អូលីវ៉ា គង់ ត្រៀមចូលរួមកម្មវិធីលំដាប់អន្តរជាតិ Cannes Film Festival ជាលើកទី២

ជាអ្នកច្នៃម៉ូតនិងជាគ្រូបង្វឹកជំនាញដើរម៉ូត លោក សីហា ម៉ែន ឬ អូលីវ៉ា គង់ បង្ហាញការឈឺចាប់ចំពោះការបំពាន និងឈ្លានពានពីសំណាក់ប្រទេសដែលជាបច្ចាមិត្ត ជាមួយការសន្យាថានឹងពាំនាំកម្ពុជាបង្ហាញក្នុងកម្មវិធីលំដាប់អន្តរជាតិ Cannes Film Festival 2026។

ការត្រៀមខ្លួនក្នុងការបង្ហាញវត្តមានជាលើកទី២ ពីសំណាក់អ្នកច្នៃម៉ូតកម្ពុជា អូលីវ៉ា គង់ លើកម្រាលព្រំក្រហមក្នុងព្រឹត្តិការណ៍លំដាប់អន្តរជាតិមហោស្រពភាពយន្តទីក្រុងកាន ២០២៦ បានកំពុងធ្វើឱ្យអ្នកគាំទ្រក្នុងវិស័យច្នៃម៉ូតរំភើបនិងរង់ចាំមើលថាម្ចាស់ប្រ៊េន KALKIN រូបនេះនឹងមានអ្វីប្លែកសម្រាប់បង្ហាញនៅក្នុងកម្មវិធីលំដាប់អន្តរជាតិនាលើកនេះ។

តាមរយៈការឆ្លើយឆ្លងតាមរយៈសារអេឡិចត្រូនិកដោយផ្ទាល់ លោក អូលីវ៉ា គង់ បានប្រាប់ AMS ថា៖ «សម្រាប់ការចូលរួមនាលើកនេះលោកទទួលបានការអញ្ជើញ ដោយមានម្ចាស់ប្រ៊េនក្នុងស្រុកជាអ្នកឧបត្ថម្ភគាំទ្រ»។ ជាមួយគ្នា លោកបានឱ្យដឹងទៀតថា៖ «ចូលរួមក្នុងមហោស្រពភាពយន្តទីក្រុងកាន នាលើកទី២ នេះ លោកក៏បាននាំយកបវរកញ្ញាកម្ពុជាមួយរូបទៅជាមួយផងដែរ (តែសុំលាក់ឈ្មោះសិន)»។ យ៉ាងណាមិញ ចំពោះពេលវេលា ក៏ដូចជាការច្នៃឈុតចូលរួមយ៉ាងណានោះ អ្នកច្នៃម៉ូតជំនាញរបស់កម្ពុជារូបនេះ នឹងអាប់ដេតជូននាពេលក្រោយ។

ក្នុងដំណើរទៅកាន់វេទិកាអន្តរជាតិនាពេលខាងមុខនេះដែរ លោក អូលីវ៉ា គង់ ត្រៀមជាស្រេចក្នុងការបង្ហាញកេរ្តិ៍ឈ្មោះរបស់កម្ពុជាឱ្យអន្តរជាតិបានជ្រួតជ្រាបកាន់តែច្បាស់ ជាពិសេសលោកនឹងពាំនាំសិល្បៈ វប្បធម៌ អរិយធម៌ និងវិស័យទេសចរណ៍កម្ពុជាទៅកាន់ពិភពលោកផងដែរ។

គួរឱ្យដឹងបន្ថែមដែរថា ត្បិតមហោស្រពភាពយន្តទីក្រុងកាន Cannes Film Festival 2026 ជាវេទិកាអន្តរជាតិសម្រាប់បុគ្គលក្នុងវិស័យភាពយន្ត ដូចជាផលិតករ ឬតួសម្ដែងក្នុងភាពយន្តពាក់ព័ន្ធ ប៉ុន្តែវេទិកាមួយនេះក៏ត្រូវបានចាត់ជាកន្លែងបង្ហាញភាពច្នៃប្រឌិត ជាពិសេសលើសម្លៀកបំពាក់តែម្ដង ហើយនេះគឺជាឱកាសសម្រាប់អ្នកច្នៃម៉ូតកម្ពុជារូបនេះក្នុងការបង្ហាញពីកម្ពុជាទៅកាន់ពិភពលោក៕

រូបភាព ៖ អូលីវ៉ា គង់

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។