បន្ទាប់ពីសម្ដែងជាតួសៀវឡុងនីក្នុងរឿង “The Return of the Condor Heroes” ក្នុងឆ្នាំ ២០០៦ មក Liu Yifei បានទទួលថតតែភាពយន្តខ្នាតធំប៉ុណ្ណោះ រហូតដល់ឆ្នាំ២០២២ ទើបនាង​​ត្រឡប់​ទៅ​សម្ដែង​រឿង​ភាគ​ទូរទស្សន៍​វិញ​ក្នុងរឿង “A Dream of Splendor” ហើយក៏បន្តចេញរឿងភាគល្បីជាប់ៗគ្នាដូចជា “Meet Yourself” និង “The Tale of Rose”។ ភាពឆ្លាតវៃក្នុងការជ្រើសរើសសាច់រឿង និងជំនាញសម្ដែងកាន់តែមានភាពចាស់ទុំ ធ្វើឱ្យតារាស្រីវ័យ ៣៧ឆ្នាំរូបនេះបានទទួលការកោតសរសើរយ៉ាងទូលំទូលាយ។

ទោះបីជាមិនបានថតរឿងភាគថ្មីអស់រយៈពេល ២ ឆ្នាំក៏ដោយ ប៉ុន្តែថ្មីៗនេះមានសេចក្ដីរាយការណ៍ថា Liu Yifei នឹងចាប់ដៃគ្នាជាមួយតារាប្រុស Chen Xiao ម្ដងទៀតក្នុងរឿងភាគថ្មីមានចំណងជើងថា “Tearless Snow” ។ ភាពយន្តភាគថ្មីនេះ​នឹងក្លាយជា​ការ​សហការ​លើក​ទី​ពីរ​របស់​ពួក​គេ​បន្ទាប់​ពីរឿង “A Dream of Splendor” ដែលធ្វើឱ្យមានការរំពឹងទុកកាន់តែខ្ពស់ក្នុងចំណោមទស្សនិកជន។

“Tearless Snow” ត្រូវបានកែសម្រួលពីប្រលោមលោកមានចំណងជើងដូចគ្នាដោយអ្នកនិពន្ធជនជាតិចិន Tianxia Chenai ។ រឿងនេះនិយាយពី ការសងសឹករបស់តួស្រីជាកូនអ្នកលក់អំបិល ដែលជាអ្នកនៅរស់រានមានជីវិតតែម្នាក់គត់ បន្ទាប់ពីក្រុមគ្រួសាររបស់នាងត្រូវបានសម្លាប់រង្គាលដោយត្រកូលអ្នកមានអំណាចបីនាក់ បន្ទាប់ពីបានលាតត្រដាងអំពើពុករលួយនៅក្នុងប្រព័ន្ធពន្ធអំបិល។

គួរបញ្ជាក់ដែរថា កន្លងធ្លាប់មានព័ត៌មានលេចឮថា Liu Yifei គឺជាជម្រើសទី ២ សម្រាប់តំណែងតួឯក ខណៈដែលក្រុមផលិតករដំបូងឡើយបានជ្រើសរើស Zhao Liying។ ពាក្យចចាមអារ៉ាមថា Zhao Liying អាចនឹងសម្តែងក្នុងរឿង “Tearless Snow” ចាប់ផ្ដើមលេចឡើងនៅពេលដែលរឿងភាគរបស់នាងរឿង “The Legend of Shen Li” បានចាក់ផ្សាយកាលពីឆ្នាំមុន ប៉ុន្តែស្ទូឌីយ៉ូរបស់នាងបានបដិសេធភ្លាមៗ។ តាមនោះដែរ Zhao Liying ត្រូវ​បាន​​រាយការណ៍​ថា​បាន​បដិសេធសំណើថតរឿង​នេះ​ចំនួន​បី​ដង​ដោយ​សារ​តែ​ចង់​ផ្លាស់​ប្តូរ​អាជីព​របស់​នាង​ចេញ​ពី​រឿង​ភាគបែបបុរាណ និង​តួ​ស្រដៀង​ៗ​នេះ។

ជាលទ្ធផលផលិតករបានងាកទៅរក Liu Yifei ដែលត្រូវបានគេមើលឃើញថាមានភាពប្រដំប្រសងគ្នាទាំងកម្រិតប្រជាប្រិយភាព និងសមត្ថភាពសម្តែង។ ប្រភពព័ត៌មាននិយាយថា Liu Yifei មានបំណងចង់ដើរតួជាតួអង្គបែបសងសឹកយូរមកហើយ ហើយដោយសារ Zhao Liying បានច្រានចោលតួនាទីនេះ នាងបានឆ្លៀតឱកាសស្នើឱ្យមានការកែប្រែអត្ថបទរឿងជាច្រើនដង ដើម្បីឱ្យតួឯកស្រីកាន់តែមានភាពលេចធ្លោក្នុងផ្នែកជំនួញ ៕