ស្មារតីនៃការអភិរក្ស និងអភិវឌ្ឍន៍សិល្បៈវប្បធម៌បុរាណក្នុងចំណោមកុលបុត្រកុលធីតាខ្មែរជំនាន់ក្រោយ ត្រូវបានបង្ហាញយ៉ាងលេចធ្លោតាមរយៈទស្សនីយភាពរបាំក្បាច់បុរាណ​ក្រោមចំណងជើង​ «​ខ្យងស័ង្ខបញ្ជជន្យៈ» ដកស្រង់ត្រង់ឈុតចម្បាំងព្រះវិស្ណុ និងយក្សបងប្អូនទាំងប្រាំ។

ស្នាដៃសម្ដែងនេះ គឺជាការរួមបញ្ចូលគ្នានៃគំនិតច្នៃប្រឌិតរបស់ក្រុមនិស្សិតជំនាញដឹកនាំរឿងចំនួនបីរូប រួមមាន៖ យ៉ង់ សុភ័ក្ត្រា រ៉ាត់ ស្រីនិច និង ព្រឹម ស្រីរ៉ែន។ តាមរយៈកាយវិការដ៏រស់រវើក ឈុតនេះបានឆ្លុះបញ្ចាំងពីភាពប៉ិនប្រសប់ ការហ្វឹកហាត់យ៉ាងតឹងរ៉ឹង និងការយល់ដឹងស៊ីជម្រៅអំពីទម្រង់សិល្បៈបុរាណដ៏វិសេសវិសាលរបស់បុព្វបុរសខ្មែរ។

គួរបញ្ជាក់ថា ទស្សនីយភាពសិល្បៈ​នេះដែរ គឺជាផ្នែកមួយនៃការប្រឡងបញ្ចប់ការសិក្សាថ្នាក់បរិញ្ញាបត្ររបស់និស្សិតឆ្នាំទី៤ នៃមហាវិទ្យាល័យសិល្បៈនាដសាស្ត្រនៃសាកលវិទ្យាល័យភូមិន្ទវិចិត្រសិល្បៈ ដែលត្រូវបានរៀបចំឡើងកាលពីថ្ងៃសុក្រ ទី២៤ ខែកក្កដា ដោយមាននិស្សិតជាច្រើនក្រុមចូលរួមបង្ហាញនូវទស្សនីយភាពសិល្បៈជាច្រើនទម្រង់ដូចជា របាំប្រពៃណី ល្ខោនក្បាច់បុរាណ ភាពយន្តខ្លី របាំប្រពៃណី ល្ខោនខោល ល្ខោននិយាយ ល្ខោនយីកេ និងល្ខោនបាសាក់ផងដែរ។

មិនត្រឹមតែជាការវាស់វែងសមត្ថភាពរបស់និស្សិតៗប៉ុណ្ណោះទេ ប៉ុន្តែការប្រឡងបញ្ចប់ការសិក្សានេះក៏អាចជាយុទ្ធនាការដ៏មានថាមពលក្នុងការបំផុសគំនិតដល់យុវជនជំនាន់ក្រោយ ឱ្យងាកមកចាប់អារម្មណ៍ ស្រឡាញ់ និងចូលរួមសហការគ្នាយ៉ាងសកម្មក្នុងការលើកតម្កើង ព្រមទាំងផ្សព្វផ្សាយមរតកវប្បធម៌សិល្បៈខ្មែរ ឱ្យបន្តរស់រានមានជីវិតយ៉ាងរុងរឿងនៅលើឆាកជាតិ និងអន្តរជាតិ ៕