ក្រោយទាក់ទងគ្នាដោយបើកចំហជាង ៥ ឆ្នាំ ពេលនេះ Content Creator ខេមរា និង គូស្នេហ៍ បានបញ្ចប់ងារជាសង្សារក្លាយជាគូដណ្ដឹងពេញលេញតាមបែបប្រពៃណី ដោយបានរៀបចំពិធីចូលចែចូវ ព្រមមានចាស់ទុំ ញាតិមិត្តទាំងសងខាងចូលរួមជាសក្ខីភាព។
មហាជនប្រាកដជាបានស្គាល់ ខេមរា ជាអ្នកផលិតមាតិការឿងរ៉ាវប្លែកៗ និងចំណេះដឹងជុំវិញពិភពលោកនៅលើបណ្ដាញសង្គម។ តាមរយៈមាតិកាជាច្រើនដែលលោកបានបង្កើតឡើងទទួលបានការចាប់អារម្មណ៍ ហើយមានការគាំទ្រមិនដាច់ពីសំណាក់អ្នកប្រើប្រាស់បណ្ដាញសង្គមទាំង FB , IG និងតិកតុក។
នៅលើបណ្ដាញសង្គមកន្លងមក គឹម ខេមរា តែងតែបង្ហាញពីទំនាក់ទំនងរបស់ខ្លួនជាមួយគូស្នេហ៍ដែលជាអ្នកផលិតមាតិកាដូចគ្នាឈ្មោះថា សាយ សុភ័ក្រនាថ។ កាលពីថ្ងៃទី ២៤ ខែ សីហា ឆ្នាំ ២០២៥ ម្សិលមិញនេះអ្នកផលិតមាតិការូបសង្ហា ខេមរា និងគូស្នេហ៍បានដឹកដៃគ្នាចូលជួបចាស់ទុំទាំងសងខាង ដើម្បីទទួលដឹងឮចំណងស្នេហ៍តាមបែបប្រពៃណី ដោយបានរៀបចំពិធីចូលចែចូវទៅតាមទំនៀមទម្លាប់ខ្មែរក្រោយទាក់ទងគ្នាជាង ៥ ឆ្នាំ។ ចំពោះដំណឹងដ៏សែនរីករាយនេះបណ្ដាអ្នកគាំទ្រនៅក្នុងបណ្ដាញសង្គមបានចូលរួមអបអរសាទរដល់រូបលោកនិងគូស្នេហ៍យ៉ាងច្រើនព្រមទាំងមានការចែករំលែកព្រោងព្រាតទៀតផង។
យ៉ាងណាមិញ អ្នកផលិតមាតិកាក្នុងស្រុករូបនេះក៏បានបញ្ជាក់ពីពេលវេលារៀបការផងដែរគឺនៅថ្ងៃទី ១ ខែ កុម្ភៈ ឆ្នាំ ២០២៦ ពោលគឺនៅសល់ជាង ៦ ខែទៀតប៉ុណ្ណោះ៕
រូបភាព ៖ Nara Wedding
