ប្រាសាទប្រុស ឬប្រាសាទសក្ល ជាសំណង់បុរាណដែលបន្សល់លើទឹកដីនៃខេត្តកំពង់ឆ្នាំង

ប្រាសាទប្រុស ឬហៅថាប្រាសាទសក្ល ជាប្រាសាទមួយក្នុងចំណោមប្រាសាទជាច្រើនទៀតដែលបានបន្សល់ទុកនៅលើទឹកដីនៃខេត្តកំពង់ឆ្នាំង។ ប្រាសាទទោលមួយនេះនៅរក្សារូបរាងស្ទើរពេញលេញ និងបានក្លាយជាទីសក្ការបូជារបស់សហគមន៍ក្នុងតំបន់ទៀតផង។

កាលដំបូងឡើយប្រាសាទសក្ល មានឈ្មោះដើមថាប្រាសាទប្រុស។ តាមរឿងព្រេងនិទានកាលជំនាន់កសាងប្រាសាទប្រុសនិងប្រាសាទស្រីមានការភ្នាល់គ្នារវាងបុរសនិងស្ត្រីតែដោយកាលនោះបុរសបានចាញ់កលស្ត្រីទើបបានប្រាសាទដែលមានឈ្មោះដើមថាប្រាសាទប្រុស ត្រូវបានអ្នកស្រុកភូមិហៅថា ប្រាសាទសក្ល (ដែលមានន័យថាធ្វើមិនទាន់ហើយ) និងបន្តមកទល់ពេលបច្ចុប្បន្ន។ សំណង់បុរាណមួយនេះស្ថិតក្នុងភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង មានចម្ងាយប្រមាណ ៣២ គីឡូម៉ែត្រ ពីទីរួមខេត្តកំពង់ឆ្នាំង ជិតផ្លូវឆ្ពោះទៅកាន់ខេត្តកំពង់ធំ។

បើតាមក្រសួងវប្បធម៌ និងវិចិត្រសិល្បៈខេត្តកំពង់ឆ្នាំង ប្រាសាទប្រុសទំនងសង់ឡើងក្នុងអំឡុងដើមសតវត្សរ៍ទី៨ សម័យមុនអង្គរ រចនាបថប្រាសាទកំពង់ព្រះ។ បើធៀបប្រាសាទផ្សេងទៀតនៅក្នុងខេត្តកំពង់ឆ្នាំងប្រាសាទនេះនៅរក្សារូបរាងស្ទើរពេញលេញ ទាំងក្បាច់រចនាលម្អជាប់ជញ្ជាំងប្រាសាទ ចម្លាក់ផ្ដែរនិងសសរពេជ្រដែលជាប់និងតួប្រាសាទ។

ប្រាសាទប្រុសសង់ឡើងពីឥដ្ឋ លើទួលខ្ពស់ រាងចតុកោណកែង ព័ទ្ធជុំវិញដោយវាលស្រែ នៅតាមជញ្ជាំងប្រាសាទមានលម្អដោយប្រាសាទអណ្ដែត និងមានផ្ដែរឆ្លាក់លើឥដ្ឋផ្ទាល់។ នៅខាងក្នុងប្រាសាទមានសំណល់បុរាណវត្ថុជាសសរពេជ្ររាងមូល ជើងទម្រ ព្រះពុទ្ធរូបបាត់ព្រះកេសមួយ និងមានផ្ដែរមួយផ្ទាំងនៅខាងក្រៅក្បែរខឿនប្រាសាទ។

សព្វថ្ងៃដោយមានការគោរពបូជាពីសហគមន៍ក្នុងតំបន់ជុំវិញ ប្រាសាទប្រុសត្រូវបានគេកសាងកំពូលរាងដូចចេតិយពីស៊ីម៉ងត៍និងទ្វារចូលប្រាសាទ។ គួរឱ្យដឹងដែរ ជុំវិញប្រាសាទមួយនេះក៏មានគ្រឹះប្រាសាទទួលបុរាណ និងត្រពាំងបុរាណផងដែរ៕

រូបភាព ៖ Visit to Cambodia

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។