ក្រុមចម្រៀងខេប៉ុប Stray Kids បានសម្រេចនូវសមិទ្ធផលដ៏ធំធេងមួយទៀត ដោយបានលក់អាល់ប៊ុមបានសរុបលើស ៤០ លានបន្ទះ នៅទូទាំងប្រទេសកូរ៉េខាងត្បូង និងប្រទេសជប៉ុន។

យោងតាមទិន្នន័យចុងក្រោយបំផុតគិតត្រឹមខែមេសា ឆ្នាំ ២០២៦ ក្រុមចម្រៀងបុរសមួយនេះបានកត់ត្រាចំនួននាំចេញអាល់ប៊ុមសរុបចំនួន ៤០ ២៦៧ ១៥៨ បន្ទះ ពីអាល់ប៊ុមចំនួន ២៨ ដែលបានចេញផ្សាយនៅក្នុងប្រទេសទាំងពីរ។

ចាប់ផ្តើមតាំងពីអាល់ប៊ុមមុនការបង្ហាញខ្លួនផ្លូវការ (Pre-debut album) មានចំណងជើងថា ‘Mixtape’ ដែលបានចេញផ្សាយក្នុងខែមករា ឆ្នាំ ២០១៨ រហូតមកដល់អាល់ប៊ុមដែលបានចេញផ្សាយក្នុងឆ្នាំ ២០២៥ មានចំណងជើងថា ‘DO IT’ ក្រុម Stray Kids អាចលក់ចេញអាល់ប៊ុមសរុបចំនួន ៣៥ ៧៤២ ៧០៨ បន្ទះ សម្រាប់អាល់ប៊ុមភាសាកូរ៉េចំនួន ១៩ បើយោងតាមទិន្នន័យរបស់តារាង Circle Chart។

នៅក្នុងប្រទេសជប៉ុនវិញ ក្រុមនេះបានកត់ត្រាការនាំចេញចំនួន ៤ ៥២៤ ៤៥០ បន្ទះ ពីការចេញផ្សាយអាល់ប៊ុមចំនួន ៩ ដោយរាប់ចាប់តាំងពីអាល់ប៊ុម ‘SKZ2020’ ដែលបានចេញផ្សាយក្នុងខែមីនា ឆ្នាំ ២០២០ រហូតដល់អាល់ប៊ុមខ្នាតតូចភាសាជប៉ុនមានចំណងជើងថា ‘Hollow’ ដែលបានចេញផ្សាយក្នុងខែមិថុនា ឆ្នាំ ២០២៥។

គួររម្លឹកថានៅមុននេះ ក្រុម Stray Kids បានសម្រេចការលក់អាល់ប៊ុមចំនួន ៣០ លានបន្ទះ នៅក្នុងប្រទេសកូរ៉េ និងជប៉ុន កាលពីខែមករា ឆ្នាំ ២០២៥ ជាមួយនឹងការចេញផ្សាយចំនួន ២៥  ដែលមានន័យថាពួកគេអាចឈានដល់កម្រិត ៤០ លានបន្ទះ ដោយប្រើរយៈពេលត្រឹមមួយឆ្នាំ និងបីខែប៉ុណ្ណោះ ជាការបង្ហាញឱ្យឃើញជាថ្មីម្តងទៀតនូវអំណាចលក់អាល់ប៊ុមដ៏ខ្លាំងក្លារបស់ពួកគេ។

ក្រុមចម្រៀងរបស់ផលិតកម្ម JYP មួយនេះក៏ធ្លាប់បានសម្រេចនូវភាពជោគជ័យជាប្រវត្តិសាស្ត្រនៅលើតារាង Billboard 200 ផងដែរ ជាមួយនឹងអាល់ប៊ុមពេញឆ្នាំ ២០២៥ របស់ពួកគេមានចំណងជើងថា ‘KARMA’ និងអាល់ប៊ុម ‘DO IT’ ដែលបានឈរនៅចំណាត់ថ្នាក់លេខ ១ ជាបន្តបន្ទាប់លើកទី ៧ និងទី ៨ សម្រាប់ក្រុម។ ក្រៅពីនេះ ពួកគេក៏បានកត់ត្រានូវចំណាត់ថ្នាក់ខ្ពស់បំផុតក្នុងចំណោមសិល្បករ K-pop ទាំងអស់ នៅលើតារាងអាល់ប៊ុមសកលឆ្នាំ ២០២៥ និងតារាងលក់អាល់ប៊ុមសកលរបស់សហព័ន្ធអន្តរជាតិនៃឧស្សាហកម្មតូរ្យតន្ត្រីហៅកាត់ IFPI។

ជាការពង្រីកឥទ្ធិពលលើឆាកអន្តរជាតិ Stray Kids គ្រោងនឹងឡើងសម្ដែងនៅមហោស្រព Governors Ball Music Festival នៅទីក្រុងញូវយ៉កនៅថ្ងៃទី ៦ ខែមិថុនា និងពិធីបុណ្យរ៉ុកប្រេស៊ីល Rock in Rio ដែលប្រារព្ធឡើងនៅទីក្រុង Rio de Janeiro នៅថ្ងៃទី ១១ ខែកញ្ញាខាងមុខ ខណៈព្រឹត្តិការណ៍ Straycity ដែលជាមហោស្រពតន្ត្រីថ្មីមួយរបស់ពួកគេ ក៏គ្រោងនឹងប្រារព្ធឡើងនៅក្នុងទីក្រុងអាមេរិកឡាទីនចំនួនបីនៅក្នុងខែកញ្ញាផងដែរ ៕