ក្រសួងវប្បធម៌ នឹងរៀបចំសិក្ខាសាលាតម្រង់ទិស ក្រោមប្រធានបទ “ស្បៃខ្មែរ និងរបៀបប្រើប្រាស់ ក្នុងទំនៀមទម្លាប់ប្រពៃណី"

ក្រសួងវប្បធម៌ និងវិចិត្រសិល្បៈ បានប្រកាសជូនដំណឹងជាថ្មីម្តងទៀត ស្តីពីការរៀបចំសិក្ខាសាលា តម្រង់ទិស ក្រោមប្រធានបទ “ស្បៃខ្មែរ និងរបៀបប្រើប្រាស់ ក្នុងទំនៀមទម្លាប់ប្រពៃណី និងអាពាហ៍ពិពាហ៍ខ្មែរ” ដែលនឹងប្រព្រឹត្តិទៅនៅពេលឆាប់ៗខាងមុខនេះ។

សិក្ខាសាលានោះនឹងរៀបចំឡើងនៅថ្ងៃ ៦ ខែតុលា ឆ្នាំ ២០២៦ នៅវេលាម៉ោង ១ រសៀល នៅសាលអង្គរវត្ត ទីស្ដីការក្រសួងវប្បធម៌ និងវិចិត្រសិល្បៈ។ សម្រាប់មហាជនដែលមានបំណងស្វែងយល់បន្ថែមពីវិស័យនេះ ព្រមទាំងអ្នកដែលប្រកបអាជីវកម្មលើវិស័យសម្អាងការ អ្នកច្នៃម៉ូដសម្លៀកបំពាក់ អ្នកផលិតមាតិកា និងអ្នកដែលប្របមុខរបរពាក់ព័ន្ធ និងប្រហាក់ប្រហែល អាចចុះឈ្មោះចូលរៀនឲ្យបានមុនថ្ងៃ ៣០ ខែកញ្ញា ឆ្នាំ ២០២៦។

គោលបំណងក្នុងការរៀបចំសិក្ខាសាលាតម្រង់ទិញនេះ គឺដើម្បីបញ្ជ្រាបការយល់ដឹងពីស្បៃខ្មែរ និងរបៀបរបបប្រើប្រាស់នៅក្នុងទំនៀមទម្លាប់ប្រពៃណីខ្មែរដ៏ផូរផង់ ឧត្ដុង្គឧត្ដម និងប្រកបដោយសេចក្ដីថ្លៃថ្នូររបស់ខ្មែរយើង និងរបៀបរបបប្រើប្រាស់ក្នុងពិធីអាពាហ៍ពិពាហ៍ខ្មែរ អត្តសញ្ញាណជាតិ ដែលយើងត្រូវតែរួមគ្នាលើកតម្កើង ថែរក្សា អភិរក្ស និងផ្សព្វផ្សាយឲ្យបានទូលំទូលាយ។