ប្រធានសមាគមសិល្បករខ្មែរ ផ្តល់អាហារូបករណ៍សិក្សា ៥ កន្លែងនៅសាកលវិទ្យាល័យ ជូនសិល្បករសិល្បការិនី

កៀកថ្ងៃប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិសម័យប្រឡង ឬបាក់ឌុបមែនទែនហើយ ដែលនេះជាការទន្ទឹងរង់ចាំអស់រយៈពេលជាច្រើនថ្ងៃមកហើយសម្រាប់សិស្សថ្នាក់ទី ១២ គ្រប់រូប។

ដើម្បីជួយសម្រួលដល់សិស្សពូកែ លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ បានសម្រេចផ្ដល់អាហារូបករណ៍សិក្សា ៥ កន្លែង នៅសាកលវិទ្យាល័យភ្នំពេញអន្តរជាតិ (PPIU) ជូនដល់សិល្បករសិល្បការិនី។

កាលពីប៉ុន្មានថ្ងៃមុន សមាគមសិល្បករខ្មែរ បានប្រកាស និងជូនដំណឹងនេះដល់សិល្បករសិល្បការិនីទាំងអស់បានដឹងថា លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ នឹងផ្ដល់អាហារូបករណ៍ ៥កន្លែង (ថ្នាក់បរិញ្ញាបត្រ) សិក្សានៅសាកលវិទ្យាល័យភ្នំពេញអន្តរជាតិ (PPIU) ជូនដល់សិល្បករសិល្បការិនី ជាសមាជិកសមាគម ដើម្បីរួមចំណែកកសាងធនធានមនុស្ស និងជាការតបស្នងចំពោះកិច្ចខិតខំថែរក្សាការពារសិល្បៈវប្បធម៌ ក៏ដូចជាជួយសម្រួលដល់ការខ្វះខាតរបស់សិល្បករមួយចំនួន។

ឱកាសសិក្សានៅសាកលវិទ្យាល័យ របស់សិល្បករខ្មែរជាកត្តាមួយជួយលើកស្ទួយសិល្បៈជាតិ តាមរយៈចំណេះដឹងដែលទទួលបានពីសាលា ហើយមានសមត្ថភាពគ្រប់គ្រាន់ក្នុងការជួយផ្សព្វផ្សាយទៅកាន់ពិភពលោកខាងក្រៅ។

សម្រាប់សមាជិកសិល្បករសិល្បការិនីដែលមានបំណងទទួលបានឱកាសអាហារូបករណ៍ដ៏ពិសេសពីប្រធានសមាគមសិល្បករខ្មែរ សូមរួសរាន់មកសាកសួរព័ត៌មានដោយផ្ទាល់ នៅទីស្នាក់ការសមាគមសិល្បករខ្មែរ ដែលមានអាសយដ្ឋាន ផ្ទះលេខ៩៣ ផ្លូវ៣៧៦ ភូមិ១ សង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ ចាប់ពីថ្ងៃនេះ រហូតដល់ថ្ងៃ ១៥ ខែកញ្ញា ឆ្នាំ ២០២៦ ឬ តាមរយៈលេខទូរស័ព្ទ ០៩៥ ៨២៦ ៨២៦/ ០៩៥ ៨២៧ ៨២៧៕

រូបភាព៖ Khmer Artists Association

ប្រធានសមាគមសិល្បករខ្មែរ ផ្តល់អាហារូបករណ៍សិក្សា ៥ កន្លែងនៅសាកលវិទ្យាល័យ ជូនសិល្បករសិល្បការិនី

អ្នកនាង ទ្រី រ៉ាវី | Ms. Try Ravy

ព័ត៌មានទូទៅ

សេដ្ឋកិច្ច

អប់រំ

កីឡា

កម្សាន្ត

អរិយធម៌ខ្មែរ

Politico 360

One-Minute

កម្ពុជាមាតុភូមិខ្ញុំ

សច្ចធម៌ប្រវត្តិសាស្ត្រ

វិភាគសុីជម្រៅ

វឌ្ឍនភាពកម្ពុជា

អំពីក្រុមហ៊ុន