិយាយថា៖ “ខ្ញុំចង់ដឹងថាការសម្តែងរបស់មិត្តខ្ញុំនឹងទៅជាយ៉ាងណា។ គេបាននិយាយថា ការថតខ្សែភាពយន្តនេះធ្វើឱ្យគេនឹកគិតដល់វ័យខ្ទង់ ២០ ឆ្នាំរបស់ពួកយើង”។
បន្ថែមពីនេះ Jungkook ក៏បានផ្ញើសារដ៏កក់ក្ដៅសម្រាប់ Cha Eun Woo ដោយនិយាយថា៖ “ថែរក្សាសុខភាពផងណា បំពេញកាតព្វកិច្ចឱ្យបានល្អ ហើយត្រឡប់មកវិញដោយសុវត្ថិភាពបន្ទាប់ពីបញ្ចប់កាតព្វកិច្ច”។
ពេលវេលាមួយដែលនាំមកនូវស្នាមញញឹមដល់អ្នកគាំទ្រគឺពេលដែល Jungkook បានថតរូបជាមួយតុក្កតាដែលមានបោះពុម្ពរូប Cha Eun Woo ពីខ្សែភាពយន្ត យ៉ាងគួរឲ្យស្រលាញ់ បង្កើតបានជាបរិយាកាសដ៏សប្បាយរីករាយនៅក្នុងកម្មវិធី។
អ្នកគាំទ្រជាច្រើនបានបញ្ចេញមតិយ៉ាងកក់ក្តៅដូចជា៖
“មិត្តភាពរបស់ពួកគេគួរឲ្យស្រលាញ់ណាស់”
“Jungkook កក់ក្ដៅនិងកំប្លែងណាស់”។
ទន្ទឹមនឹងព័ត៌មាននេះ ប្រព័ន្ធផ្សព្វផ្សាយអន្តរជាតិបានរាយការណ៍ថា BTS កំពុងរៀបចំអាល់ប៊ុមថ្មី និងការប្រគំតន្ត្រីជុំវិញពិភពលោកដ៏ធំមួយចំនួន ៦៥ ឆាក បន្ទាប់ពីសមាជិកទាំងអស់បញ្ចប់កាតព្វកិច្ចយោធាគ្រប់គ្នា។ ទោះជាយ៉ាងណាក៏ដោយ ភ្នាក់ងាររបស់ពួកគេ BIGHIT MUSIC បានបញ្ជាក់ថា៖ “ក្នុងខណៈនេះ ពួកគេមិនទាន់មានការបញ្ជាក់អ្វីទាំងអស់ពាក់ព័ន្ធកាលវិភាគ ការប្រគំតន្ត្រីជុំវិញពិភពលោក” ៕
