សមារាត្រីជាឈុតតំណាងជាតិ ដេត ស្រីនាឌ ដែលជ្រើសទៅបង្ហាញ Miss Charm 2025

Miss Charm Cambodia 2025 កញ្ញា ដេត ស្រីនាឌ បានធ្វើឲ្យមហាជនភ្ញាក់ផ្អើលខ្លាំង ព្រោះនាងបានបង្ហាញឲ្យពិភពលោកបានឃើញយ៉ាងច្បាស់ពីភាពប្រណីតភាពនៃវប្បធម៌ខ្មែរ ដែលបានបំពាក់លើឈុតតំណាងជាតិ ដែលបង្ហាញកាលពីយប់មិញ។

កម្មវិធី Miss Charm 2025 កាលពីរាត្រីថ្ងៃ ៩ ខែធ្នូ បានឈានដល់វគ្គ Preliminary Competition ដោយមានបង្ហាញឈុតតំណាងជាតិ និង Evening Gown។ សម្រាប់ឈុតតំណាងជាតិរបស់ Miss Charm Cambodia 2025 គឺ Angkor Equinox ដែលជាសមរាត្រីរបស់កម្ពុជា ១ ឆ្នាំ មាន ២ដងមានព្រះអាទិត្យរះចំកំពូលប្រាសាទអង្គរវត្តដ៏អស្ចារ្យ។

ចំណែក Evening Gown របស់ ស្រីនាឌ វិញ មានឈ្មោះសិង្ហមាស ឬ The Golden Lion យ៉ាងភ្លឺចិញ្ចាច។ ឈុតនេះត្រូវបានបំផុសគំនិតដោយយកលំនាំរចនាបថតួសំពត់របស់អប្សរា មួយនៃប្រាសាទអង្គរវត្ត ដែលមានអាយុកាលរាប់រយឆ្នាំ។ The Golden Lion បានតុបតែង និងឌិនដោយត្បូងពណ៌មាសរាប់ពាន់គ្រាប់ ដែលធ្វើឲ្យបវរកញ្ញាមានភាពស្រស់ស្អាត និងទាក់ទាញ។ ពណ៌មាស បង្ហាញពីជ័យជម្នះ និងសុភមង្គល ខណៈដែលសិង្ហ មានន័យថា ក្លាហាន អង់អាចមោះមុត ។ ជាពិសេសឈុតនេះគឺចង់បង្ហាញពីស្ត្រីម្នាក់ដែលមានភាពថ្លៃថ្នូរ កេរ្តិ៍ឈ្មោះ និងកិត្តិយស ដែលមានភាពអស្ចារ្យ ដូចសិង្ហមាស។

ពេល ដេត ស្រីនាឌ ដើរបង្ហាញឈុតតំណាងជាតិ Angkor Equinox ទឹកមុខដ៏អង់អាចក្លាហាន និងរឹងមាំដូចប្រាសាទដូនតាខ្មែរ ដែលស្ពាយនៅពីលើស្មានាង។ អ្វីដែលនាងធ្វើបានរឹតតែល្អ ក្នុងពេលបង្ហាញឈុតតំណាងជាតិ នាងចង្អុលដោយមិនញញើត ចំពោះខ្មាំងសត្រូវ៕