ការទន្ទឹងរង់ចាំ MV បទ «Sweet Love» របស់កូនប្រុសទី២កំពូលតារាចម្រៀងប្រុស ព្រាប សុវត្ថិ គឺ សុវត្ថិ មុនីនាគ និងតារារ៉េបអាមេរិក Ebenezer មកដល់ទីបញ្ចប់ហើយ ដោយអំឡុងម៉ោង ១២ថ្ងៃត្រង់ថ្ងៃ (ម៉ោងកម្ពុជា) ១៨ ខែសីហា ឆ្នាំ ២០២៥ នេះ N.John បានបង្ហោះទាំងនៅក្នុង YouTube ព្រមទាំង Facebook។
បទ «Sweet Love» ដែលទទួលបានការគាំទ្រខ្លាំងតាំងពីចេញដំបូងប៉ុន្មានខែមុនមកដល់ពេលនេះ នៅតែផ្ទុះការស្ដាប់បន្តទៀត។ ដោយ «Sweet Love» លើកនេះគឺជាការសហការគ្នារវាង N.John និងអ្នកផលិត និងអ្នកនិពន្ធ Ebenezer។ MV បទ «Sweet Love» មិនត្រឹមតែបញ្ចេញក្បាច់រាំយ៉ាងរស់រវើករបស់ N.John ឡើយ ហើយក៏បង្ហាញឲ្យឃើញភាពអស្ចារ្យនៃសម្ភារៈទំនើបទាំងឡានស៊េរីទំនើប និងយន្តហោះឯកជនដែរ។
នេះបង្ហាញឲ្យឃើញយ៉ាងច្បាស់ថា ទាំងសមត្ថភាព និងលទ្ធភាព អ្នកគាំទ្រអាចឃើញយ៉ាងច្បាស់ថា សុវត្ថិ មុនីនាគ ឬ N.John ស័ក្ដិសមជាតារាលំដាប់ពិភពលោកបាន។ N.John បានចាកចេញពីមាតុភូមិកំណើត តាមរកក្ដីស្រមៃលើទឹកដីអាមេរិកតែម្នាក់ឯង ដោយបានចូលសាលាហ្វឹកហាត់នៅ Milennium Dance Complex។
អ្នកគាំទ្រពីកម្ពុជាមានមោទនភាព ចំពោះ N.John ដែលអាចសហការធ្វើបទចម្រៀងជាមួយ អាមេរិក Ebenezer ទាំងជាផលិតករ អ្នករ៉េប និងអ្នកនិពន្ធ ហើយក៏អាចនាំកម្ពុជាបានដល់អន្តរជាតិ ហើយសាសន៍ដទៃក៏កាន់តែស្គាល់ច្បាស់ពីខ្មែរ។ «Sweet Love» ដែលច្រៀងរួមគ្នារវាង N.John និង Ebenezer ពិតជាពីរោះ សំឡេងតារាប្រុសទាំង ២ ផ្អែមសឹងតែដូចគ្នាតែម្ដង។
គួរបញ្ជាក់ថា Ebenezer ជាបុគ្គលល្បីល្បាញក្នុងវិស័យចម្រៀង R&B នៅអាមេរិក។ Ebenezer ធ្លាប់រួមការងារជាមួយកំពូលតារាចម្រៀងជាច្រើនទាំងនៅអាមេរិក អង់គ្លេស និងនៅក្នុងវិស័យ K-pop។ ក្នុងនោះមាន Jeremih, Ty Dolla $ign, REMA, Lil Durk, Ashnikko, Stefflon Don, Mahalia, Tion Wayne, Darkoo, Duke dumont ចំណែកក្រុម K-Pop វិញ មាន BTS, NCT127, EXO , WayV៕
