នៅពេលអាយុកាន់តែច្រើន ទើបយើងដឹងថា វ័យ ៣០ ឆ្នាំ មិនបានធ្វើឱ្យយើងរកឃើញចម្លើយគ្រប់រឿងនោះទេ។ វ័យនេះគ្រាន់តែបង្រៀនឱ្យយើងដឹងថា រឿងណាគួរស្វែងរកចម្លើយ និងរឿងណាគួរបណ្តោយឱ្យកន្លងផុតទៅ។ ខាងក្រោមនេះ គឺជាមេរៀនជីវិតសំខាន់ៗសម្រាប់អ្នកឈានចូលវ័យ ៣០ ឆ្នាំ។

១. យើងមិនចាំបាច់ត្រូវជោគជ័យ ដំណាលគ្នានឹងមនុស្សជំនាន់ជាមួយគ្នានោះទេ ព្រោះជីវិតរបស់មនុស្សម្នាក់ៗមានពេលវេលារបស់រៀងៗខ្លួន។

២. ប្រាក់មិនអាចទិញក្ដីសុខបានគ្រប់យ៉ាងទេ ប៉ុន្តែប្រាក់ជួយទិញសេរីភាព និងកាត់បន្ថយកង្វល់ក្នុងជីវិតបានជាច្រើនយ៉ាង។

៣. សុខភាពគឺជាទ្រព្យសម្បត្តិ ដែលយើងច្រើនតែមើលឃើញតម្លៃ នៅពេលរាងកាយចាប់ផ្តើមបញ្ជូនសញ្ញាព្រមាន។

៤. មិត្តភក្តិកាន់តែតិចទៅៗ ជារឿងធម្មតា ព្រោះនៅពេលអាយុកាន់តែច្រើន យើងត្រូវការទំនាក់ទំនងស្មោះត្រង់ ច្រើនជាងចំនួន។ ជួនកាលយើងក៏ត្រូវព្រមបាត់បង់មនុស្សខ្លះ ដើម្បីទទួលបានខ្លួនឯងត្រឡប់មកវិញ។

៥. ទំនាក់ទំនងខ្លះត្រូវបញ្ចប់ ព្រោះមនុស្សទាំងពីរនាក់លូតលាស់ទៅទិសដៅខុសគ្នា ហើយនោះប្រហែលជាការបញ្ចប់ដ៏ល្អបំផុតហើយ។

៦. ស្នេហាដ៏ល្អ គួរតែធ្វើឱ្យយើងធ្វើជាខ្លួនឯងបានយ៉ាងស្រួលចិត្ត ច្រើនជាងធ្វើឱ្យយើងត្រូវខិតខំប្រឹងប្រែងដើម្បី​បញ្ជាក់ពីតម្លៃរបស់ខ្លួន។

៧. ការបដិសេធអ្នកដទៃខ្លះ គឺជារក្សាពេលវេលា និងថាមពល សម្រាប់អ្វីដែលមានសារៈសំខាន់ចំពោះជីវិតរបស់យើង។

៨. ការងារគ្រាន់ជាផ្នែកមួយនៃជីវិត ដូច្នេះយើងគួរតែបន្សល់ទុកចន្លោះទំនេរខ្លះ សម្រាប់ក្ដីសុខលើផ្នែកផ្សេងទៀងដែរ។

៩. ឪពុកម្តាយកាន់តែចាស់ទៅៗ ស្របពេលដែលយើងធំដឹងក្តីឡើង ដូច្នេះហើយពេលវេលាដែលបាននៅជាមួយគ្នា គឺមានតម្លៃច្រើនជាងអ្វីដែលយើងធ្លាប់គិត។

១០. ជីវិតធម្មតាក៏ជាជីវិតដ៏ល្អមួយដែរ មានមនុស្សឱ្យនឹក មានការងារឱ្យធ្វើ និងមានផ្ទះឱ្យត្រឡប់ទៅវិញ គឺមានន័យគ្រប់គ្រាន់ណាស់ទៅហើយ។

១១. ការស្នើសុំជំនួយ មិនបានធ្វើឱ្យយើងមើលទៅទន់ខ្សោយនោះទេ វាធ្វើឱ្យយើងទទួលស្គាល់ថាខ្លួនយើងក៏ជាមនុស្សម្នាក់ដែរ។

១២. ក្តីស្រមៃខ្លះអាចផ្លាស់ប្តូរបាន ព្រោះមនុស្សដែលធ្លាប់បង្កើតក្តីស្រមៃកាលពីថ្ងៃនោះ អាចនឹងលូតលាស់ក្លាយជាមនុស្សម្នាក់ផ្សេងទៀតនៅថ្ងៃនេះ។

១៣. យើងគ្មានតួនាទីបកស្រាយឱ្យមនុស្សគ្រប់គ្នាយល់ពីយើងនោះទេ ព្រោះមនុស្សដែលស្រឡាញ់យើងពិតប្រាកដ នឹងព្យាយាមស្តាប់រឿងរ៉ាវពីជ្រុងរបស់យើងដែរ។

១៤. ក្ដីសុខមិនគួរត្រូវបានពន្យារពេល រហូតទាល់តែជីវិតល្អឥតខ្ចោះនោះទេ ព្រោះជីវិតមានរឿងឱ្យត្រូវដោះស្រាយជារៀងរាល់ថ្ងៃ។

១៥. ជីវិតមិនវែងឆ្ងាយល្មមឱ្យយើងខាតពេលនៅជាមួយអ្វីដែលធ្វើឱ្យឈឺចាប់ គ្រាន់តែដោយសារស្តាយក្រោយចំពោះពេលវេលាដែលធ្លាប់លះបង់នោះឡើយ។

១៦. ការចាប់ផ្តើមជាថ្មីក្នុងវ័យ ៣០ ឆ្នាំ មិនមែនមានន័យថាយើងដើរយឺតជាងនរណាម្នាក់នោះទេ វាមានន័យថាយើងមានសេចក្តីក្លាហានគ្រប់គ្រាន់ក្នុងការជ្រើសរើសជីវិតម្តងទៀត។

ជាចុងក្រោយ មេរៀនសំខាន់នៃវ័យ ៣០ ឆ្នាំ គឺការយល់ឃើញថា យើងមានពេលវេលាមិនច្រើនគ្រប់គ្រាន់ នឹងប្រើប្រាស់ជីវិតទៅតាមការរំពឹងទុករបស់គ្រប់គ្នានោះទេ។ ចូរប្រើប្រាស់ពេលវេលាដែលនៅសេសសល់ បង្កើតជីវិតមួយដែលនៅពេលក្រឡេកមើលត្រឡប់មកវិញ យើងនឹងអរគុណខ្លួនឯងដែលក្លាហានហ៊ានជ្រើសរើស។

«វ័យ ៣០ ឆ្នាំ មិនបានបង្រៀនឱ្យយើងដឹងគ្រប់យ៉ាងនោះទេ វ័យ ៣០ ឆ្នាំ បង្រៀនឱ្យយើងដឹងថា អ្វីដែលសំខាន់ចំពោះជីវិតពិតប្រាកដ»