យុវតី ជូរី ល្អហួស Miss Teen Icon Cambodia 2026 ដែល​តែ​នៅ​ក្នុង​វេទិកា​ប្រកួត Miss Teen Icon International 2026 ដែល​កំពុង​ធ្វើ​ឡើង​នៅ​ប្រទេស​ឥណ្ឌូណេស៊ី​នោះ ទទួល​បាន​ការ​គាំទ្រ និង​ស្រលាញ់​ចូលចិត្ត​ខ្លាំង ពី​សំណាក់​ម្ចាស់​ផ្ទះ។

កាលពី​ម្សិលមិញ​ថ្ងៃ ១១ ខែ​វិច្ឆិកា ឆ្នាំ ២០២៦ កម្មវិធី Miss Teen Icon International 2026 ឈាន​ចូល​ដល់​វគ្គ​ការ​ប្រកួត​វគ្គ​បឋម មាន​បង្ហាញ​ឈុត​តំណាង​ជាតិ, Talent Show និង Kebaya ឈុត Indonesia។ ដែល​ទាំង ៣ វគ្គ ល្អហួស ត្រូវ​បាន​អ្នក​គាំទ្រ​ចាប់អារម្មណ៍​ខ្លាំង។

ព្រោះ​ថា ឈុត​របស់​បវរកញ្ញា​ខ្មែរ​វ័យ ១៨ ឆ្នាំ រូប​នេះ​មួយ​ណា​ក៏​អស្ចារ្យ​ដែរ។ ដោយ​ឈុត​តំណាង​ជាតិ ជូរី ល្អហួស បាន​យក​នូវ​សម្បត្តិ​វប្បធម៌​បន្សល់​ទុក​តាំងពី​ដូនតា​ដោយ​យក​ឈុត​អប្សរា និង​ប្រាសាទ​អង្គរវត្ត​មាន​ព្រះ​អាទិត្យ​រះ​ចំ​កំពូល​ប្រាង្គ និងរូបភាពកសិករធ្វើដំណាំស្រូវបញ្ចូលគ្នាតែមួយ និងដាក់ឈ្មោះ​​ថា “នារី​កសិករ​នៃ​ដែន​ដីមាស អប្សរា​មហានគរ​”។ មិនតែប៉ុណ្ណោះ ល្អហួស ក៏បានបន្ថែមស្បៃខ្មែរដ៏ប្រណីត និងផ្ចិតផ្ចង់ពីព្យួរបង្ហាញ​ច្បាស់​ៗថា ខ្មែរជា​ប្រទេស​មាន​វប្បធម៌​ដ៏​សម្បូរបែប។

ដំណាំស្រូវនៅប្រទេសកម្ពុជា មានប្រវត្តិសាស្ត្រយូរលង់ណាស់មកហើយ ដោយមានការចងក្រង និងភស្តុតាងបុរាណវិទ្យាបញ្ជាក់ថា បានចាប់ផ្តើមដាំដុះតាំងពីអំឡុងពេល ២ ៦០០ ទៅ ៥ ០០០ ឆ្នាំមុនគ្រិស្តសករាជ តាមរយៈការរកឃើញនៅស្ថានីយបុរាណវិទ្យា សំរោងសែន ខេត្តកំពង់ឆ្នាំង។ មួយ​វិញ​ទៀត​ប្រាសាទ​អង្គរវត្តដែលជាអច្ឆរិយវត្ថុទាំង ៧ ក្នុងលោក ដែល​មានចម្លាក់​អប្សរាជុំវិញ ក៏ជាមរតកដ៏អស្ចារ្យ គ្មានអ្វីអាចកាត់ថ្លៃបានផងដែរ។

នេះហើយជាឈុតតំណាងជាតិ ដែលមានគំណិតច្នៃប្រតិដ្ឋបំផុតដែល Miss Teen Icon Cambodia 2026 ជូរី ល្អហួស និងក្រមការងារបានរៀបចំ​យក​ទៅ​បង្ហាញ​លើ​ឆាក​អន្តរជាតិ។

ជូរី ល្អហួស ពេលនេះ​ក៏​កំពុង​ត្រូវ​បាន​នាំ​មុខ​បណ្ដោះអាសន្ន​ក្នុង​ការ​បោះឆ្នោត។ សម្រាប់​វីដេអូ​កាលពី​ម្សិលមិញ​របស់​នាង មាន​អ្នក​មើល ល្អហួស ច្រើន​ជាង​បេក្ខភាព​ដទៃ ដែល​នេះ​បញ្ជាក់​ថា ប្រជាប្រិយភាព​នាង​ពិតជា​មិន​ធម្មតា​នោះ​ទេ សូម្បី​តែ​ប្រជាជន​ឥណ្ឌូណេស៊ី​ក៏​ពេញ​ចិត្ត​នឹង​អត្តចរិត​បវរកញ្ញា​ខ្មែរ​រូប​នេះ​ដែរ។

សម្រាប់​អ្នក​គាំទ្រ​ក្នុង​ស្រុក​ឯណោះ​វិញ បាន​សហការ​គ្នា​ល្អ ម្នាក់​ៗ​បាន​ចំណាយ​ថវិកា​ផ្ទាល់​ខ្លួន ​បោះឆ្នោត​ឲ្យ​Miss Teen Icon Cambodia 2026 ជូរី ល្អហួស ដែល​ការ​បោះឆ្នោត​នឹង​ត្រូវ​បញ្ចប់​ម៉ោង ៥ ល្ងាច​ថ្ងៃ ១២ ខែ​វិច្ឆិកា ឆ្នាំ ២០២៦ នេះ៕