លោកស្រី សុភា បុត្រឈរ បរិច្ចាគ ៣ ម៉ឺនដុល្លារ ទៅមូលនិធិកុមារកម្ពុជា និងបង្ហើបគ្រោងថ្មីជួយគ្រូបង្រៀនចូលនិវត្តន៍ឆ្នាំ ២០២៥-២០២៦

អង្គការមូលនិធិកុមារកម្ពុជា បានថ្លែងអំណរគុណដល់លោកស្រី សុភា បុត្រឈរ ដែលបានជួយជាថវិកា សម្ភារៈសិក្សា ប្រមាណ ៣ ម៉ឺនដុល្លារ។ មិនតែប៉ុណ្ណោះភរិយាម្ចាស់ក្រុមហ៊ុន Böttcher AG បានប្រកាសជួយគ្រូបង្រៀនដែលចូលនិវត្តន៍ក្នុងឆ្នាំ ២០២៥-២៦ ដោយលោកស្រីមិនមែនជួយតែម្នាក់ឬ២នាក់នោះទេប៉ុន្តែគឺនៅទូទាំងប្រទេសកម្ពុជាតែម្ដង។

ដ្បិតមិនទាន់មានការបញ្ជាក់នូវចំនួនទឹកប្រាក់ ប៉ុន្តែដំណឹងដ៏ល្អមួយនេះបានធ្វើឱ្យមហាជនក្នុងស្រុក ជាពិសេសគ្រូបង្រៀនជាច្រើនរំភើបចំពោះទឹកចិត្តរបស់លោកស្រីជាពន់ពេក។ លោកស្រី សុភា បុត្រឈរ បានជម្រាបថានេះជាគម្រោងដែលលោកស្រីបានត្រៀមយូរដែរហើយ ប៉ុន្តែទើបមានឱកាសចាប់ផ្ដើម ក្រោយលោកស្រីទើបបានជួយដល់គ្រូបង្រៀនចំនួន ១៨ រូប ក្នុងខេត្តកំពង់ធំ (ដែលជាអតីតគ្រូដែលធ្លាប់បានបង្រៀនលោកស្រី) ដើម្បីជួយសម្រួលក្នុងការដោះស្រាយជីវភាពជូនដល់ពួកគាត់។

យ៉ាងណាមិញ ចំពោះគម្រោងក្នុងឆ្នាំ ២០២៦ នេះ គឺលោកស្រីបានសម្រេចក្នុងការជួយដល់លោកគ្រូអ្នកគ្រូដែលបានចូលនិវត្តន៍ក្នុងឆ្នាំ ២០២៥-២៦ ដោយមិនកំណត់ខេត្តក្រុងពោលគឺទូទាំងប្រទេសកម្ពុជាតែម្ដង។ លោកស្រីក៏បានបញ្ជាក់ផងដែរថា នេះជាតបស្នងនូវគុណបំណាច់របស់លោកគ្រូអ្នកគ្រូដែលជាឪពុកម្ដាយទី២ ជាអ្នកផ្ដល់ចំណេះដឹង បង្កើតឱ្យមានធនធានមនុស្សប្រកបដោយគុណធម៌ និងសីលធម៌។ បន្ថែម ការជួយរបស់លោកស្រី សុភា បុត្រឈរ នាពេលនេះមិនត្រឹមអាចជួយសម្រួលដល់ការរស់នៅរបស់គ្រូបង្រៀនដែលមានវ័យចំណាស់នោះទេ តែបានបង្ហាញនូវការដឹងគុណចំពោះរូបលោកផងដែរ។

លើសពីនេះ លោកស្រី សុភា បុត្រឈរ និងស្វាមី ក៏បានបរិច្ចាគជួយដល់អង្គការមូលនិធិកុមារកម្ពុជាក្នុងចំនួនទឹកប្រាក់ប្រមាណ ៣មុឺនដុល្លារដើម្បីទិញជាទឹកដោះគោ និងសំភារៈសិក្សា ដែលជំនួយនេះបានរួមចំណែកយ៉ាងធំធេងដល់កម្មវិធីថែទាំស្រ្តីមានផ្ទៃពោះ និងទារករបស់អង្គការសម្រាប់ការទ្រទ្រង់ដល់កុមារដែលមានបញ្ហាកង្វះអាហាររូបត្ថម្ភ និងអ្នកម្តាយមិនអាចបំបៅដោះកូន៕

រូបភាព ៖ lady_boettcher

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។