ប្រជាជន​ខ្មែរ​ជា​ច្រើន​នាក់​ដែល​កំពុង​រស់​នៅ​លើ​ទឹកដី​នៃ​ប្រទេស​មហាអំណាច​បាន​ប្រមូល​ផ្ដុំ​គ្នា​យ៉ាង​ច្រើន​កុះករ​ស្រែក​ទាម​ទារ​រក​យុត្តិធម៌​ជូន​ប្រទេស​កម្ពុជា​ដែល​កំពុង​រង​ការ​គំរាម​កំហែង ​និង​ការ​ឈ្លាន​ពាន​យ៉ាង​កំរោល​ពី​កង​ទ័ព​សៀម។ ក្នុង​នោះ​ក៏​ឃើញ​មាន​វត្តមាន​តារា​សម្ដែង​ជើង​ចាស់​ល្បី​ឈ្មោះ​នា​ទសវត្ស ៩០ អ្នក​នាង អម្ភរ ទេវី ផង​ដែរ។

មហាជន​ប្រាកដ​ជា​ធ្លាប់​បាន​ស្គាល់​តារា​សម្ដែង​ជើង​ចាស់​អ្នក​នាង អម្ពរ ទេវី ដែល​អ្នក​នាង​គឺ​ជា​តារា​ស្រី​ដែល​មាន​កេរ្តិ៍ឈ្មោះ​ល្បី​ល្បាញ​ក្នុង​ជំនាន់​ឆ្នាំ ១៩៩០ តាម​រយៈ​ទេពកោសល្យ​ដ៏​ប៉ិន​ប្រសព្វ​ជា​ពិសេស​ទឹក​ដម​សំឡេង​ដ៏​ផ្អែម​​​ទាក់ចិត្ត​អ្នក​ទស្សនា​ភាព​យន្ត​ខ្មែរ​នា​ជំនាន់​នោះ​។

ថ្មីៗនេះ​តារា​ស្រី​ដ៏​មាន​ប្រជាប្រិយភាព​នា​ទសវត្សរ៍ ៩០ រូប​នេះ​បាន​បង្ហាញ​វត្តមាន​ចូលរួម​ជាមួយ​ប្រជាពលរដ្ឋ​ខ្មែរ​នៅ​​អាមេរិក​ប្រើ​សំឡេង​ និងរូបភាពស្រែក​ទាមទារ​រក​យុត្តិធម៌​ជូន​ប្រទេស​កម្ពុជា​ដែល​កំពុង​រង​ការ​ឈ្លានពាន​និង​ការ​វាយ​ប្រហារ​ពី​សំណាក់​កង​ទ័ព​សៀម​ដែល​កើត​ចេញ​ពី​ជម្លោះ​ព្រំដែន​កម្ពុជា-​ថៃ។

សកម្មភាព​នៃ​ការ​ប្រមូល​ផ្ដុំ​ដើម្បី​ទាមទារ​យុត្តិធម៌​ជូន​កម្ពុជា​នា​ពេល​នេះ​ត្រូវ​បាន​បណ្ដា​អ្នក​ចូល​រួម​ដែល​មាន​ទាំង​ខ្មែរ និង​បរទេស​ព្រម​ទាំង​ព្រះ​សង្ឃ​​បាន​នាំ​គ្នា​កាន់​ទង់ជាតិ​ខ្មែរ​ព្រម​ទាំង​ស្លាក​ដែល​មាន​សរសេរ​ជា​ភាសា​ខ្មែរ​និង​អង់គ្លេស​ក្នុង​ន័យ​សូម​ឱ្យ​មាន​ដំណោះ​ស្រាយ​​ ខណៈ​ថៃ​គឺ​ជា​អ្នក​ដែល​ចាប់​ផ្ដើម​នូវ​សង្គ្រាម​ឈ្លានពាន​ទឹក​ដី​របស់​កម្ពុជា​ដ៏​គឃ្លើន​នា​ពេល​នេះ។

ក្នុង​នាម​ជា​ពលរដ្ឋ​ខ្មែរ​ម្នាក់​ដែល​កំពុង​រស់​នៅ​លើ​ទឹក​ដី​​អាមេរិក​តារា​សម្ដែង អ្នក​នាង អម្ភរ ទេវី បាន​លើក​ដៃ​អំពាវនាវ​សុំ​ឱ្យ​បណ្ដា​អង្គការ​អន្តរជាតិ​ក៏​ដូច​ជា​បណ្ដា​ប្រទេស​ជា​សមាជិក​អាស៊ាន​ជួយ​គាំទ្រ​កម្ពុជា​និង​ចូលរួម​ក្នុងការ​បញ្ឈប់​សង្គ្រាម​ឈ្លានពាន​ទឹក​ដី​ឱ្យ​បាន​ឆាប់​រហ័ស​ព្រោះ​ថា​កម្ពុជា​ជា​ជន​រង​គ្រោះ​នៅ​ក្នុង​ភ្លើង​សង្គ្រាម​ដែល​បង្ក​ឡើង​ដោយ​កង​ទ័ព​នៃ​ប្រទេស​ថៃ៕ កម្ពុជា​ត្រូវ​ការ​សន្តិភាព កម្ពុជា​មិន​ចង់​​រស់​នៅ​ក្នុង​ភ្លើង​សង្គ្រាម​នោះ​ឡើយ៕

ចុចទីនេះដើម្បីទស្សនា វីដេអូ ៖ https://www.facebook.com/Amportevihap/videos/636246186183857

រូបភាព ៖ កវី កោសល & Ampor Tevi Hap